Read Hrangkhol EZEKIELA 7 Bible Online

EZEKIELA 7 - Hrangkhol bible

EZEKIELA 7

¹RENGPA thu chu ki kuang a zuang tunga,

²“Nang mihriam nâipa,” RENGPA PATHIANIN Israel ram kuanga hiang hin a ti a ni; “Mongna, mongna chu ram kil minlia a hong tung tâk e.

³Atûn hin ni hrangin mongna a ni, ni chunga ki ninginmurna chu zuan tung ki ta, ni omdân ang takin roirêl ki ti, thil porinche tak tak ni itho sika khan nang hrem ki ti.

⁴Ki mitin nang irhmâi no ning, nang inren ual no ning; ni lei itho ngai ang tak khan ni chunga hong tho ki ta, thil porinche ni itho sikin nang hrem ki ti, khanchu, RENGPA chu ki nih ti inhriat nin ti,” a tia.

⁵RENGPA PATHIAN khan hiang hin a ti, “Siatna ngot, siatna ngot hong tung a ti.

⁶Mongna a hong tung tâk, mongna a hong tung tâk e, ni chunga a hong tho tâk, irngai ro, a hong nâi tâk.

⁷O ram luatu, ni siatna hrang ni chunga a hong tung e, zoro chu a hong tunga, a nikhua chu a hong nâi tâk; tâng chunghaia raifânna khêk irhâi ang ni loiin buaina zoro kha a ni.

⁸Atûn hin ki ninginthikna chu ni chunga zuang buak ki ta, ni chunga ki ninginmurna chu tuang nin ti, ni omdân ang zêlin roirêl ki ti; thil porinchehai murdi kha ni chunga zuan tung ki ti.

⁹Khan, ki mitin nang irhmâi no ning, nang inren no ning, ni omdân ang zêlin ni chunga zuan tung ki ta; thil porinchehai ni itho chu ni chunga nang thuan ki ta; khanchu kei RENGPA hi hrem thei ki nih ti inhria nin ti,” a tia.

¹⁰Irngai ro, Israel ta hrangin nikhua chu a hong tung e, ni siatna hrang chu a hong suak ta, tuangna chu a hong punga, omlianna chu a hong irsâng tâk.

¹¹Hur le nghalna khan thil saloi an pungtira, an neina ite lak om loiin, an sum le puanhai, an sin sôlna rahai, an inhoina tinrêng boi zit a ti.

¹²Zoro chu a hong tung ta, nikhua chu a hong nâi tîr tîr ta; irchôktu chu raiinfân no sianlân, a zuartu chu beiindong ual no ri se; ningmurna chu an rênga chunga a itung hrang a ni sikin.

¹³Thil zuartu chu, la dam khom sianlân, a thil zuar chu hmu nôk ta no nia; inlârna chu an rênga chunga chum a ta, tûte a kîr om no nihai.

¹⁴Bekul chu an tuma, tinrêng siam irfûk a ni tâka; khannisian irdoinaa khan tûte fe mahai; ki ninginmurna chu mipui murdi chunga a oma.

¹⁵Khandai chu pên tiang a oma, châm le hripui chu kul sûng tianga khan a lênga; loia om chu khandaiin thi an ta, khopui sûnga om chu hripui le châmin thi an ti.

¹⁶Khannisianlân, khataka hong suak theihai chu, tânga om an ta, an rênga sualna chunga irtha’nvâi takin sûn an ti.

¹⁷An kuthai chu hrât loiin om a ta, an irkhûkhai chu irzalin om an ti.

¹⁸Bora puanhai sil an ta, chitnain anni chu inkhum a ta; an hmêlhai chu inzakna’n inlang a ta, an lua samhai kol zit a ti.

¹⁹An sumruhai chu kholaia khan dêng inthek an ta, an rângachakhai khom chu thil irthiang no ang hong ni ta a ti; an sum le rângachak khan RENGPA ningmurna nikhuaa chu anni chu saninzôk no nia, an hringnun inkhop no nia, an phîng khom khop ual no ni, anni irtettirtu sualna a ni tâk sikin.

²⁰An irvôna satak tak kha an inlalna’n an hmanga; khannisianlân, intiromin an millimhai siamna’n an hmanga, khasikin thil porinchea ki inchangtir tâk a ni.

²¹“Nam dang kuta inmantirin nangni sia ki ta, rammuala mi sualhai kuanga râllâk suma chang nin ta, porinchein om nin ti.

²²Nangni irheisan ki ta, ki hmun irthiang chu porinche an ti; inrûhai chu a sûnga lût an ta, porinche zit an ti.

²³“Thîrhrui chu siam roi, ram chu thisen insuak hmang roirêlnain a sipa, khopui sûng chu nakhrâtsonga porinchena’n a sipa.

²⁴Khasikin, nam dang sual tak takhai hong hruai lût ki ta; an in le loihai la pehai an ta; an hrâtna an irsongpui chu inboipai ki ta, an hmun irthianghai chu porinchein om a ti.

²⁵Chardongna a zuang tunga, hoina chu an zonga; aniachu hmu viat mahai.

²⁶Siatna chunga siat nôk ualna hong tung a ta, thu ichiom chunga khan thu thangintheina om a ta, deipu ata inlârna zong an ta, ochaihaiin irchutir hrang inhre no nihai, upahai khomin thupêk hrang inhre no nihai.

²⁷Reng chu beiindongin om a ta, milianhai chu an sabei dong a ta, ram sûnga mihai chu chitnain om zit an ti. An sintho ang zêlin thuanhai ki ti, an irphu ang zêlin hremhai ki ti; khanchu RENGPA chu ki nih ti inhria an ti,” a tia.