Read Hrangkhol DANIELA 2 Bible Online

DANIELA 2 - Hrangkhol bible

DANIELA 2

¹Nebukadnezara roirêl kum hninaa khan, Nebukadnezara’n irmang a neia; a lungrîl a buai pea, in thei loiin a oma.

²Khan rêngin a’rmang hrilfia hrangin dôitheihai, mitphil le tasân theihai Kaldai mihai koi hrangin thu a pêka. An honga, rêng kôla an ngîra.

³Rêngin an kuang khan, “Irmang ki neia, kha irmang inhria’nfel hrangin ki lungrîl a sôl zoi ta,” a tia.

⁴Khan, Kaldai mihaiin Aramaik chongin rêng kuang khan, “O rêngpa kumtuangin dam ro: ni’rmang chu ni siahlohai hi hrilin lân, a hrilfiana chu hrilhai kin ti,” an tia.

⁵Rêngin Kaldai mihai kha a donhaia, “Ki kuang ata thusuak sai a ni ta, irmang le a hrilfiana chu ki makunga nin inlangtir thei no’n chu sâtpai ni nin ta, nin inhai khom nimnok siana ni a ti.

⁶Irmang le a hrilfiana nin inlangin chu, keima ata thilpêk le lômman chôiirsângna roiinpui hmu nin ti. Khasikin irmang le a hrilfiana chu nin hril roi,” a tia.

⁷Anni’n hiang hin an sâma, “Rêngin kha irmang kha chu a siahlohaiin nin hrilhai sian, an entirna chu hrilhai kin ti,” an tia.

⁸Rêngin a sâma, “Zoro sôt lam vai kêng nin ingaitua ti kin hriat;

⁹keima ata chu thu a suak tâk khom nin inhriat, keima ata irmang khan nin inlang loina hrang dân inkhat vai a om; minlak hrila, ki kuanga hril hrang minlak le thu chanlamboi nin isin a ni; khasikin irmang kha ni hril roi, khanchu a hrilfiana khom nin entir thei nin tih ti inhria ki ti,” a tia.

¹⁰Khanchu Kaldai mihai khan rêng kuang, “Rêng ni inphûta entîrthei mi inkhat khom irnêng chunga hin om mahai: rênghai, ulianhai, roirêltu tûte’n hi thil hi dôi theihai, tasân theihai, Kaldai mihai la’rdon ngai mahai.

¹¹Khanchu rêng inphût hi thil intak a nia, taksa inlang theiloi mi pathianhai ti no’n chu a entir thei hrang tûte om mahai,” an tia.

¹²Khasikin rêng kha a ning an mur pea, a thang a tôm pe tâka; Babulon mi vâr murdi thatpai ving hrangin thu a pêka.

¹³Khanchu thupêk kha an sua tâka, mi vârhai chu that ni hrang an ni tâka; khan Daniela le a rualhai khom that hrangin an zonghaia.

¹⁴Khan Daniela’n Babulon mi vârhai that hranga hong suak, Arioka rêng hrungtu chu vâr takin hiang hin a sâma;

¹⁵Rêng hrungtu pâla hruaitu Arioka kuang khan, “Ithoa mo rêng thupêk chu kha dôra a irhnot?” tiin a va sâma. Arioka’n Daniela kha a hrila.

¹⁶Khanchu Daniela kha a lûta, rêng kha hrilfiana inentir hrangin hun inkian roi tih a ngêna.

¹⁷Khanchu Daniela chu in tiang a fea, a rualhai Hanania, Misaela le Azaria a hrilhaia.

¹⁸Babulon mi vâr danghai laia Daniela le a rualhai an irhmang loina hrangin hi thu’rthup chungchânga hin irvân Pathian kuang lungkhamna an zonga.

¹⁹Khanchu kha thu’rthup kha zân inlârnaa Daniela kuang a hor lang pea, Daniela’n irvân Pathian an pâk ta.

²⁰Daniela’n, Pathian irhming chu kumtuang dênin inpâkin om ri se: Vârna le sinthotheina khom a ta a ni sikin.

²¹Hunbihai le zorohai an danglam theia: rênghai a sonpai theia, rênghai an dettir thei: Mi vârhai kuang vârna a pêka; an hretheitu kuang inhriat theina a pêka.

²²Thil inthûk le thil irthuphai an langa: inthima om inhriatin, a kuanga vâr a pêk ngai.

²³O, ki’rchihai Pathian, vârna le theina ni petu, ni kuanga kin izong nin hriattirtu chu, Lômthu hril pumin nang kin pâk: Rêng thil chu ni nin hriattir tâk sikin ti a hrila.

²⁴Khanchu Daniela’n Babulon mi vârhai irhmangtir hranga rêngin a inkung Arioka kuang a fea, a kuang, “Babulon mi vârhai chu irhmangtirhai no ro: rêng kuang ni hruaiin lân, rêng kuang a hrilfiana inentir ki ti,” a va tia.

²⁵Khanchu Arioka’n Daniela kha irhnot takin rêng kuang a hruaia, “Juda sala om nâihai laia rêng kuanga a hrilfiana inhriattu mi inkhat ki hmu ta,” a tia.

²⁶Rêngin Daniela, ar hming Beltesazzara kuang khan, “Irmang ki nei nôka a omzia mo ni hril theiin?” a lei ti pea.

²⁷Daniela’n rêng kuang khan, “Thil irthup, rêng inhriat nuam tak chu, mi vârhai, kutzia en theihai, dôi theihai le tasân theihaiin rêng an ihrilfia pe theiloi;

²⁸khannisian thil irthup inpuangtu Pathian chu irvâna a oma, rêng Nebukadnezara hi thil la hong om hrang a inhriattir nuam a ni hi te. Ni’rmang le ni zâlhmuna inlârna omzia chu hiang hin a ni.

²⁹O, inlaltak, ni zâlhmuna thil la hong om hranghai ni’rngaituaa, thil irthup inpuang ngaitu’n thil la om hranghai nang a inhriattir a ni.

³⁰Keima hin mi danghai nêka fingna ki nei sika, hi thil irthup hi ki kuanga inpuang ni maka, rêng kuanga a hrilfiana inhriattir hrang vai a ni, ni lungrîla ni ingaituahai nin hriat theina hrang vaia a ni.

³¹O, inlaltak, ni hong tanga, irngai ro, millim roiinpuitak a oma. Kha millim lianpa, irtêk dûra om kha, ni kôla a ngîra; an lang dân khom phûkinthing om tak a ni.

³²Kha millim kha a lu rângachak irthiang tak a nia, a rôp le a bânhai chu sumru, a pum le a malpuihai chu dâr thîr,

³³a kehai chu thîr, a kezapha chu thîr le pil irzêl a nia.

³⁴Nangma’n chu lung, kuta sin suakna lâk hrang dân ni en laiin, millim khan a ke thîr le pila siam khan a hong dela, an khoi chita.

³⁵Khanchu, thîrhai le pil, dâr, sumru le rângachakhai a rêngin a koidara, misa lum laia hruizôla bu’rsi angin an om tâka: phâivua’n a sêm indarhaia, an omna hmun inhriat thei ni ta ma: millim deltu lung chu tâng liantak a chang tâka, irnêng a sip zita.

³⁶“Hi hi a ni, ni’rmang chu, a hrilfiana khom rêng kuang hin hril kin ti.

³⁷O inlaltak, nang chu rênghai rêng, irvân Pathianin ramhai, sinthotheinahai, hrâtnahai, roiinpuinahai a ipêk chu ni ni;

³⁸khasikin kho hmuna khom mihriam nâihai omna murdia, ramsa le vatêhai ten khom ni kuta a pêka, an rênga laia roirêl hrangin a pêk chu ni nia: rângachak lu chu nangma hi ni ni.

³⁹Khan ni hnunga hin ram dang mi nangma nêka chîn ual hong lian a ta; khan, dâr, ram inthumna irnêng murdia roirêl hrang chu om nôk a ta.

⁴⁰Khan, ram minlina chu thîr anga ngar om a ta; thîrin chu thil tinrêng a insiat thei angin, ama khom insiatin a idel indi hrang a ni.

⁴¹A kezapha le a’rzunghai chu bêl siamtu saihlûm, a sen a zâr thîr anga ni ihmu ang taka khan, ram irsen ni a ta, khannisian amaa khan an ngarna chu om mai a ti, thîr le pilhlûm irpol ni ihmu ang khan.

⁴²A kezapha tianga thîr le pilpok ni ihmu ang khan ram senkhat tiang a siat ol a ta, senkhat tiang siat loiin om a ti.

⁴³Thîr le pil irzêl ni ihmu khan, anni khom mihriam irchi irpol ni a ti. Khannisian thîr le pila irzêl tatak thei loi ang khan, irzêl thei lik no nihai.

⁴⁴Kha nia rênghai khan irvâna Pathianin ram zuan ding a ta, kha ram kha chu siat ta ngai no ni; an lalna khom mi danghai hrangin mâksan ni ta no ni; hi ram murdihai hi insiatin inhek zoi a ti, a ram chu kumtuangin inding mai ta a ti.

⁴⁵Tâng tianga lung, kut ni loia tuk suakin, thîr, dâr, saihlûm, sumru, le rângachakhai a siata ni ihmu ang khan, Pathian roiinpuitak khan rêng makunga hin nakana thil hong om hrang chu inpuang a ni: khanchu irmang kha a tak ngêta, a hrilfiana khom a diktak a ni,” a tia.

⁴⁶Khanchu, rêng Nebukadnezara chu a khûksadelin Daniela kha chubai a mûka, a kuanga thilinhlan le mirimhoihai inhlan hrangin thu a pêka.

⁴⁷Rêngin Daniela kuang khan, “Hi thilirthup ni inpuang theinaa hin, nin Pathian chu pathiante-hai Pathian, rênghai RENG, thilirthup inpuangtu a lei ini pial kêng a ini,” a tia.

⁴⁸Khanchu rêng khan Daniela kha a donsuia; thilpêk roiinpui tamtak a pêka, Babulon ram bial pumpuia roirêl hrang le Babulon mi vârhai murdi chunga a hruaitutak ni hrangin a sia tâka.

⁴⁹Khan Daniela izong angin rêng khan, Sadraka, Mesaka le Abednego-hai chu Babulon bial chungchânga hruaituin a siahaia, Daniela rêk chu inlaltak roirêlna khan a om ta.