Read Hrangkhol EZEKIELA 42 Bible Online

EZEKIELA 42 - Hrangkhol bible

EZEKIELA 42

¹Khanchu mihriam khan pên tianga tualzôla khan a ni hruaia, khanchu biakbuk hmâr tianga in, biakbuk nitâk tianga in om hla rak loina khan a ni hruaia.

²Hi in hi a dung chu mûk irzakhat a nia, a khang kha chu mûk sômringa a ni.

³Khanchu sîr khat tiang khan biakbuk kôla om hmun ôl, mûk sôm inhnia irzat hi a nghaa; sîr khat dang khan pên tianga tualzôl lung dâp tiang kha a nghaa, chadan thum neia siam a nia, a hnuai tak nêka tôt uala siam zit a ni.

⁴Khanchu hi in zui hmâr tiang khan lampui mûk sôma irzat le mûk irzakhata sei, a lûtnahai leh hin a oma.

⁵Khanchu tentan in chung tianga omhai kha a laia le a hnuai tentanhai nêk khan ar têt uala, khahai kha a hnung tiang uala siam a ni sikin.

⁶Khanchu chadan thuma tentanhai kha an rêngin hmun ôla om an nia, tualzôla in danghai anga chopuia irnghat ni mahai.

⁷Khanchu tentanhai leh irdîn mai khan bang a oma, pên tianga tualzôl zuia khan a fea, mûk sômringa sei hi a ni.

⁸Khanchu pên tianga tualzôl zuia khan tentan irtânga omhai kha mûk sômringa sei an ni, biakbuk tianga in sei dân kha mûk irzakhat a ni.

⁹Khanchu nisua tianga in mongna khan bang irphutna hmuna tentan inhnihai hnuaia hin pên tianga tualzôl lûtna hi a oma.

¹⁰Khanchu biakbuk sim tiang, nitâk tianga biakbuk mongna rengata hla rak loia hin, kha in ang kha inkhat a om nôka.

¹¹Khanchu tentanhai maton tiang khan hmâr tianga lampui om ang dên khan lampui dang inkhat a oma. A lian dânhai, a sei dânhai, a’rvo dânhai le a lûtnahai khom ar ang vinga.

¹²Khanchu kha in sim lam pang tiang, nisua tianga a mongna taka bang irphutna tentanhai hnuaia khan mikot hi a oma.

¹³Khanchu mihriam khan ki kuang, “Hi in inhnihai hi in irthiang a ni, khahai sûnga khan RENGPA nâitu ochaiin thilinhlan irthiang takhai chu an fâk ngaia, a tentanhai kha a’rthiang sikin, ochaihai khomin khataka khan thilinhlan irthiang takhai chu an sia ngai, bu thil inhlanhai, sual irbôlnahai, sual ngaidamnahai chu.

¹⁴Khan ochaihai chu biakbuk sûng ata pên tianga tualzôla khan an fe nuama ni’n chu hi tentanhai hin RENGPA sin an ithôna silkai irthianghai chu an imâksan hrang a ni. Khanchu mipuihai irbûmna an fe mân silkai danghai leh an irbel ngêt hrang a ni,” a tia.

¹⁵Khan mihriam khan biakbuk sûng tiang a’rkhi zoi tena chu nisua tianga dâikot tiang khan a ni hruai suaka, khanchu a pên tiang kha a’rkhi tâka.

¹⁶Khanchu irkhîna hmol kha a lâka, nisua tiang kha ar khia, mûk irzaringa a ni.

¹⁷Khan hmâr tianga khom kha ar hîlin ar khîna hmol leh irkhiin mûk irzaringa a ni.

¹⁸Irkhîna hmol khan sim tiang khom mûk irzaringa a nia,

¹⁹khan nitâk tiang kha a’rkhî nôka, mûk irzaringa dên a ni.

²⁰A sîr minli khan a’rkhia, a sei lam irzaringa, a khang khom irzaringa a nia, a irhîlin bang a neia, hmun papai le hmun irthiang theithâkna hrangin.