Read Hrangkhol AMOSA 3 Bible Online

AMOSA 3 - Hrangkhol bible

AMOSA 3

¹O, Israel nâihaio, Aigupta ram ata ki ihruai suak in sûngkuahaio, RENGPA’N hianga nangni a ihrilsiatna thu hi irngaitua roi,

²“Nangni vai hi rammuala sûngkua murdihai laia nangni ki inhriat nin nia; khasikin nin itho’nsualna murdihaia khan nangni hrem ki ti,” tiin.

³An irngei no’n chu mi inhni an ife suam thei hrang ma ni?

⁴Kâmkeibakneiin ram hnuaia sa a man no’n chu an hrûm ngai ma ni? Kâmkeibaknei vânglaiin ite a man no’n chu pûka irthokin an hrûm ngai ma ni?

⁵A ta hrangin châng a om no’n chu vate kha irnêng chânga khan an ôk ngai mo? châng kha ite in-ôk loiin irnênga irthok khan chim ni mo?

⁶Khopuia mi chi loi hrangin bekul an tum thei ma ni? RENGPA itho ni no’n chu khopuia khan siatna a iom thei ma ni?

⁷Dik takin RENGPA PATHIAN khan a sinthotu, a deipuhai kuang a thu’rthup hril loiin ite tho no ni.

⁸Kâmkeibaknei an hrûmin tu mo chi loi hrang? RENGPA PATHIAN khan thu a hrila, tu mo hril loi theiloi hrang? tiin.

⁹Asdod khua rêng inhai le Aigupta ram rêng inhaia khan hril unglân, Samari tâng chunghaia irbuk unglân, kha khan buaina lian tak omhai leh kha laia opbea omhai kha enhai roi, tiin.

¹⁰Opbena le nakhrâta an irchipuihai kha an rêng inhaia an siakhôma, dik taka tho tum viat mahai, RENGPA thu suak khan a ti.

¹¹Khasikin RENGPA PATHIAN khan, “An râlhaiin an ram kha hong irhual an ta, an kulhai inchimtir an ta, an rêng inhai khom insiat an ti.

¹²RENGPA khan hiang hin a tia: Belrapu’n kâmkeibaknei bâi ata a belra ke inhni mani, mikuar hlek mani, a isan suak angin, khaang Samari khuaa zâlhmun kila le zâlhmun irlung êk puan irphân lukham chunga Israel nâi omhai kha sansuak a ti.

¹³Irngai unglân, Jakoba in sûng mihai chunga khan inhriattir ro, Sipaihai Pathian RENGPA PATHIAN khan a ti.

¹⁴Israel tho’nsualna kha ama chunga ki hremin chu, kha nikhua khan Bethel khuaa maichâmhai khom hrem seng ki ti; khan, maichâm irkihai kha koi a ta, irnênga tâk a ti.

¹⁵Khan, phalbi in le kholum in vîksiat ki ta, sâihaa irvô inhai kha irhmang a ti, in roiinpuihai khan mongna nei an ti,” RENGPA khan a ti.