Read Hrangkhol DANIELA 8 Bible Online

DANIELA 8 - Hrangkhol bible

DANIELA 8

¹Khan rêng Belsazzara roirêl kum thumnaa khan inlârna a voihnina chu ki hmua.

²kha inlârnaa hmu ki inei chu hiang hi a nia, ki hmu lai khan Elam biala Susan khopuia rêng ina ki oma; Ulai tui kôla ki oma,

³ki mit ki hong inlêngtira, ki hong ena, irngai ro, tui kôla khan kêlbelrachal irki inhni nei a ngîra; ar ki inhnihai chu an seia; inkhat kha a sei ual bîka, ar sâng ual kha a mông inhnung ual a nia.

⁴Belrachal khan hmâr le sim, nisua le nitâk irheiin ki hmua; a kôla sa dang om thei viat mahaia; a nuam ang takin a lênga, a liantak ki ni irtiin.

⁵Ki’rngaitua lai takin, irngai ro, nitâk tiang ata irthokin irnêng pumpui chunga hin kêlchal a hong pûta, irnêng khom tôn loiin; kha kêl khan a mit le mit kâr taka hin irki a neia.

⁶Belrachal irki inhni nei, irnênga ngîr ki ihmu kha a hong pana, a hrât thei dôra hrâtin a hong irzuana.

⁷Belrachal kha a’rtet rakin ki hmua, a ning an mur pe oka, belrachal kha a tâia, a’rki inhni kha an khiakpai pea, ama doi hrangin belrachal kha ite a hrâtna om pe ta maka; irnênga irtettirin a sirpha tâka, belrachal kha a sansuak thei tûte om mahaia.

⁸Kêlchalpa kha lian le hrât ar ti lai takin, a’rki roiinpuitak kha a kiak pea; ama irthûla khan irki dang inlâr ual minli, kôlkung minli irhîlin a hong suak nôka.

⁹Anni laia inkhat khan ar ki an cher pe nôka, sim le nisua tianga irkiin, ram roiinpui tiang a sate’n a’rzata.

¹⁰Irvâna omhai phâk rakin a liana, ârsihai khom hnuaia an thâkpaihai theia, a sirphahaia.

¹¹Kha hmuna omhai rêng angin a liana, hâlirvôm thilinhlan omhai chu a lâkpai pea, a hmun irthiang omna chu inramin a oma.

¹²Khahai omna hâlirvôm thilinhlan hong om ngai siatna sikin, a kuanga pêk a ni ta; thutak chu irnênga a paia, khaanga tho’n, hlo a chuk pea.

¹³Khanchu, vântirtôn inkhat hin vântirtôn dang kuang hianga ar don hi kin hriata, “I dôr ten mo hi inlârnaa thil hmua omhai hi a iom hrang? I dôr ten mo sualna hin a ni tina thilinhlanhai hmun hi a ilâk mai hrang? I dôr ten mo irvân sipaihai leh hi tempil hi sirbea a iom hrang?” tiin.

¹⁴Khan vântirtôn dang iti hi kin hriata, “Sûn sânghni irzathum sûng chu om mai a ta, kha sûng rêng rênga chu zîng tiang le khohloi tiang thilinhlan inhlan ni no ni. Khanchu tempil chu irthiangtir ni nôk a ti,” tiin.

¹⁵Khanchu hiang hi a nia, kei Daniela hin inlârna hmuin a omzia inhriat ki tuma; irngai ro, ki kôla hin mihriam anga ngîr ki hmua.

¹⁶Ulai tui kama mihriam irhâi, “Gabriela inlârna chu ama mi hi inhre thiamtir ro,” tia a hong insam kin hriata.

¹⁷Khanchu ki ngîrna tiang a zuang nâia; a sân ki lei chia, ki’rtet raka; khannisian ama’n “O mihriam nâipa, inhre thiam ro, inlârna chu zoro hekna hrang a nia,” a tia.

¹⁸A ni chongpui lai hin ki lei izâl pial a nia, a ni hon thema, a nin ngîrtira.

¹⁹Ama’n, “Irngai ro, ningmurna hnungkhôna thil hong om hranghai chu nan hril ki ta; zoro hekna lei inkung a ni tâk sikin.

²⁰“Belrachal irki inhni nei ni ihmu kha Media le Persia rêng an nia,

²¹kêlchal irmulpa kha chu Grik rêng a ni; a mit kâra irki kha chu rêng masatak a nia,

²²khan irki kiakna hmuna minli hong suak kha chu, kha nam ata kha ram minli la hong ngîr suak a tih tihna a ni, a sinthotheinahai leh ni loiin.

²³“Khan an inlalna zoro hnungkhôn tianga insiatna irkhêl an phâk tena chu, rêng hmêl ichiom tak thu intak hril thei mi la suak a ti.

²⁴A thuneina hrât tak ni a ta, ama sinthotheina ringot ni loiin; irkhêl takin insiat a ta, hlochuk a ta, mi hrâthai le irthianghai chu insiat a ti.

²⁵Khan a sintho dân sikin vâr irletna a kuta hlochuk a ta, a lungrîla irsong a ta, lungthia an om laiin tamtak insiat a ti: Rênghai rêng doi a ta, khannisian kut leh ni loiin inkhiakin om a ti.

²⁶Khan zîng le khohloia inlârna ihrilhai kha a dik a ni; khannisian inlârna chu zoro hnungkhôna hrang a nih ti inhren lân,” a tia.

²⁷Kei Daniela hi ki’rzal tâka, idôr sûn mani dam loiin ki oma, ki thoia, rêng sin ki tho ta, inlârna chu a’rkhêl ki tia, khannisian tûte’n inhrethiam mahai.