Read Hrangkhol DANIELA 6 Bible Online

DANIELA 6 - Hrangkhol bible

DANIELA 6

¹Daria ram optu khan thunei hrang mi irzakhat sômhni, ram pumpuia siahai, a sa a tia.

²Anni laia mi inthum an kunghai nôka, an laia inkhat chu Daniela a ni, hi thuneituhai hin an thurchi inhriat an irhlet maiin, Daria’n ite siatna a nei loina hrang sikin.

³Daniela hi lungrîl diktak irput a ni sikin hruaitu le thuneituhai nêkin an lâr uala; rêng khomin ram pumpuia hruaitu ni hrangin an sâpa.

⁴Khanchu hruaitu le thuneituhaiin an inhriatin chu zoro’nchum an zonga, khannisian zoro inchum hmu thei loiin, a dik loina lak hmu loiin; a iamomzoi sikin, dik loina le sualna mi ni loi a nia.

⁵Kha tena chu hi mihai hin, “An Pathian dân thua hin ei hmu ta no’n chu, hi Daniela chunga hin zoro inchum hmu ta no ih,” an irtia.

⁶Khanchu hruaitu le thuneituhaiin rêng kuanga irbukin hiang hin an hrila. “Rêng Daria, kumkhua’n damin lân.

⁷Ram hruaituhai, thuneitu, ar fûktirtu le optu murdihai chu sûn sômthum sûnga, o inlaltak nang ti no’n chu pathian mo, mihriamhai kuanga zongna nei murdi chu kâmkeibaknei khura pai hrang, tiin rêng hin dân siamin khap sianlân, an irtia.

⁸Atûn hin, o inlaltak, khapna indetin lân, Media le Persia dân danglam loi ang khan irhming irziakin lân,” tiin.

⁹Khanchu rêng Daria khan a lekha irziaka khan ar hming a’rziak tâka.

¹⁰Daniela’n a thu irziak kha irhming irziak a ni tah ti an hriatin in sûnga a lûta, a itho ngai angin sûn khata voithum a khûksadela, a chongchaia, a Pathian kuang lômthu a hrila.

¹¹Khanchu hi mihai hi an inkhôma, Daniela’n a Pathian kuang zongna le ngênna a nei ngai ti an hmusuak tâka.

¹²Rêng kuang khan, rêng dân a ikhapna thu kha an hrila; “Sûn sômthum sûnga, o inlaltak, nangma kuang ti no’n chu pathian mo mihriam laia ite zongna nei loi hrang, a neitu chu kâmkeibaknei khura pai hrang tia dâna khan nir hming ni’rziak mo ni ma?” an tia. Rengin “Kha thil kha chu a det a ni, Media le Persia dân danglam ngai loi angin,” tiin a sâmhaia.

¹³Kha tena chu rêng kuanga khan, an tia. “Daniela Juda sala om nâihai laia mi khan, ni dân hi ite bêin bê maka, nir hming irziaknahai kha, a sûna voithum khûksadelin a chongchaia, a Pathian kuang,” an tia.

¹⁴Hi thu hi, rêngin an hriatin chu a poi a ti tak taka, Daniela chu sansuak hrangin sûn sôt a tuma.

¹⁵Hi mihai hin an hong irbuk nôka, rêng kuang khan, o inlaltak Media le Persia dânin khapna indanglam thei ni mah ti nin hriat, an tia.

¹⁶Khanchu rêng khan thu a pêkhaia, Daniela chu an hong hruaia, kâmkeibaknei khura an paia. Rêngin Daniela kuang, “Ni Pathian a sin ni itho pe maipu khan nang saninzôk a ti,” a tia.

¹⁷Khanchu lung an hong lâka, khur kotbâi kha an khâra; rêngin Daniela chungchâng hi a danglam loina hrangin ama kutsabi, a mi lianhai kutsabi leh irsin a pêka.

¹⁸Rêng kha a ina a fea, bu ngheiin zânkhua an vâra, thil irhâi nei om loiin, zâlna khom do loiin.

¹⁹Zînga chu rêng kha a thoia irhnot takin kâmkeibaknei khur tiang khan a fea.

²⁰Daniela omna khur a hong nâiin chu chap irhâiin an hriata, rêngin Daniela kuang khan, “O Daniela Pathian hring siahlo, ni Pathian a sin ni itho ngai khan kâmkeibaknei khur ata nang a inzôk thei mo?” a tia.

²¹Daniela’n rêng kuang khan, “O inlaltak, kumtuangin dam ro;

²²ki Pathianin a vântirtôn a zuang tîra, kâmkeibaknei hmûr ar chîptira, ite ni ti mahai, a mithmua hrilsiatna boiin ki oma, ni chunga khom ite insiat ual ma unga,” a tia.

²³Khanchu rêng kha a lôm tak taka, Daniela kha khur ata kêlsua hrangin thu a pêka, khanchu an lâksuaka, natna tuang viat loiin, Pathian a iamzoi sikin.

²⁴Khanchu rêngin thu a pêka, Daniela sêlhai kha an hong hruaihaia. Kâmkeibaknei khura khan an paihaia; an nâi le dôngmahai le kâmkeibakneihai khan an inthikhaia, inpet inpetin khur mong pha loiin an inhekpaihai ta.

²⁵Khanchu reng Daria’n, mi tin, nam tin, chong tin hmanga irnênga omhai laia khan lekha a’rziaka, “Nin chunga irngeina inpungin om ri se.

²⁶Ki ram op sûnga hin Daniela Pathian hi biakhai sian chi ri sehai, tiin thupêk ki siam. Ama chu Pathian hring a nia, a det kumkhuaa, a ram chu insiat thei ni no nia, a op khom a hek tenin op a ti.

²⁷Ama’n a saninzôka, a saninhringa, irnêng le irvâna irsinsiana le thil irkhêl a tho theia; ama hi kâmkeibaknei sinthotheina ata Daniela sansuaktu chu a ni,’ tiin.

²⁸Kha tena chu Daniela hi Daria roirêl lai le Persia mi Kura roirêl lai chu lam tinrênga a inchumtir tâk a ni.