Read Hrangkhol JOELA 2 Bible Online

JOELA 2 - Hrangkhol bible

JOELA 2

¹Zion-a khan bekul tum unglân, ki tâng irthianga khan râl irdîpna inpuang roi; hi ram sûnga mi murdihai kha inthing ri sehai: RENGPA nikhua kha a zuang tung thiaia, a inâi tâk a ni;

²inthimna le khor-uina nikhua, inthimna le khor-ui, sûm zîng le izîng irsa khak angin mi huaisen tamtak pâl la hmu ngai loi, itiklai khoma hmu nôk ta loi hrang hong pût an ta, tâng kha kôlirsal ituam angin hong tuam an ti.

³An maton tiang le hnung tiang kha a kâng fâi thiaia; an hmabâk ram kha Eden irhuan ang ni khomsian, an khêl hnung chu ramchâr ram chârkhohroi a ni thiaia, ite hôi nei mahai.

⁴An inlang dân chu sakor inlang lam dân ang a nia; sakora chuang mi angin an intân a ni.

⁵Irdoina tâli irhâi angin tâng chunga an irchôm mer mura, fapôl kâng chok luai luai ang le irdoinaa mipui hrât tak irsiam diam angin.

⁶An matona mipuihai kha an kamanga: an hmêlhai kha a hong dông zita.

⁷Mi hrât tak angin an intâna; irdoi mi angin banga an lôna; mâni irdîn senga an fea, an irtâng dân buai mahai.

⁸Irhneng ual loiin; mâni lampuia fe senga: hriamhreihai an paltana, lôi mahai.

⁹Khopui chunga an irchôma; kul chunga an intâna; in sûnghaia an lôn kâia; inru angin tukverhaia an lûta.

¹⁰An makunga irnêng an thinga; irvânhai an hnînga; misa le tha an thima, ârsihaiin an vâr an thupa:

¹¹Khan, RENGPA khan a sipai rualhai makunga ar hâi an suaa; a riakbukhai kha a sân a roiinpuia; a thu zômtuhai chu sinthothei tak an ni; RENGPA nikhua kha a roiinpuiin ar khêl tak taka; tu’n mo tuang thei hrang?

¹²RENGPA khan, “Khaang ten khomin atûn nin milung murdi’n, bu ngheiin, chapin, chardongin ki tiang hong irhei unglân:

¹³nin puan ni loiin nin milung thêr unglân, RENGPA nin Pathian tiang khan irhei roi: ama kha lunginkham thei tak le inrennaa sip, milung irnêm le khonzâna nei intam, thil saloi ata hong kîr ngai a ni,” a tia.

¹⁴RENGPA nin Pathian kuang baidi inhlan le in hranga inhlanhai khom khan, kîrin, lungrîl irhei kîrin, satvurna mâksanin om no nih ti tu’n mo an hriat?

¹⁵Zion-a khan bekul tum unglân, bu nghei zoro ser irthiang unglân, inkhômpui ir-up tak siam unglân:

¹⁶mipuihai buk unglân, inkhômhai kha irthiangtir unglân, putarhai, nâipanghai, irhnu nêk laihai buk unglân: moi neitu khom a chontan ata hong suak sianlân, moi khom a chontan sûngrîl ata hong suak ri se.

¹⁷Ochai, RENGPA sinthotuhai kha, bokrop le maichâm kâra khan chaphai sianlân; “O RENGPA, ni mihai hôiin lân, nir chonhai hi hrilsiata oma namhaiin an chunga roirêl pehai hrangin pe no roh: ‘An pathian kha khôn mo a om tâk’, tiin mipuihai laia khan ithoa mo an iti hrang?” ti ri se.

¹⁸RENGPA khan a ram kha a uksaka, a mihai lung a inkham a ni.

¹⁹RENGPA khan a mihai kuang, “Irngai unglân, nin kuang bu hai, uain hai, hriak hai zuang intung ki ta, kha khan, khop nin ta: namhai laia khan hrilsiatin nangni inomtir viat no ning:

²⁰aniachu, nin kuang ata hmâr tiang ata zuang mi huaisenhai pâl kha irzûlpai zit ki ta; ramchâr le chiaia infetir ki ti, a masa pâl nitâk tianga tuipuia, inhnung inta pâl thang tianga tuikhangliana; hong innam suak a ta, mirim se takin hong innam a ti, thil irkhêltak a tho tâk sikin, tiin a sâma.

²¹O ram, chi no’n lân, raifânin lôm ro; RENGPA khan thil roiinpui takhai a tho tâk a ni.

²²Sahaio, chi no roi; ramchâr hloisûl hmun a hong inchera, thing kha a hong raa, theipui kung le Grep hruihai kha an hong indôn a ni.

²³Nangni, Zion nâihaio, lôm roi, RENGPA nin Pathiana khan raiinfân roi: rotui masa kha a ruk bakin nangni a pêka, nin ta hrangin rua an thotira, tha khatnaa rua masa le rua hnungkhôn kha.

²⁴Hruizôlhai kha buin sip a ta, uain le hriak khurhai kha sip lêt a ti.

²⁵Nin laia ki sipai rual tamtak ki tîr, khâihmimse hai, thing irnge hai, longak hai, thing irnge longakhaiin an ifâk zoi kumhai kha nangni thuan nôk ki ti.

²⁶Tam tak fa nin ta, khop nin ti, irkhêl taka nangni ngaitua ngaitu RENGPA nin Pathian irhming kha inpâk nin ta: ki mihai chu mualinphoi viat viat no nihai.

²⁷Khan, Israelhai laia ki om ti le RENGPA nin Pathian ki nia, tûte dang om mahai ti inhria nin ti: ki mihai chu mualinphoi viat ta no nihai.

²⁸Kha zoi tika chu hiang hin ni a ta, mi murdi chunga ki’rtha buak ki ta; khanchu nin nâipahai, nin nâinuhaiin ki thu hril an ta, nin putarhaiin irmanga phan an ta, nin ruathartehaiin inlârnahai hmu an ta:

²⁹kha nikhuahaia khan ki suakpahai, ki suaknuhai chunga khom ki’rtha buak ki ti.

³⁰Irvâna le irnênga thilirkhêlhai irhmutir ki ta, thisen hai, mei hai, meikhu inding hai leh.

³¹Misa inthim a ta, tha thisena chang a ta, RENGPA nikhua roiinpui tak le irkhêltak kha a zuang tung mân.

³²Khan, hiang hin ni a ta, tukhom RENGPA irhming irlam murdi chu saninzôk ni an ta: RENGPA’N a insîr angin intân suakhai kha Zion tânga le Jerusalem khuaa om an ta, a la om sunhai laia khan RENGPA’N a ikoihai chu om an ti.