Read Hrangkhol AMOSA 2 Bible Online

AMOSA 2 - Hrangkhol bible

AMOSA 2

¹RENGPA’N hiang hin a ti; “Moab tho’nchâina inthum sikin, a ni, minli sikin, a hremna kha inboi no ning; Edom rêng ruhai kha chinai ang dênin a hâl sikin:

²Khannisianlân Moab chunga mei tîr ki ta, Keriot khuaa rêng inhai kâng zoi a ta; khan Moab kha buaina le khêk le bekul irhâiin thi a ta;

³khatak ata roirêltu kha inboi ki ta, a mi lianhai murdi kha, ama leh that ki ti, RENGPA khan a ti. Moab rêng roirêltuhai chu that ki ta, an mi lian murdihai khom that ving ki ti,” RENGPA khan a ti.

⁴RENGPA khan hiang hin a ti: “Juda tho’nchâina inthum sikin, a ni, minli sikin, a hremna kha inboi no ning; RENGPA dân kha a hnôla, a thupêkhai vong mahaia, an pahai ibiak ngai pathian irlimhai khan a hruai irhmang sikin.

⁵Khannisianlân Juda chunga mei tîr ki ta, Jerusalem khua rêng inhai kha kâng zoi a ti,” a tia.

⁶RENGPA khan hiang hin a ti: “Israel tho’nchâina inthum sikin, a ni, minli sikin, a hremna kha inboi no ning; tangkarua mi fel an zuar sik le kekok bun khata mi irsam an zuar sikin:

⁷mi inrianghai lu chunga pildi ten khom an hnarsaa, inrianghai an inrûkpai pea, pa le nâipa’n dôngmate inkhat an inmai irhlôma, ki’rhming irthiang an porinchetir a ni.

⁸Maichâm omna kipa puan siakhôm chunga an zâl ngaia, an pathian ina khan mi an inchôitir manhai khan uain an in ngai a ni.

⁹“Khannisianlân anni makunga Amor-hai, Sidar thing anga irsâng le thing sesua anga hrât khom kha ki’rhmangtira; a chung tiang ata a ra le a hnuai tiang ata a’rzung khom kin boitira.

¹⁰Khan, Amor-hai ram nei hrangin Aigupta ram ata nangni ki hruai suaka, ramchâra kum sômminli sûngin nangni ki hruaia.

¹¹Khan, deipu ni hrangin nin nâipahai laia mi le Nazarit ni hrangin nin ruathartehai laia mi ki siama. O, Israel nâihaio, khaangin a ini loi ma ni? RENGPA thu suak khan a ti.

¹²Khannisianlân Nazarit mihai kuang uain in hrang nin pêka, deipuhai kuang, thu hril no roi, tiin thu nin pêka.

¹³Irngai u ta, bumûta sip, tâli ichîl angin, nin hmuna nangni nam ki ti.

¹⁴Khan, mi’ntân hrâthai hrâtna boi a ta, mi hrâthai hrâtna boi a ta, mi hrâtin irtha sêng thei ual no ni, mi hrât tak khom irzôk thei ual no ni,

¹⁵thal ngul hmangtu khom inding thei ual no ni: fe hrât thei mi khom irzôk thei no nia, sakor chung chuang mi khan irzôk thei ual hliak no ni:

¹⁶Kha nikhua khan mi thilthothei tak laia mi huaisen khom kha silkai boiin intân no ni,” RENGPA thu suak khan a ti.