Read Hrangkhol HOSEA 13 Bible Online

HOSEA 13 - Hrangkhol bible

HOSEA 13

¹Efraima’n thu a hrilin chu inthingna hrang dôr a dên rak ngai, Israel mihai laia chu irngai roiinpui tak a lei ni ngai. Baal kuanga a tûk tena hin chu a ithi tâk a ni.

²Atûn khom hin an sualtir ual ual tâka, an tangkarua’n millim sûnna’n an irsiam chopa, anni ngaidân angzia zêla millim kha; khahai murdi kha kut theithiamhai kut suak a ni pumin, irbôlna inhlantu murdihai khan sehrât têhai kha tum ri se, an ti ngai.

³Khasikin, zînga sûmpui ang le irdo inrang taka boi nôk ngai anghai, hruizôla bu’rsi, kêllaiherin a isêm irhmang ang hai, meikhu suakna meikhu anghai ni an ti.

⁴Kei rêk hi chu Aigupta ram ata kha, RENGPA ni Pathian kha ki nia, kei ti no chu Pathian dang inhre ngai mak chea, keima ti no hi chu saninhringtu dang om mahai.

⁵Ramchâr irkhêl tak ramchâra nang chongpui ngaitu kha ki nia.

⁶An fâk hrang tena chu an khopa, an ikhop kha an milungin a lâlirpâk puia, khanchu a ni irnghil tâk a ni.

⁷Khasikin an ta hrangin kâmkeibaknei ang ki ni, kâmkeite angin lam laia anni kha inruang ki ti.

⁸Savomte inchân angin anni kha bei ki ta, an milung tuamtuhai kha kai thêr zit ki ta, kha hmuna khan kâmkeibaknei angin anni kha fa zoi ki ti; ramsahai khan an ikai darh zoi hrang a ni.

⁹O Israel, nangma changpuitu ni doi hi ni siatna a ni e.

¹⁰Ni khopui murdia saninzôk theitu hrang kha, ni rêng kha atûn hin khôn mo a iom? Reng le hruaituhai ni pe ro, ni iti hai, ni roirêltuhai kha khôn mo?

¹¹Ki ninginmurna rêng nang ki pêk, ki ninginmur ki lâkpai nôk tâk a ni.

¹²Efraima pualoina kha bukkhôm a ni, a sualna kha siakhôm a ni.

¹³Nupang nâiha irvei chardongna ang kha a chunga zuang tung a ti: ama kha nâipa vâr loitak a nia, a zoro taka nâi hong suakna hmuna om mah.

¹⁴Seol kut ata anni kha ki irtan hrang ma ni? Thina ata ki isansuak hrang ma ni? O thina, ni hripuihai kha khôn mo a iom? O sual, ni thân kha khôn mo om? lung nang inkham viat no ning, irlet khomsian uksak no ning.

¹⁵A urênghai laia irhniang tak ni khomsian, nisua tianga phâivua hong pût a ta, ramchâr ata RENGPA itho ngêt kha a zuang lai tak a ni; a tuihnârhai kha kang a ta, a tuikuanghai kha châr zoi a ti. Bêlbûr sa murdi, a châr kha insiat zit a ta.

¹⁶Samaria ram ata a Pathian chunga tehel a zonga, khandaia intûktirin om an ta, an nâitesenhai kha pai inthek zit ni an ta, an nupang, nâivong laihai kha kaithêr ni an ti.