Read Hrangkhol DANIELA 3 Bible Online

DANIELA 3 - Hrangkhol bible

DANIELA 3

¹Rêng Nebukadnezara’n rângachak millim, a’rsânglam mûk sômruk, a khang lian mûkruk a isiam, Babulon biala Dura phâizôla a siaa.

²Rêng Nebukadnezara’n Thuneituhai, a thûl theihaia, optuhai, roirêltuhai, sum enkoltuhai, le ar fûktirtuhai, le dân inhriat le a rama roirêltuhai murdi chu rêng Nebukadnezara millim siam ser hrang dân ngaituain an irbuka.

³Thuneituhai, aiôtuhai, optuhai, roirêltuhai, sum enkoltuhai, irfûktuhai, dân inhre mihai le ram bial hruaituhai murdi chu rêng Nebukadnezara millim siam sernaa khan an hong inkhôma, a millim siamna kôla an ngîra.

⁴Khan inring takin tâng an sama, “O, mi murdihaio, nam tin le chong tin hmanghaio.

⁵bekul hai, theihle hai, têngrep hai, serânda le rosem lianhai, irhâinei murdi’n ar hâi nin inhriatin chu rêng Nebukadnezara rângachak millim siam kha khûksadela chubai mûk hranga thupêk nin ni:

⁶mi tukhom khûksadela chubai mûk loi chu, kha zoroa zel khan kângirhmangna meipuia pai ni nin ti,” tiin.

⁷Khasikin mipui om murdi’n, bekul, theihle, têngrep, rosem le serânda le a dang irhâinei murdi irhâi an inhriatin, mi tin, nam tin, chong tinhaiin rêng Nebukadnezara millim siam chu khûksadelin chubai an mûk tâka.

⁸Kha zoro lai takin Kaldai mi senkhathai an hong nâia, Juda mihai an sêlhaia.

⁹Rêng Nebukadnezara kuang khan, “O inlaltak, kumtuangin dam sôt ro,

¹⁰Nangma’n, o inlaltak, mi tukhom bekul, theihle, perkhuang, rosem, têngrep le serânda irhâinei murdi’n khûksadelin millim chubai nin imûk hrang a ni:

¹¹tia tukhom khûksadela chubai mûk loi murdi hâlirvômna meipuia pai ni an tih tia thupêk nin suaa.

¹²Juda mi senkhat Babulon ram bial chungchânga hruaitua ni isiahai, Sadraka, Mesaka le Abednego hai kha an oma, hi mihai hin, o inlaltak ite bê’n nang an ibe pe loi a ni; ni pathianhai sintho loiin, ni rângachak millim siam chubai mûk nuam loiin,” tiin an hrila.

¹³Khanchu Nebukadnezara ningmur takin Sadraka, Mesaka le Abednego hai chu hong hruaihai hrangin thu a pêkhaia; khanchu hi mihai hi rêng kuanga khan an hong hruaihaia.

¹⁴Nebukadnezara’n an kuang, “O Sadraka, Mesaka le Abednego, ki pathian sintho loia, ki rângachak millim siam hi chubai mûk loi nin itum ma ni?

¹⁵Atûn hin bekul, theihle, perkhuang, rosem, têngrep le serânda irhâinei murdi an ringa khûksadela ki millim siam chubai nin la mûk hrangin chu la sa a ta; nin mûk nuam noa ni’n chu, kha zoro zel khan hâlirvômna meipuia lût nin ti; ki kut ata sansuak theitu pathian chu tu mo a ini hrang?” a tia.

¹⁶Sadraka, Mesaka le Abednego haiin hiang hin an sâma, “O Nebukadnezara, hi thu hin nang kin i sâm nang khomin ite inhre ma unga.

¹⁷Kin Pathian a sin kin itho pe khan hâlirvômna meipui ata ni sansuak thei a ni, ni kut ata, o inlaltak ni sansuak ngêt a ti, an tia.

¹⁸Khan ni no khomsian, o inlaltak ni pathianhai sin chu tho no ni ung, ni rângachak irlim siam khom chubai mûk no ni ung, ti hi inhre ro,” an tia.

¹⁹Khanchu Nebukadnezara chu a sân a ning an mur tâka, Sadraka, Mesaka le Abednego-hai ata kha a hmêl a danglam tâka; hâlirvômna meipui lak a tik danga nêka bâk saria hrâtin tho roi ti thu a pêkhaia.

²⁰Khanchu a sipaihai laia mi hrât inthanghai chu Sadraka, Mesaka le Abednego hai chu khitphiara hâlirvômna meipuia pai hrangin thu a pêka.

²¹Khanchu hi mihai hi an silkai puma khit phiarhaiin hâlirvômna meipuia an paihai tâka.

²²Khanchu rêng thupêk ar hnot sikin le hâlirvômna mei lak a hrât hrai sikin Sadraka, Mesaka le Abednego indomtuhai chu meidôn khan a kâng thathaia.

²³Hi mi inthum Sadraka, Mesaka le Abednego-hai hi khit pumin meipui laia khan an om raka.

²⁴Khanchu rêng Nebukadnezara’n a’rkhêl a ti tak taka, irhnot takin a thoia, ar fûkpuituhai kuang khan, “Mi inthumhai kha khitphiara meipui laia ei ipaihai mo ni ma?” a tia. Anni’n, “O inlaltak, ei ipai lûthai an ni,” an tia.

²⁵Ama’n, “Irngai roi, mi minli anga meipui laia irvêlin na tuang viat loiin ki hmu, minlina inlang lam len vâng chu vântîrtôn hmêl irput angin a om,” a tia.

²⁶Khanchu, Nebukadnezara chu hâlirvômna meipui mikot bula a hong nâia, “Sadraka, Mesaka le Abednego, nangni anchungtak Pathian suakhaio, hong suak unglân, hin hong roi,” tiin a chongpuihaia. Khanchu Sadraka, Mesaka le Abednego chu meipui lai ata an hong suaka.

²⁷Khanchu thuneituhai, ramoptuhai, ar fûkpuituhai le ar bukhai khan, hi mihai chunga hin mei sintho theina lua irdang loia, an sam mal lua kâng irkin loia, songkolhai khom a om balama om, mei mirim lua innam loiin an hmua.

²⁸Rêng Nebukadnezara’n thu a hrila “Sadraka, Mesaka le Abednego hai Pathian chu inpâkin om ri se; ama’n irvân tirtônhai a zuang tîra; a siahlo a sinthotuhai chu a sansuaka, kha mihai khan an Pathian ti no chu pathian dang sintho loiin, chubai khom mûk loiin, an taksa an inhlan ngama.

²⁹“Khasikin mi tin, nam tin, chong tinhaiin Sadraka, Mesaka le Abednego-hai Pathian chunga thil saloi hril murdi chu sâtpai ni an ta, an inhai khom insiat ni an tih ti thupêk ki siam nôk ta. Ama ang dôra sansuak theitu pathian dang rêng rêng om ta mahai,” a tia.

³⁰Khanchu rêng khan, Sadraka, Mesaka le Abednego-hai chu Babulon biala khan an liantirhai ta.