Read Hrangkhol AMOSA 6 Bible Online

AMOSA 6 - Hrangkhol bible

AMOSA 6

¹Zion tânga hoi ta hraia omhai le Samari tânga raifân taka omhai le nam lian tak mi roiinpuihai, an kuanga Israela sûngkuahai an fenahai chung kha a zîng e!

²Kalne khuaa fe unglân en roi; khan, khataka Hamath kho roiinpuia khan fe unglân: khan, Filistia ram Gath khuaa khan chum unglân. Hi ramhai nêk hin an isa ual ma ni? Nin ram nêkin an ram a irzat ual ma ni?

³Nangni nikho saloi hlataka sia le nunrông toina innâitirtuhaio,

⁴Sâiha zâlhmuna zâla, an toina sei chunghaia inthuanga, belra pâl laia belrate le sehrât omna lai ata sehrât tuaihai fâka;

⁵perkhuanga thaboina hlahai saka Davida anga mâni hranga hla tûk hmang ruahai siama;

⁶berbu liana uain ina, hriak sataka irpolhai kha; khannisianlân Josefa-hai intakna sikin charindong mahai.

⁷Khanchu atûn sala fe masahai leh sala fe an ta, inthuanghai raifânna lômna kha boi a ti.

⁸RENGPA, sipaihai Pathian khan, RENGPA PATHIAN khan ama le ama irsâlin khomâk a sâma: Jakoba lârirpâkna kha kin tira, a rêng inhai ki khôkmâka: khasikin khua le a sûnga om murdihai kha ki incheltir hrang a ni.

⁹Khan, hiang hin lei ni a ta, in inkhata mi sômkhat an la omin chu thi an ta.

¹⁰Khan, mi inkhat pasal tianga a hâltu ngei khomin la a ta, in sûng ata a ru la suak hrangin, in sûngrîl taka om kuang, “Ni kuang tukhom an la om mo,” a tia. Ama khan, “om ma,” a tiin chu, ama khan, “dâihrek ro, RENGPA irhming kha ei isâm hrang ni maka” ti a ti.

¹¹Irngai u ta, RENGPA khan thu a pêka; khan, in lian kha chim rem rum a ta, in chîn khom kha kak phet phut a ti.

¹²Sakorhai kha lungpui chunga an intân hrang ma ni? Khataka khan mi’n sehrâtin irnêng an ituk irlet hrang ma ni? nangni’n roirêlna kha thina hloia le, felna kha sâipui ram thinga nin inchangtir hi.

¹³nangni thil mâkana chunga lôma, eini hrâtna’n a ini loi ma ni, irkihai ei ilâk? tihaio.

¹⁴En u ta, o Israel in sûng mihaio, nangni doi hrangin nam inding suaktir ki ta; khan, Hamath kho mikot sua ata Araba dung dênin deng nangni intheitir an ta; RENGPA, sipaihai Pathian thu suak khan a ti.