Read Hrangkhol EZEKIELA 41 Bible Online

EZEKIELA 41 - Hrangkhol bible

EZEKIELA 41

¹Kha hnung chu mihriam khan tentan inlaina taka om, Hmun Irthianga khan a ni hruaia, khataka lûtna lampui kha ar khia.

²Mûk ruka inthûk le mûk sôma irza a nia, khanchu a sîr hni tianga banghai kha mûk ringaa irsa a ni. A sûnga tentan kha ar khia, a dung mûk sôm minli a nia, a khang chu mûk sômhni a ni.

³Khanchu tentan sûngrîla khan a lûta, khataka fena lampui khom kha ar khia mûk hnia inthûk le mûk ruka irza a ni. A banghai chu mûk saria irsa a ni.

⁴Khanchu kha tentan kha ar khia a dung tiang mûk sômhni, a khang khom mûk sômhni a ni. Khanchu ki kuang, “Hi hi Hmun Irthiang tak chu a ni,” a tia.

⁵Khanchu mihriam khan biakbuk sûng tianga bang irsa dânhai kha ar khia, mûk ruk a nia. Khanchu hi bang pên tianga hin tentanhai mûk minlia irzat hi biakbuk irhîla khan a oma.

⁶Hi chontanhai hi irchuan thuma siam a nia, tentan chîn sômthum a sûnga khan a oma. Khanchu irchuan tin irdîna biakbuk pên tiang bang kha a hnuai tianga irchuanhai nêkin a’rphân uala, tentan kha biakbuk leh khan irzomna boia bang chunga a’rnghat theina hrangin.

⁷Khaang khan biakbuk banghai khom kha pên tiang ata enin chu, a chung dên thaiin ar sa dân kha hmunkhat angin an langa. Khanchu biakbuk pên tianga banga khan tentan pên tiang khan a luina irzatôk tak inhni siam a nia, irchuan hnuai ten kha fe thei a nina hrangin.

⁸Khanchu hi tentanhai pên tiang bang irsa dân chu mûk ringa a nia, khanchu biakbuk hmâr tianga tentanhaia khan mikot inkhat hi a oma.

⁹Khaang dênin sim tianga tentanhai khom khan inkhat a oma. Khanchu biakbuk irhîla khan mûk ringaa irzat hmun rong hi ki hmua;

¹⁰Biakbuk bang kôla tentanhai lungphun leh khan a’rten maia, irnêng ata mûk ruka irsâng hi a ni.

¹¹Khanchu hmun rong le ochaihai omna inkârhaia khan hmun rong a khang tianga mûk sômhnia irzat hi biakbuk zuia khan a om sa.

¹²Khanchu biakbuk nitâk tianga hmun ôla a mong taka khan in inkhat a dung mûk sômkuaka sei le a khang mûk sômsari hi a oma; a banghai chu mûk ringaa irsa a ni.

¹³Khan mihriam khan, biakbuk pên tiang kha a’rkhia, a dung mûk irzakhat a nia, khanchu a hnung tiang ata hmun ôl lâksa’n nitâk tianga biakbuk hmor tena khan mûk irzakhat ngêt a ni.

¹⁴Khanchu biakbuk mân tianga a sîr hmun ôl kha lâksa’n, mûk irzakhat ngêt a ni.

¹⁵Khanchu biakbuk nitâk tiang khan a’rkhia, a sîr inhnia lampuihai lûtna ten kha lâkin, mûk irzakhat ngêt a nia.

¹⁶Khanchu biakbuk lûtna tentan le Hmun Irthiang le Hmun Irthiang tak kha a hnuai ata tukver omna ten kha thingphêk inkhop ving hi a nia, kha tukverhai kha inhong thei ving a ni.

¹⁷Khanchu biakbuk sûng tianga banghai kha mikot chung tena irsâng hi a nia, an rêng khan tûm thinghai le cherubhai irlim, a kera an iker insip ving a nia.

¹⁸Tûm thingkunghai chu cherub le cherubhai kâra khan a bang tuan khan a oma. Cherubhai khan hmâi inhni seng hi an neia.

¹⁹Mihriam hmâi angin an hmâi kha tûm thingkung tianga a nghaa, kâmkeibaknei hmâi kiangkhat tianga tûm kung tiang khan a oma. Khaang khan bang murdi,

²⁰a hnuai ata mikot chunghai kha a sip zita.

²¹Khanchu Hmun Irthiang mikot chopuihai chu irki minli nei an ni.

²²Khanchu Hmun Irthiang tak lûtna mân tiang khan, thil inkhat thing maichâm ni ômtak hi a oma, a’rsâng lam chu mûk thum a nia, a khang chu mûk hni a ni. Khanchu a’rkia chopuihai le a toinahai le a kôlhai kha thinga siam ving a nia. Khanchu mihriam khan ki kuang, “Hi hi RENGPA makunga dokâng chu a ni,” a tia.

²³Khanchu Hmun Irthiang fena lampui mong taka khan mikot inkhat hi a oma, khanchu Hmun Irthiang tak fena lampui monga khan inkhat dang hi a oma.

²⁴Kha mikothai khan inkhâr inhni seng an neia, a laia irhong thei a ni.

²⁵Khanchu Hmun Irthiang inkhârhai khan, banga om ang ngêt tûm thingkunghai le cherub illima oma. Khanchu a lûtna mikot tentan chunga khan miliang lian tak hi a oma.

²⁶Khanchu hi tentanhai hin tukverhai a neia, khan a banghai chu tûm thingkunghai leh irvôtir a ni.