Read Hrangkhol HOSEA 12 Bible Online

HOSEA 12 - Hrangkhol bible

HOSEA 12

¹Efraima khan phâivua a iama, nisua phâivua khan a zui ngaia; milak thu le irsen indarna thu an pungtir sit sita, Assuria leh thu an inkunga, Aigupta tiang khan hriak a pêl lûta.

²RENGPA khan Juda chunga khom hnôlna hrang a nei saa, Jakoba chu a omdân zia ang dênin hrem a ti; a thiltho ang zia dênin thuanin.

³Sula khom khan a urêngpa kha a ke ârtui a hong chela, a hong puihling khan Pathian kha a beia.

⁴A ni, vântirtôn a beia, an hnê tâka; a chapa, ditsakna a ngêna; Bethel hmuna khan ama a hmu tâka, kha khan ki kuang thu an sîra.

⁵RENGPA ngei, sipaihai Pathian kha, RENGPA ti kha a irsinsia a ni.

⁶Khanchu, nangin chu ni Pathian kuang tiang irheiin lân, lungkhamna le roirêlna hmangin lân, ni Pathiana khan irnghat mai roh.

⁷Kanaan-hai angin Israel khan vârna dik loi an leka, ihuang ringot a irzuk ngai a ni.

⁸Efraima khan, ki’rchong ok ta, hlo ki chuk ta a ni: ki sintho murdihaia lak chu keimaa siatna thil sual an ihmu hrang om viat ta mah, a tia.

⁹Khannisian, kei hi Aigupta ram ata kha RENGPA ni Pathian ki nia, kût zoro lai ang khan puan ina nang ki la inomtir hrang a ni.

¹⁰Deipuhai kuanga khom thu kin sîr ngaia, inlârnahai kin pungtira; Deipuhai hmangin ki lei hala.

¹¹Gilead kha pualoina a ini loi ma ni? ite ni loi chian an ini kêng; Gilgal-a khan sehrâtchal an inhlan ngaia; a ni, an maichâmhai kha irnêng tuk irlet châng kuanga lung dêng khôm ang chian an ni.

¹²Jakoba kha Arama rama khan an tân pata, Israel khan dôngma man a tuam tâka; dôngma man hrang khan belra a ienkol a ni.

¹³Deipu hmangin Israel kha Aigupta irthokin RENGPA’N a hruaisuaka; deipu dên hmang khan a sûnghual saa.

¹⁴Efraima lak khan a ninginmur tak taka, khasikin a thisen insua kha ama chunga a chum tâka. A hrilsiatna kha ama chunga RENGPA’N inchumtir a ti.