Read Hrangkhol HOSEA 5 Bible Online

HOSEA 5 - Hrangkhol bible

HOSEA 5

¹O nangni, ochaihaio, hi hi inhre unglân, nangni Israel sûngkuahaio, irngai unglân, o inlaltak sûngkuahaio, mikuar sung roi, roirêlna kha nin ta hrangin a nia; Mizpa châng le Tabor tânga lên inzar nin ni sikin.

²Mi tehelhai khan thatpai an uar tak taka, kei rêkin chu an rênga halirchutu ki ni.

³Efraima kin hriat, Israel kha keima ata thup ni mah; atûn hin o Efraim, notizuar ni uar sikin Israel kha porinchetir a ni.

⁴An Pathian tiang irheitir hrangin, an thilthohai kha masan mahaia, notizuar lungrîl an laia a iom a ni, RENGPA kha an inhriat thei loi a ni.

⁵Israel kôkpoploihai khan a makunga an inhriattira, khanchu Israel le Efraima kha an pualoinaa tûk an ta, Juda khom an kuang tûk sa a ti.

⁶An belra pâlhai le an sehrât pâlhai le RENGPA zong hrangin fe an ta, khannisianlân ama kha chu hmu no nihai, anni ata a irkiang tâk a ni.

⁷RENGPA chunga vâr irlet takin an ichai a ni, nam dang nâihai an neia; tha thar khan an loihai le ileh irhmangna tung a ti.

⁸Gibia khuaa bekul tum unglân, Rama khuaa bekul mût roi; Bethaven-a khêk mur mur roi, o, Benjamina, ni hnung tiang kha, tiin.

⁹Efraima kha hremna nikhuaa khan inram ni a ta: thil hong ni ngêt hrang kha Israel irchihai laia kin hriattir tâk a ni.

¹⁰Juda milianhai kha ramri sontuhai ang an nia; an chunga ki ninginmurna kha tui angin bunthuan ki ti.

¹¹Efraima khan sirbe a uara, dikna a paltana, ite ni loi a’rzûla.

¹²Khasikin Efraima hrangin irthî ang ki nia, Juda sûngkua ta hrangin hmonna ang ki ni.

¹³Efraima khan a natna a hmua, Juda khan a pop a hmua. Kha khan Efraima kha Assuria kuang a fea, inlaltak Jareba kuanga khan mi a tîra: khannisianlân ama khan nangni indamtir thei maka, nin ipop kha nangni a indamtir thei sa loi a ni.

¹⁴Efraima hrangin chu kâmkeibaknei ang, Juda hrangin chu kâmkeibaknei vânglai ang ki ini hrang a nia; keima, keima ngeiin kaithêr ki ta, fe ki ta, rotpui ki ta, sansuaktu tûte om no nihai.

¹⁵An thiam loina an irhriata, ki hmêl an zong mâka chu, fe ki ta, ki hmun tiang kîr ki ta, an tuangna khan ni zong an ta, hiang hin ti an ti.