Read Hrangkhol EZEKIELA 43 Bible Online

EZEKIELA 43 - Hrangkhol bible

EZEKIELA 43

¹Kha zoiin chu dâi mikot nisua tianga ngha dâi mikota khan a ni hruaia,

²khan, irngai ro, nisua tianga irthokin Israel Pathian roiinpuina chu a hong tung ta, khan arhâi khom tui tamtak ang a ni. Khanchu a roiinpuina khan hnuai kha an vârtira.

³Khanchu thil ki lei ihmuhai kha, khopui insiat hranga a hong laia ki lei ihmu kha Kebar vadunga ki lei ihmu ang kha a ni; khanchu ki hmâi leh hnuai ki sika.

⁴Khan dâi mikot nisua tianga ngha irthokin RENGPA roiinpuina chu a hong lûta.

⁵Irtha khan a nin dom irsângtira, irhuan sûng tualzôla khan a ni hruai inlûta, khan irngai ro, RENGPA roiinpuina khan in an siptira.

⁶Mi inkhat ki kôla a ngîr laitakin, in sûng ata mi inkhat hin ki kuang thu a hrilin kin hriata,

⁷keima kuang, “Mihriam nâipa, hi hi ki rêngtoihmun le ki ke irnghatna a ni, Israel irchihai laia kumkhontuanga ki omna hrang chu a ni. Israel insûng mihaiin ki’rhming irthiang chu porinchetir ta no nihaia, anni khomin an rênghai khom an hurna’n mani, an irbôlna haia, an rênghai mâk khomin porinchetir ta no nihai.

⁸An tualzôlhai chu ki tualzôla siain, an mikot khârhai chu ki mikot bula, anni le kin kâr chu bang vai a oma. Khan an intir omna an lei itho tâkhai khan ki’rhming irthiang an lei porinchetir tâka, khasikin ki milung hoi loina khan anni chu ki hâlirvôm paihaia.

⁹Atûn hin an hurna le an rênghai ruak chu keima irthokin hlataka sepaihai sianlân, anni laia kumtuangin om mai ta ki ti,” a tia.

¹⁰“Nang mihriam nâipa, Israel insûngkuahai laia khan in kha inentir ro, an sualnahai ata an inzak theina hrangin; khanchu an itûng kha irkhîtir roh.

¹¹Khan an sintho murdihai kha an inzakpuia ni’n chu a itum le a hmêl irput dâna, a fena le a lûtna, a hmêl omziahai murdi khan khataka dânhai kha hrilin lân, an mithmu ngêta khan irziakin lân, kha an hmêl irput dân kha a om maia, a dânhai an zôm thei maina hrangin.

¹²Hi hi nin dân hrang chu ni a ti, tâng sîp chunga a ihuap za chu hmun Irthiang tak ni a ta; irngai ro, hihai hi nin dân chu ni a ti,” a tia.

¹³Khan, hi hi mûka irkhi maichâm lian lam chu a ni, a zer chu mûk khat ni a ta, a khang khom mûk khat ngêt, a kôl chu ar hîla khâp khat ni a ti. Hi hi maichâm zer chu a ni.

¹⁴Khan hnuai a toina ata a kôl hnuaiinta ata kha mûk hni ni a ta, a khang tiang chu mûk khat, khan a kôl chîn ual ata a kôl lian ual ten kha mûk minli nih a ti, khan a khang tiang chu mûk khat.

¹⁵Maichâm an chung ual chu mûk minli ni a ta, maichâm inthûk le a chung tiang khan irki minli om a ta.

¹⁶Maichâm omna chu mûk sôm hleihnia sei mûk sôm hleihni nêka lian ni a ti, a sîr minlia khan irtiat nat a ti.

¹⁷A sîrhai minlia khan a ring chu mûk sôm hleiminlia sei, mûk sôm hleiminli nêka lian ni a ti; ar kual chu a rêngin mûk chimrip ni a ti; a zer tiang chu mûk khat ni a ta, a sirna kalbihai chu nisua tiang ngha a ti.

¹⁸Khan, ki kuang a hrila, “Mihriam nâipa, RENGPA Pathianin hiang hin a ti: a chunga hâlirvôm thilinhlan an inhlanna thisen an in thei nî chu, hihai hi maichâm thuthung chu ni a ti.

¹⁹Levi mi ochaihai, Zadoka irchia mi ngêt kha, keima sintho hranga keima ni nâihai kuang khan sual thilinhlan hrangin sehrâtchal tuai pe ni ti, RENGPA Pathianin a ti.

²⁰Khan kha thisen kha la ni ta, ar ki minli khan pol ni ta, a kôl irki minlia khom khan, a zera a sîrhai khom khan; khanchu irthiangtir ni ta, ama ta hrangin inhlanna siam ni ti.

²¹Sual thilinhlanna hrangin sehrâtchal la ni ta, kha hmun inthang sai irthiang tuala khan hâl ni ti.

²²Khan sûn hnina nî khan sual thilinhlanna hranga khan kêlchal demnaboi inhlan ni ti.

²³Khan irthiangtirna sin ni tho zoiin chu sehrâtchal demnaboi le a pâl laia belrachal demnaboi kha inhlan ni ti.

²⁴Khan nangma’n RENGPA kuang hong hruai ni ta, ochaihaiin an lu chunga michi len thek an ta, khanchu RENGPA kuang pum hâlirvôm thilinhlan hrangin inhlan an ti.

²⁵Sûn sari sûng chu a ni tin, sual thilinhlan hrangin kêl ngaitua ni ta, khan sehrâtchal tuai le kêlbelrachal a pâl laia demnaboi zong sa ni ti.

²⁶Sûn sari sûng chu maichâm tah hrang khan irhlanna siam pe an ta, irthiangtir an ti, khanchu inhlan irthiang ta an ti.

²⁷Khan sûnhai a hong hek tena chu, sûn riat nia irthokin ochaihai khan hâlirvôm thilinhlanhai chu maichâma khan tho an ta, irngeina thilinhlanhai leh khan; khanchu lei lôm ta ki ta, RENGPA Pathianin a ti,” tiin.