Read Hrangkhol AMOSA 1 Bible Online

AMOSA 1 - Hrangkhol bible

AMOSA 1

¹Juda rêng Uzia inlal lai le Israel rêng Joasa nâipa Jeroboama inlal laia, hnîngnu mâna kum hnina khan, Tekoa sâ rual enkoltu laia om Amosa’n thu Israel chungchânga a ihmu chu.

²Khan, ama khan “RENGPA kha Zion tâng ata inrûm dur dur a ta, Jerusalem khua ata ar hâi suak a ta; belra enkoltuhai sâ lêngna hmunhai kha an char a idong a ni, Karmel tâng sîp kha châr a ta,” a tia.

³RENGPA’N hiang hin a ti: Damaska khua tho’nchâina inthum sikin a ni, minli sikin, a hremna kha inboi no ning. Gilead ram kha bu nôina thîrhai khan an nôi sikin;

⁴Khannisianlân Hazaela ina mei tîr ki ta, Benhadada rêng inhai kâng zoi a ti.

⁵Damaska khuaa mikot thîr kha inkhiak ki ta, Aven irhôr ata a luatuhai le Eden in ata rêng khianghrol chôitu kha inboi ki ta; khan Suria ram mihai kha Kir rama suaka om an ti, RENGPA’N a ti.

⁶RENGPA khan hiang hin a ti: Gaza khua tho’nchâina inthum sikin, a ni minli sikin, a hremna kha inboi no ning; Edom kuanga pêk hrangin mi murdi suaka an hruai sikin:

⁷Khannisianlân Gaza khua kul chunga mei tîr ki ta, a rêng inhai kha kâng zoi a ti:

⁸Khan, Asdod khua ata a luatu le Askelon khua ata rêng khianghrol chôitu inboipai ki ti; khan, Ekron khua chunga ki kut irlek ki ta, Khan, Filistia mi la omhai kha inboi ki ta, RENGPA PATHIAN khan a ti.

⁹RENGPA’N hiang hin a ti: “Tura khua tho’nchâina inthum sikin a ni, minli sikin, a hremna kha inboi no ning; Edom kuang mi murdi kha an pêka, ir-urêngna thu an intung kha an inhriat mai no sikin:

¹⁰Khannisianlân Tura kho kul chunga mei tîr ki ta, a rêng inhai kha kâng zoi a ti,” a tia.

¹¹RENGPA’N hiang hin a ti, “Edom mihai tho’nchâina inthum sikin, a ni, minli sikin, a hremna kha inboi no ning; a urêng kha khandaiin a’rzûla, a lungkhamna murdi a pai irhmanga, a ninginmurna khan an potthêr mai hena, kumkhuaa a ninginmurna kha a vong chian sikin;

¹²Khannisianlân Temana hmun chunga mei tîr ki ta, Bozra khua rêng inhai kha kâng zoi a ti,” a tia.

¹³RENGPA’N hiang hin a ti, “Amon nâihai tho’nchâina inthum sikin, a ni, minli sikin, a hremna kha inboi no ning: an ram an irzat theina hrangin, Gilead khuaa nupang nâi vonghai an ât phorhai sikin:

¹⁴Khannisianlân Raba khua kul chunga mei sêm inchok a ta, khan irdoi nikhua khêk leh, kêllaiher nikhuaa phâivopui le, a rêng inhai kha kâng zoi a ta; an rêng kha sala chel an ta, an mi lianhai leh a pâlin, RENGPA khan a ti.

¹⁵An rêng chu a mi lianhai leh sala hruai an ti,” RENGPA khan a ti.