Read Hrangkhol HOSEA 10 Bible Online

HOSEA 10 - Hrangkhol bible

HOSEA 10

¹Israel chu grep hrui hong indôn satak, ra nuam tak ang a nia; a ra a itam ang dênin a maichâmhai an pungtira; a ram satzia ang dênin lung incher (millim) phun satak tak a siama.

²A sûngril kha irsentirin a oma, atûn chu thiamloi changin om ta an ti. An maichâmhai kha RENGPA’N zêm insim a ta, an lung incher phunhai kha insiat a ti.

³“Reng taktak chu nei mak me, RENGPA chu chi mak mea; kha rêng khan imo a ni itho pe thei hrang?” tiin, atûn hin chu hril ngêt ta an ti.

⁴Thuthung an siamna tianga khan milaka khomâksâmin thu chanlamboi an hrila; khasikin, irnêng tukirletna (kodâl) sûlhring tûr nei a imông angin, roirêlna a ipung a ni.

⁵Samari rama lênghai kha Bethaven sehrâtte sika khan chardongin om an ta. Ama ata a irhmang tâk angin khataka mihai kha an chardong a ta, khataka ochaihai a roiinpuina chunga la lôm ngaihai khom.

⁶Ama ngêt khom kha inlaltak Jareba kuanga pêk hrangin Assuria rama rotpui ni a ti. Efraima khan inzakna hmu a ta, Israel khan ama thu’nkung ngêt kha inzakpui a ti.

⁷Samari ram lak kha, tui chunga thing ôn a itân ang dênin an rêng kha inboipai a nia.

⁸Israel sualna Aven hmun irsânghai khom kha insiat ni a ta. An maichâmhai khan sûl le hloi ilhlingnei hong mông a ta; tâng kuanga khan, nir khû roh, ti an ta, mual kuanga khan, ni del roh ti an ti.

⁹O Israel, Gibea nikhua ata kha ni isual ni isual a ni: khataka khan nin la sunzoma; tho’nsualna nâihai chunga doina khan Gibea ngêta khan nang a irzûl phâk loi hrang mo?

¹⁰Ki nuam tika chu anni kha hrem ki ta; khan, an tho’nsualna irthuahni sika hrem an ni tika chu an chunga mipuihai kha pungkhôm an ti.

¹¹Khan, Efraima kha sehrât irla irchûtir tâk, bu chîl irzuk tâk a nia; khannisian keima ngêtin a ring enhoi taka khan ringkol irbuntir ta ki ta, Efraima chunga mi inchuangtir ki ta, Juda khom khan irnêng choiirlet a ta, Jakoba khan a’rnêng tanghai kha indartir zit a ti.

¹²Mâni ta hrangin felna tû unglân, lungkhamna ât roi; nin irnêng hoihai choiirlet unglân, RENGPA zong zoro a nia, a honga satvurna nangni a vur mâka chu.

¹³Khannisian sualna nin tua, tho’nsualna nin âta; nin milak ra nin idong a ni.

¹⁴Khasika khan ni mihai laia buai mur murna hong suak a ta, Salmona khan irdoi nikhuaa Beth-arbel a insiattir ang khan, ni kul murdihai kha insiat ni a ta; nu chu a nâihai le pai inthekin an iom a ni.

¹⁵Nangni Bethel mihaio, nin sual irkhêl tak sikin kha thil kha nin chunga zuang tung hrang a ni. Israel rêng khom kôlirsal mân thi a ti.