Read Hrangkhol AMOSA 4 Bible Online

AMOSA 4 - Hrangkhol bible

AMOSA 4

¹Nangni Samari tânga lêng nuhai, Basan sehrât infa’n mar anghaio, inrianghai manêpa, irsamhai hnenga, pasalhai kuang, “Hong la unglân, in ei ti,” tituhaio, hi thu hi inhre roi.

²RENGPA PATHIAN khan ama irthiangna sâlin khua a sâla: “Irngai u ta, thîrkuaiin nangni a lâk irhmanga, nin laia a la omsunhai nga irkuaia nangni lâk irhmang nikhua a hong itung hrang a ni.

³Khan, bang ir-ônghaia fe suak nin ta, mi tin kha intûn takin fe an ti, Hermon hmuna khan irpai nin ti”, RENGPA’N a ti.

⁴Bethel-a khan hong unglân, tho’nchâi roi; Gilgal-a khan hong unglân, tho’nchâina kha inpungtir roi, khan nin irbôlna kha nîtin hong la unglân, nin sôma inkhathai kha sûn thum danh zêla hong chôi roi.

⁵Khan, chol kop loi lômthu hril irbôlna kha inhlan unglân, mâni nuamlama inhlanhai kha hril unglân, inpuang roi: O Israel nâihaio, hi hi nin nuamlam tak a ni, RENGPA PATHIANIN a tia.

⁶Khan, kei khomin nin khopui murdihai châmna le nin hmun murdihaia irsamna nangni ki pêka; kha tena khom ki kuang hong kîr mak chêia, RENGPA thu suak khan a ti.

⁷Khan, bu ât hrang zoro tha thum a la ni laiin nin chunga rotho hrang khom ki khapa; khopui inkhat chunga kin thotirin, khopui dang chunga inthotir ma ung: hmun khat chunga kin thotir ngaia, a tho no hmun kha a châr ngaia.

⁸Khanchu, khopui inhni mani, inthum mani kha khopui inkhata tui in hrangin an irvâka, khop mahaia: kha khom khan ki kuang hong kîr mak chêi, RENGPA thu suak khan a ti.

⁹Chârkhohroina le duichûtna’n nangni ki hrema: nin irhuanhai, nin grep irhuan hai, nin theipui kung hai, nin oliv thinghai murdi kha thing irnge irlungin a fâk zit tâk a ni: kha khom khan ki kuang hong kîr mak chêi, RENGPA thu suak khan a ti.

¹⁰Aigupta ram angin nangni laia hripui ki tîra: Khandaiin nin ruathartehai kha ki that tâka, nin sakorhai ki hruai irhmang tâk a ni; khan, nin sipai hmun mirimsia kha nin hnâra innam rak dôrin nangni kin omtira: kha tena khom khan ki kuang hong kîr mak chêi, RENGPA thu suak khan a ti.

¹¹Sodom le Gomora khua kha Pathianin an chimtir lai angin, nin laia mi senkhat kin chimtira, thing kâng sabak loi lâksuak ang nin ni: kha tena khom khan ki kuang hong kîr mak chêi, RENGPA thu suak khan a ti.

¹²Khasikin, o Israel, ni chunga hiang hin ki tho hrang sikin, o Israel ni Pathian irtongpui hrangin irsiam roh.

¹³Irngai ta, tânghai inding suaka, phâivua siama mihriam kuanga khan a ngaituana imo a ni hril suak pea, zîng kha inthimtira, irnêng hmun irsânghai chîltu kha ar hming RENGPA, Sipaihai Pathian kha a ni.