Read Hrangkhol EZEKIELA 8 Bible Online

EZEKIELA 8 - Hrangkhol bible

EZEKIELA 8

¹Sala intâng kum ruk kum, tha rukna tarik ringa nî khan ki in sûnga ki toia, Juda upahai ki makunga an toi lai khan RENGPA PATHIAN kut chu ki chunga khan a om tâka.

²Ki hei enin, mi mei anga inlang hi a oma, a kong hnuai tiang chu mei anga vâr a nia, a kong chung tiang chu dâr irtêk anga irtêk a ni.

³Khan, kut ni ômtak hin ki michal sîp sama a ni zuang chela, irnêng le irvân kâra Irtha’n a nin dom irsânga. Pathian inlârnaa khan Jerusalema a ni hruaia, tualsûng sûngrîl ual hmâr tianga mikota khan a ni siaa; khatak khan Pathian ningmurtirtu millim chu a oma.

⁴Khan, irngai ta, Israelhai Pathian roiinpuina kha, vadung phâizôla ki ihmu ang kha ki hmua.

⁵Khan PATHIANIN ki kuang, “Mihriam nâipa, hmâr tiang so en ro,” a ni tia. Khanchu hmâr tiang chu ki ena, maichâm omna hmâr tiang mikot bula khan Pathian ninginmurtirtu millim chu ki hmua.

⁶Ama’n ki kuang, “Mihriam nâipa, an sintho hi ni hmu mo? Israel in sûngkuahaiin thil porinche liantak tak an itho hi ni hmu mo? ki hmun irthiang rengata hlataka ki fe irhmang pat theina hrangin. Hi nêka thil porinche ual la hmu nôk zêl ni ti,” a tia.

⁷Khan, tualsûng tuallai mikota khan a ni hruaia; ki hei ena, banga khan ar ông ki hmu tâka.

⁸Khan, ama’n ki kuang, “Mihriam nâipa, bang ir-ông hi irzatir ro,” a ni tia. Ki hong irzatirin chu, inkhâr hi a lei oma.

⁹Ama’n ki kuang, “Lûtin lân, hitaka thilsual porinche an itho hi va en ro,” a ni tia.

¹⁰Khanchu, ki va lûta, thil intirom tak tak, mirûl illim hai, ramsa illimhai, Israel ibiak millim tinrêng chu banga khan irhîlin a lei chuanga.

¹¹Khan, an kôla khan Israel in sûngkuaa upahai laia mi sômsarihai chu an indinga, an laia khan Safana nâipa Jaazania an dinga, mi tinin mirimhoi hâlna an chôi chita, khan mirimhoi hâlna khû chu a suak hut huta.

¹²Khanchu ki kuang, “Mihriam nâipa, Israel in sûngkuaa upahaiin inrûka thil an itho hi ni hmu mo? Mi tinin mâni chontan chita millim an biak hi, RENGPA’N ni hmu ma, RENGPA’N ram hi a suaksan tâk kêng an ti,” tiin.

¹³“An thil tho intirom nôk ual dang la hmu nôk ni ti,” ki kuang a ti nôka.

¹⁴Hmâr tianga RENGPA in mikota khan a ni hruai nôka, kha khan nuhai an lei chapa, pathiannu Tamuz an lei châa.

¹⁵Ama’n ki kuang, “Mihriam nâipa, hi hi ni hmu mo? Hi nêka intirom ual an itho la hmu ni ti,” a tia.

¹⁶RENGPA khan in sûngrîl uala khan a ni hruaia, irngai ta, RENGPA in irthiang mikota khan tualbuk le maichâm kongkâra khan mi sômhni ringa vêl hi an lei oma. RENGPA in irthiang chu an hnung tiang irnghatin, an hmâihai chu nisua tiang an irheia, nisua tianga misa hong suak chu chubai an lei mûka!

¹⁷Ama’n ki kuang, “O mihriam nâipa, hi hi ni hmu mo? thil porinche an tho tâk hi? Juda in sûngkua ta hrangin thil intirom mo ni ma? ram chu thilsual porinchena’n a sipa, ki ninginmurtir hrangin an itho nôk a ni, en ro, an hnâra sûlhna an siaa.

¹⁸Khasikin, kei khomin ningmur takin ki itho hrang a ni; ki mitin irhmâi no ninga, inrenhai viat no ning; inring takin nin samhai khom sian irngai viat no ning,” a tia.