Read Hrangkhol DANIELA 7 Bible Online

DANIELA 7 - Hrangkhol bible

DANIELA 7

¹Babulon rêng Belsazzara kum khatna khan Daniela’n irmang a neia, a zâlhmuna a ihmu chu, khan a’rmang chu a’rziaka, a tângpuiin an sîra.

²Daniela’n zân inlârna khan hmu ki neia, irngai ro, kôlkung minlia phâivua hi tuipui lian taka ang khan a hong hrânga.

³Khan tuipuia khan sa irkhêltak tak chi minli an hong suaka.

⁴Inkhatna kha chu kâmkeibaknei ang a nia, irmu mitha a neia, a mitha pharin, irnêng ata a phara, mihriam anga ke inhnia ngîr theiin siam a nia, mihriam lungrîl irput angin ki en chiana.

⁵Sa dang inhnina chu savom anga omin, hi tiang a kehai leh a ngîra, a bâia hin kângru inthum a oma, a sê khokhaia, thoiin lân taksa nei fa’n tam ro, tiin an hrila.

⁶Kha irzoiin chu ki ena, irngai ro, a dang kâmkeite anga om a hnung tiang va mitha nei minli angin a oma, ama hin lu khom minli a neia, a kuanga khan roirêlna pêk a nia.

⁷Kha zoia inlârna khan, irngai ro, sa minlina chu sa irkhêltak le ichiom tak ki hmu nôka; thîr ha roiinpuitak neia, a ei chut chuta, an pot thêrhaia, a ifâk mihliahai chu a sirphahaia: matona sa danghai nêkin chu danglam tak a nia, irki sômkhat nei a nia.

⁸A’rki omdân ki ngaituaa, irngai ro, an laia hin irki chînte a hong mônga, matona irki inthumhai chu a bulrêta rênin, ama irkia hin a mit, mihring mit ang hi a oma, bâi khom a neia, thil tamtak a hrila.

⁹Khan, ki thîr mai laiin, rêngtoihmun lei irdo diam hi a oma; kha rêngtoihmun inkhat chunga khan kumkhontuanga om maipu kha a hong toia. A tukrivo chu vur anga vâr a nia, a sam chu samul irthiang ang a nia: a rêngtoihmun chu meichok ang a nia, a tâli chu mei ikâng hrang ang a nia.

¹⁰Khatak ata kha mei a hong chok suaka, a sânga sângin a sin an thoa, a makunga khan a sîng a sîng têlin an ngîra, roirêlna kha a phut tâka, lekhabuhai a phên tâka.

¹¹Kha lai khan irki khan thu tamtak a hril sikin, ki hong ena, sa kha thatpaia, a taksa insiatin, meia hâl hrang dênin ki ena.

¹²Khan sa danghai thu kha chu, an roirêlna lâkpai pein an oma, an hringnahai chu irlokhat ten chu la hôi pe an nia.

¹³Zân inlârnaa khan irngai ro, vân sûmlâia zuang mi inkhat mihriam nâipa anga om ki hmua, kumtuanga om pa kuanga khan an hong hruaia.

¹⁴Roirêlna hai, roiinpuina hai, le ram hai a kuang pêk a nia, mi tin, nam tin le chong tinhaiin a sin an thôna hrangin; a roirêlna chu roirêlna det hek nî nei loia, a ram khom irhmang loi hrang a nia.

¹⁵Khan kei Daniela hi ki taksa chunga hin ki lungrîl a sôla, ki lua inlârna ki ihmuhai hin a nin buaia.

¹⁶A ngîrhai laia inkhat ki hong nâiin chu, an nihai laia thudik chu ki’rdona. khanchu a ni hrila, a thil hrilfiana khom kha a nin hriattira.

¹⁷Hi sahrâng roiinpui minlihai hi rêng minli irnênga hong suak hranghai chu an nia.

¹⁸Khannisian inchungtaka mi irthianghaiin ram chu chang an ta, kumtuangin kumkhontuanga ta hrangin.

¹⁹Khanchu sahrâng minlina, a danghai nêka danglam tak chu ichiom tak, a hahai khom thîr, a mitinhai chu dâr, fâk chût chûta inpotthêra, a ifâk ban chu sirphatu ata kha thutak inhriat ki nuama;

²⁰a lua irki sômkhat le irki dang hong suak, a matona inthum irtethai chungchâng le, kha irki mit nei thil tamtak hriltu, bâi neia an langdân khom a rual danghai nêka roiinpui ualhai leh khan.

²¹Ki en maia, ama irki khan mi irthianghai a doia, an hnêa;

²²kumkhontuang pa a honga, roirêlna chu inchungtaka mi irthianghai kuanga pêk a ni ta, mi irthianghaiin ram an dongtum zoro a hong phâk mân an hnêa.

²³Khan, hiang hin a tia: Sahrâng minlina chu irnêng chunga ram minlina ram danghai nêka danglam ual, irnêng pumpui fâk bu buana, chîla inpot hrang ni a ti.

²⁴Khan irki sômhai thu chu, hi ram ata hi rêng sômkhat la hong suak an ta; an hnunga inkhat hong suak a ta, matonahai nêkin danglam a ta, rêng inthumhai chu inhnêhai a ti.

²⁵Inchungtakpu doiin thu hril a ta, inchungtaka mi irthiang irzaltir a ta, hun le dânhai indanglam tum a ti, kum thum le a chimrip chu a kuta pêk ni a ti.

²⁶Khannisian roirêlna om a ta, a thuneina inboia insiat ving hrangin hruaipai ni a ti.

²⁷Khan ram le roirêlna, irvân pumpui hnuaia ram roiinpuina chu inchungtak mi irthianghai kuanga pêk ni a ti: a ram chu ramhlu a ni sikin, a iop ram murdi’n a sintho an ta, ama iam an ti.

²⁸Hi hi thil tin hekna nî chu a ni. Kei Daniela hi ki’rngaituanahai hin a nin buaia, ki hmêl ar paia, khannisian ki lungrîlin thil tinrêng ki vong mai ngai a ni.