Read Hrangkhol JOELA 1 Bible Online

JOELA 1 - Hrangkhol bible

JOELA 1

¹Pethuela nâipa Joela kuang RENGPA thu zuang tung kha.

²Putarhaio, hi hi inhre roi, hi rama om murdihaio, nin mikuar sung roi. Hi hi, nin zoro lai le nin puhai zoro lai khomin a om ta ngai mo?

³Kha kha nin nâihai hrilhai unglân, nin nâihai khan an nâihai hril sianlân, an nâi nôkhai khan irlo dang hril nôk thiai ri sehai.

⁴Thing irnge irlungin a ifâk mihlia murdi chu khâihmimsein a fâka; khaihmimse’n a ifâk mihlia murdi chu irlungin a fâk zoi, thing irnge’n a ifâk ban ka kai kha irlungin a fâk zoi.

⁵Inruihaio, har unglân, chap roi; uain in murdihaio, a uain thum sika khan khêk rak rak roi; nin bâi ata lapai a ni tâk sikin.

⁶Nam hrât tak, tep zoiloi, ki rama a zuang suak tâka, a hâ chu kâmkeibaknei hâ ang a nia, kâmkeibaknei lian tak hapui ang a inei sa a ni.

⁷Ki grep hrui an siattira, ki theipui thing hôk a khêt infâi zita, a pai irhmanga; a ônhai khom a khêt invâr zoi ta.

⁸Dôngmate’n, bora puan boma, a sat lai pasal a isûn angin chap rak rak roi.

⁹Baidi inhlanhai, in hranga inhlanhai kha RENGPA in ata inboi a nia; ochai, RENGPA sinthotuhai kha an char a donga.

¹⁰Loi kha insiat a nia, ram khan a charindonga; bu kha insiat a nia, uain thar kha a kanga, hriak kha a châra.

¹¹O nangni, loi neituhaio, inzak unglân; o nangni, grep hrui enkoltuhaio, bu le faôi sikin khêk rak rak roi; loia bu ât hrang kha ar hmang tâk sikin.

¹²Grep hrui kha a thêma, theipui kung kha a châra; dalim thei kunghai, tûmhai le apple thei kunghai, loia thing murdihai khom kha a chuai tâka; mihriam nâihai laia lômna kha a chuai irhmang tâka.

¹³Nangni ochaihaio, bora puan sil unglân, chap roi; nangni, maichâm sinthotuhaio, khêk rak rak roi; nangni ki Pathian sinthotuhaio, hong unglân, bora puan silin zân sôtin zâl roi: nin Pathian in ata kha baidi inhlan le in hranga inhlan kha khap a nia.

¹⁴Bu nghei zoro ser irthiang unglân, inkhômpui ir-up siam unglân, RENGPA nin Pathian ina khan putarhai le hi rama lêng murdihai kha hruaikhôm unglân, RENGPA kha insam roi.

¹⁵Kha nikhua kha a chung a rike! RENGPA nikhua kha anai tâka, Itinrêng thotheitu ata irhmangna ang zuang tung a ti.

¹⁶Ei mithmua fâk hrang inboi a ini loi ma ni, a ni, ei lômna le ei lômna kha ei Pathian in ata inboipai a ini loi ma ni?

¹⁷Chîmuhai kha irnêng châr hnuaihaia khan a hmona; panghai kha a rama, fasiarhai kha insiatin a oma; a bu kha a thêm tâk sikin.

¹⁸Sial le lôihai kha an inrûm bâka na! sehrât pâlhai kha an char a donga, sûlhring hmun an nei no sikin; a ni, belra rualhai kha an chapa.

¹⁹O, RENGPA, nang kin sama: mei khan ramchâr ram hloisûl hmun kha a kâng zit tâka, mei dôn khan rama thing murdi kha a kâng fâi zit tâka.

²⁰A ni, ramsahai kha nangma irngaiin an inphu huan huan a ni: vadungtehai kha a kang zoi tâka, mei khan ramchâr ram hloisûl hmun kha a kâng fâi zit tâk a ni.