Read Hrangkhol DANIELA 12 Bible Online

DANIELA 12 - Hrangkhol bible

DANIELA 12

¹“Kha irzoi tena chu ni mipui nâihai san ngaitu, hruaitu roiinpuitak Mikaela kha ngîr a ta; buaina zoro, nam om phut ata, kha ni tena la om ngai loi kha, hong om a ta: kha nî tena chu ni mihai kha sansuakin om an ta, mi tin lekhabua irhming chuang murdihai chu.

²Khan an laia tamtak irnêng vâiphina zâlhai chu hong har nôk an ta, senkhat inzâna le senkhat chu kumtuanga hmumâkin.

³Hruaitu vârhai chu irvân vâr angin vâr an ta, mi tamtak felna tianga hong kîrhai chu ârsi angin kum kumtuangin vâr an ti.

⁴Khannisian nang o Daniela, thu kha thupin lân, lekhabu kha intukhak ro, a mong dênin; mi tamtak intânin, inhriatnahai hong pung a ti,” a tia.

⁵Keima Daniela hin ki hong ena, irngai ro, mi dang inhni an hong ngîra, inkhat chu tui kôina laia, a dang chu tui kôi loina tiang.

⁶khan mi tu’n mani, mi puan zerhmi sila irvo tuipui chunga om kuang khan, “Hi thil irkhêl mongna hrang hi, itika mo a ini hrang?” a tia.

⁷Khan mi puan zerhmi sila irvo tuipui chunga om khan, a kut chang tiang le vei tiang irvân tianga phar suakin, “Hunbi khat le a chînte, a chimrip sûnga hrang nih a ti; mi irthianghai sinthotheina chu an inkhoi zoi tena hi thil murdi hi irkip a ta; tia hring kumkhua sâmin khomâk a sâm tih kin hriata”.

⁸An hriat chu kin hriata, a’rngailam chu inhre ma ung: khanchu keima’n, “O RENGPA hi thilhai mongna chu itika mo a ini hrang?,” ki tia.

⁹Ama’n, “Daniela, fe’n lân, thu chu thup le chelkhak a ni ta, a mong dênin,

¹⁰mi tamtak chu an irthiangin an ivâr nôk a nia, an isa a ni; khannisian mi siathaiin chu sualin an la om mai, mi siathaiin ar ngai dân inhre no nihai; mi vârhaiin chu a’rngailam inhria an ti.

¹¹“Khan hâlirvôm thilinhlan omhai lâkpai a nia, chitna intirom inding nôk a nia irthokin, sûn sângkhat irzahni le sômkuak nih a ti.

¹²Nghâk za zâma sûn sângkhat irzathum sômthum ringa phâkhai chu la hoi pehai a ti.

¹³Khannisian nang chu mongna nî dênin fe’n lân; sûnhai hekna chu irngam a ta, ni man hrang dôra om ni ti,” a tia.