Read Hrangkhol EZEKIELA 5 Bible Online

EZEKIELA 5 - Hrangkhol bible

EZEKIELA 5

¹Khan RENGPA’N, “Mihriam nâipa, sam voina bavo ngaihtak lan lân, ni lu le ni biang mul voipai zit ro, khan ni ivoina mul kha phalla leh varin lân, hmun thumin sem roh.

²Hmun thuma sena hmun khat chu khopui rûna a om sûng nîhai a hek tika khan khopui laia meia ni ihâl hrang a ni, hmun thuma sena hmun khat dang chu la ni ta, khopui pên tiang a rêngin khandaiin sât irnôi ni ta; khan, hmun thuma sena hmun khat dang chu phâivua’n insêm indartir hrangin pai ni ta, keiin khandaiin doi ki ti.

³Khan, khatak ata a tômte la ni ta, ni puan hmora infûn roh.

⁴Khatak ata kha a tômte la nôk ni ta, meia khan pai ni ta, kâng a ti; kha rengata kha Israel nam pumpuia mei hong suak a ti,” a tia.

⁵RENGPA PATHIANIN hiang hin a ti, “Hi hi Jerusalem chu a ni, namhai laia khan ki siaa, a vêla ramhai a oma.

⁶Ki thurêlhai chunga a nuara, ki dânhai chu a hnôla, a vêla nam dang omhai nêkin a sate’n thilsual an thoa. Ki thurêlhai chu an paia, ki dân siamhai ang khomin om ual mahai.

⁷Khasikin, RENGPA PATHIANIN hiang hin a ti a ni, ‘Nin vêla nam dang omhai nêkin nin buai oka, ki dân siam angin om mak chêia, ki thurêlhai chu pom loiin nin vêla om nam danghai dân nin lâk ual sikin.

⁸Khasikin, RENGPA PATHIAN khan hiang hin a ti. Irngai ro, kei ngei khom hin nang doi hrang ki ni. Nam danghai mithmua nangni ki ihrem hrang a ni.

⁹Nin sintho porinche tak takhai sikin ki la iti ngai loi, tho khom ki la itho ngai loi chu ni chunga tho ki ti.

¹⁰Nin laia pahaiin an nâihai taksa la fâk an ta, nâihaiin an pahai taksa la fâk an ti, ki ihrem hrang a ni, a la om sunhai khom irthekindarin om zit an ti.

¹¹Khasikin, ki hring mai angin intir ni iomna murdi le ni iporinchenahai murdi khan ki hmun irthiang chu a porinchetir tâk sikin hong inboipai ngêt ki ti, ki mitin irhmâi viat no ning, lungthung viat no ning.

¹²Hmun thuma sena hmun khat chu hriin mani, châmin mani, nin laia mi thi an ta; hmun thuma sena hmun khat chu ni vêla khandaiin thi an ti; hmun thuma sena hmun khat dang chu thekindarhai zit ki ti, khandaiin irzûlhai thiai ki ti.

¹³Khanchu, ki ninginmurna chu intungtir ki ta, an chunga ki ninginthikna kha indâi ta ki ta, a hoi ti ta ki ti. Kha zoia chu, kei RENGPA PATHIAN hin sathnem irngaina sikin kha kha ki itho a nih ti inhre ta an ti.

¹⁴Nin vêla nam omhai le nangma tianga irvâkvêlhai hmusitom le khoramin nangni siam ki ti.

¹⁵“Ningmur le ningthik takin, lungchuk loi takin nin chunga roi ki rêl zoi hnunga; mi ihmusit, innuisanna le enirkhêl la ni nin ti; kei RENGPA hin ki ihril tâk a ni.

¹⁶Nin fâk le nêk hmûna hnârhai kha insiat ki ta, châm ki intungtir hrang a ni. Nin thipuina hrang thal nangni irhlenpat anga natna kha châm sikin nin ituang hrang a ni.

¹⁷Nin nâihai that hrangin phîngchâmna le ramsahai tîrhai ki ta, hripui thisen insuakna le khandaihai nin thipuina hrangin tîr ki ti. Kei RENGPA’N ki iti a ni,” a ti.