Read Hrangkhol EZEKIELA 48 Bible Online

EZEKIELA 48 - Hrangkhol bible

EZEKIELA 48

¹Khan hmâr tianga ramri chu Mediteranean tuipui ata kha nisua tiang a pana.

²Hethlon khopui ata kha Hamath panna lampuia khan a theng thaia. Khatak ata kha Enon khopui tiang fe maiin Damaska le Hamath ramri kha a va suna.

³Nam tinhai khan nisua tiang ata hi nitâk dênin del an ta,

⁴khanchu hmâr tiang ata sim tianga delpu

⁵hranghai chu hihai hi an ni.

⁶Dana, Asera, Naftalia, Manasea, Efraima,

⁷Reubena le Judahai hi an ni.

⁸Khanchu Juda ram sim tiang pang kha ram irthiang ni a ta, a khang chu hmâr tiang ata sim tianga dênin mêl sôm hleihni le a chimrip ni a ta, a dung tiang khom nisua tiang ata khaang dên khan nih a ta, nam tinhai kuanga ram zêka om ang khan, khanchu biakbuk chu khataka khan om a ti.

⁹Khanchu hi ram laitaka hin mêl sôm hleihni le a chimrip, a khang tiang mêl sôm chu RENGPA ta hrangin inhlan ni a ti.

¹⁰Ochaihai khom khan hi ram irthiang hi dong sa an ta, nisua tiang ata nitâk tiang kha mêl sôm hleihni le a chimrip ni a ta, hmâr tiang ata sim tiang kha mêl ringa ni a ti. RENGPA biakbuk chu hi hmun lai taka hin om a ti.

¹¹Khanchu hi hmun hi Zadoka irchi suanpâra ochaihai ta hrang ni a ti. Anni hin chu iamom takin ki sin an thoa, Levi mihai ang khan Israelhai sual sinna khan kop sa mahai.

¹²Khasikin anni chu Levi mihai hmun kôla khan hmun nei an ta, kha kha hmun irthiang tak chu ni a ti.

¹³Khanchu ochaihai ram sim tiang panga khan, Levi mihai khom khan kha rama khan hmun nei an ta, nisua tiang ata nitâk tiang chu mêl sômhleihni le a chimrip ni a ta, hmâr tiang ata sim tiang chu mêl ringa ni a ti.

¹⁴Khanchu RENGPA ta hranga ram inhlana om kha ram a sanalaitak ni a ta, kha hmun kha zuar phal ni ngai no ni, mi leh irthûl thei khom ni no nia, mi dang kuanga pêk khom ni no ni, hmun Irthiang a nia, RENGPA ta a ni sikin.

¹⁵Khanchu ram irthiang a la zôk, a dung tiang mêl sômhleihni le a chimrip le a khang tiang mêl hni le a chimrip kha chu hmun Irthiang ni maka, kha kha chu vântâng ihmang hrang ni a ti. Khataka khan om thei an ta, ram kha hmang thei an ti. Khopui chu a ram inlaina taka khan om a ti.

¹⁶Kil minli nei ni a ta, irki tin kha mûk sângminli le mûk irzaringa ni chit a ti.

¹⁷Khanchu khopui irhîl irki tina khan hmun ôl, a khang mûk irzahni sômringa hi om a ti.

¹⁸Khanchu khopui sin zoia a om tena la zôk, hmun irthiang sim tiang kha a dung tiang mêl ringa le a khang tiang mêl hni le a chimrip, nisua tiang khan chu a dung tiang mêl ringa le a khang tiang mêl hni le a chimrip, nitâk tianga kha, khopuia omhai loi thôna hrang ni a ti.

¹⁹Khopuia om, a tu tukhomin, a tu namhai khomin kha hmun kha loiin nei thei an ti.

²⁰Khanchu hi ram irthiang hi irki minli nei ni a ta, irki tin kha mêl sôm hleihni ni zit a ti; kha khan khopui omna hmun khom kha huam sa ta a ti.

²¹Khanchu hi hmun biakbuk le ochaihai ram le, Levi mihai ram le khopui omna khêl nisua tiang le nitâk tianga ram zôkhai chu roirêltu rêng ta hrang ni a ti.

²²Roirêltu khan Benjamina-hai ram le Judahai ram kârhai chu dong a ti.

²³Khanchu hi hmun irthiang sim tiang pang murdi hi Jordan dung nisua tianga sûngkua omhai khan del an ta,

²⁴sûngkua tin khan nisua ramri tiang ata, Mediteranean tuipui ten khan ram dong chit an ti.

²⁵Hmâr tiang ata sim tiang tena dongtu hranghai

²⁶chu Benjamina hai,

²⁷Simeona hai, Isakara hai, Zebulunhai le Gad-hai ni an ti.

²⁸Khan sim tianga Gad-hai ramri chu Tamar ata Meribath-kadesh tui omna hmun ten kha ni a ta, khatak ata kha Aigupta tuidung zuiin Mediteranean tuipui ten kha ni a ti.

²⁹Khanchu RENGPA Pathianin, “Kha kha Israel namhai kuanga tasâna irchon hranga ni isem hrang ram chu ni a ti. Khahai kha pôl tinhai idong hrang dân chu a ni,” a tia.

³⁰Khan hihai hi khopuia irthoka suakhai chu an ni, hmâr tiang khan, irkhîin mûk sângminli irzaringa;

³¹khan khopui dâi mikot chu Israel namhai irhming omdân angin ni a ta, hmâr tiang khan chu dâi mikot inthum; Reubena dâi mikot inkhat, Juda dâi mikot inkhat le Levi dâi mikot inkhat;

³²khan, nisua tiang khom khan mûk sângminli irzaringa ni a ta, khan dâi mikot inthum, Josefa dâi mikot inkhat, Benjamina dâi mikot inkhat le Dan dâi mikot inkhat;

³³sim tianga khan irkhîna mûk sângminli irzaringa ni a ta, dâi mikot inthum; Simeona dâi mikot inkhat, Isakara dâi mikot inkhat, Zebulun dâi mikot inkhat;

³⁴nitâk tiang khom khan mûk sângminli irzaringa ngêt nih a ta, dâi mikot inthum le Gad dâi mikot inkhat, Asera dâi mikot inkhat; Naftalia dâi mikot inkhat.

³⁵A’rhîlin mûk sîngkhat sângriat ni a ta; kha khopui irhming kha, kha nî rengata chu, “Jehova Sammah ni a ti,” tiin.