Read Hrangkhol DANIELA 5 Bible Online

DANIELA 5 - Hrangkhol bible

DANIELA 5

¹Khan zân khat chu rêng Belsazzara’n hruaithe mi sângkhathai hrang lian takin an thea; an kôla khan uain a ina.

²Belsazara’n uain a hon rui phol tena chu rângachak le sumrua bêl le bûrhai, a pa Nebukadnezara’n Jerusalem biak in ata a ilâksuak kha ama le a milianhai le a dôngmahai le a lâksîrhaiin uain inna hranga hong lâk hrangin thu a pêka.

³Khanchu rângachaka siam bêl le bûrhai, Jerusalema Pathian biak in ata lâksuak kha an hong chôia. Rêng le a milianhai, a dôngmahai le a lâksîrhai khan uain inna’n an hmang tâka.

⁴Uain inna in, rângachak, sumru, thîr, dâr, lunghaia siam pathianhai an chôiirsânghai dup dupa.

⁵Kha lai taka khan mihriam kutpâr hi a hong inlanga, rêng inbang chung meiser inkhâina kôla khan a’rziaka, rêng khan a’rziaktu kuttum kha a hmua.

⁶Rêng kha a hmêl a hong danglama, a lungrîl a buai pea, a ke kut irnak boiin a oma, a’rzalpui tâka.

⁷Rêng chu Mitvai dôithei Kaldai mi tasân theihai hruai hrangin a khêka. Rêng khan Babulon mi vârhai kuang; “Mi tukhom hi irziak hi tepa a hrilfiana ni hril thei chu puan senduk insiltir ni a ti, a ringa rângachak zîngziri inhlitir ni a ta, a ram sûnga roirêltu inthumhai laia thuneitu tak ni a ti,” tiin a hrila.

⁸Khan a mi vâr om dôrhai an hong lûta; khannisian a’rziak kha tep thei mahaia, a hrilfiana khom inhre loiin an oma.

⁹Rêng Belsazzara chu a sate’n chardongin a bôm nôka, a hmêl danglamin a oma, a mi lianhai khom an lung a zîng pehai u uala.

¹⁰Khan rêng le a mihai khêk irhâi khan rêngnu kha hruaithena ina a hong lûta; rêngnu khan, “O inlaltak kumtuangin dam ro; ni lungrîl inbuai no ro, ni hmêl khom danglam no ri se;

¹¹ni rama hin mi inkhat Pathian irtha irthiang nei mi a om; ni pa zoro lai ata, en theina, inhriat theina, vârna, Pathian vârna nei anga mi a om ti len hriat a ni tâka; o inlaltak ni pa rêng Nebukadnezara’n dôi theihai, kutzia en theihai, Kaldai mihai tasân theihai chunga hruaitua a lei isia a ni tâka;

¹²lungrîl feltak irput inhriatna, inhriat theina le irmang hrilfiana, thu intak inhriat theina, dôi sût theinahai chu Daniela rêngin Beltesazzara a itihna hmuna a om ti inhriat a lei ni tâka. Atûn hin Daniela chu koi ni sianlân, a hrilfiana chu ni hril pe thei a ti,” tiin a hrila.

¹³Khanchu Daniela kha rêng ina an hong hruaia, rêngin Daniela kha, “Daniela, Juda sala intânghai laia mi, ka pa inlaltakin Judai ram ata nang a hong ihruai kha mo ni ni?

¹⁴Nangmaa hin Pathian irtha a oma, en theinahai, inhriat theinahai, vârna sabîk ni nei ti inhriat a nia, ni thu ki len hriata.

¹⁵Atûn hi irziak hi tep le a hrilfiana nin hril hrangin tasân thei le mi vârhai an hong hruaihaia, khannisian a hrilfia thei om mahai.

¹⁶Nangma’n chu hrilfia thei ni ta, dôi khom ni sût thei ti ki len hriata; atûn hin ni theiin chu a’rziak hi tepin lân, a hrilfiana khom ni hril ro, khanchu puansenduk insiltir ni ni ta, ni ringa rângachak zîngziri inhlitirin om ni ta, hi rama roirêltu inthumhai laia thuneitu tak ni ni ti,” a tia.

¹⁷Khan Daniela’n, rêng kuang khan, “Ni thupêk chu nangma ta hrang ni sianlân, ni lômman chu mihai kuang pe ro; khannisian a’rziak hi chu rêng, nang tep pe ki ta, a hrilfiana khom a tia.

¹⁸O inlaltak, ni pa Nebukadnezara chu inchungtak Pathian khan an laltira, an liantirin a sân a iroiinpuitir tak tak a ni;

¹⁹liannatak a pêk sikin mi tin, nam tin, le chong tinhaiin an chia, a makunga an inthing ngaia; a inuam angin a thathaia, an hring theia, a inuamhai chôiirsângin, ar hnuaitirhai theia.

²⁰Khannisian a lungrîl irsongin, a milung a ngara, mualinphoiin a oma, a roiinpuina chu a lâkpai pea;

²¹mihriam nâihai lai ata inhnotsuakin a oma, a lungrîl khom ramsahai angin, a omna khom rama sakuartunghai laia a nia; sehrât angin hloisûl fâkin, a taksa chu irdo irsilin a oma: Pathian inchungtakin mihriamhai inlalna rama thu a neia, a inuam tak an luatir thei ti ar hriatsuak mâka chu.

²²Khan nang a nâipa, o Belsazzara hihai hi nin hriat khoma, ni lungrîl irhnuaitir loiin,

²³irvân Rêngpa nêkin ni lian uala, a ina bûr bêlhai ni lâka, nang le ni mi lianhai ni dôngma le ni lâksîrhaiin uain inna’n nin hmanga; sumruhai, rângachakhai, dâr le thîr, thinghaiin lunga isiam pathianhai hmu theiloi, irngai theiloi, inhre theiloi kha nin chôiindôma; khan Pathian ni hringna murdi a kuta omtu khom inzak loiin.

²⁴Khanchu ama ata kut irbu chu a hong tîra, hi hi a hong irziak a ni ta.

²⁵“Hi hi a thu irziak chu a ni: MENE, MENE, TEKEL ti le PARSIN ti a ni.

²⁶Khan a hrilfiana khom hi hi a ni; Mene ti chu nin lal zoro hrang ten a’rsinsiaa, a inmongtir hrang tihna a ni;

²⁷Tekel ti chu ivarh ni nia, chuk ta mak che tihna a ni.

²⁸Parsin ti chu ni ram hi sem darh a nia, Media le Persia kuanga pêk a nih tihna a ni,” a tia.

²⁹Khanchu Belsazara’n thu a pêka, Daniela chu puan senduk an siltira, a rama khan roirêltu inthum laia inkhat ni hrangin an puang tâka.

³⁰Kha ni zân khan Kaldai rêng Belsazzara chu that a ni ta.

³¹Khan Daria Midian mi khan ram chu a ilua a ni ta. Ama chu kum sômruk le kum hnia mi a ni.