Read Hrangkhol EZEKIELA 6 Bible Online

EZEKIELA 6 - Hrangkhol bible

EZEKIELA 6

¹Khan, RENGPA thu chu ki kuang a zuang tunga:

²“Mihriam nâipa, Israel rama tânghai chu thîrin lân, an kuang thu hril roh.

³Israel rama tânghai, RENGPA PATHIAN thu hi irngai roi. RENGPA PATHIANIN tânghai le mualhai kuanga le irhôrhai le phâi irhôrhai kuang hiang hin a ti. Irngai roi, kei, keima ngei hin nin chunga khandai zuang inlek ki ta, millim biak irbôlna hmunhai chu insiat zit ki ti.

⁴Nin maichâmhai insiat ki ta, nin pathian millim indinghai chu inthekindarh zit ki ta; nin laia thihai ruak chu nin millim makunga pai ki ti.

⁵Israel nâihai ruak chu an millim bulhai khan siakhôm ki ta, an ruhai chu nin maichâm irhîla khan inthekindarh ki ti.

⁶Nin omna hmun murdia khan khopuihai chu insiat ni a ta, millim irbôlna hmunhai chu ramchit a ta; nin maichâmhai insiat le inram a ni theina hrang le nin millimhai inkhoia, a boi theina’n le nin pathian illimhai chu irkitpaia a om theia, nin sinthohai chu a hek theina hrangin.

⁷Nin laia mithi ruak chu irthek pher phur a ta, a la damhai khan RENGPA ki nih ti inhriat an ti.

⁸“Senkhat chu thina lôi an ta, nam danghai laia, ram tina indarh ki ti.

⁹Nin laia khaanga thi loihai chu sala man ni an ta, ram tina hruai indarh zit an ti. Nam dang laia an irthekindarh hnunga chu nin hresuak an ti, an millim tianga a ni irheisanna ki insiat penahai kha inhriat an ti, khan an thil porinche tho insual murdi, an mâni mithmu ngêta an lei itho tâk thua khan intirom an ti.

¹⁰Khan, RENGPA ki nih ti inhriat an ti; an kuanga hi thil saloi ki tho hrang a nih ki ti hi, ti pai paia hril ki ni loizia inhresuak an ti,” tiin.

¹¹RENGPA PATHIANIN hiang hin a ti, “Ni kut inbênin lân, ni ke intet ro! Israel in sûngkuahaiin thilsual porinche an tho ngai hi a poi tak tak! khandaiin, châmin le hripui tuangin thi an ti, ti roh.

¹²Ram hlataka omhai chu hripuiin thi an ta, anai uala omhai chu khandaiin that ni an ti. Hitaka la omsun, hual sûnga omhai hi phîngchâmin thi an ti, khaang khan ki ninginmurna chu an chunga buak ki ti.

¹³Khan, tâng irsânghai, tâng sîp murdia hai le thing hring tin hnuaia le seso thing buk tin hnuaia an millimhai kuanga mirimhoi an inhlanna hmuna, an maichâm vêla an millimhai bula an mithi ruakhai a om tika chu kei hi RENGPA ki nih ti inhriat an ti.

¹⁴Israelhai chunga ki kut irlek ki ta, ramchâr ata Ribla, tianga an omna hmun murdia ram chu inramin insiat zit ki ti, khanchu kei hi RENGPA ki nih ti inhriat an ti,” tiin.