Read Hrangkhol JONA 4 Bible Online

JONA 4 - Hrangkhol bible

JONA 4

¹Aniachu, khataka khan Jona a milunghoi tak tak maka, a ning an mur tâka.

²RENGPA kuanga khan a chongchaia, “O RENGPA nang ki ngên, hi hi kin rama ki om laia ki insîr kha mo ni ma? Hi sika hin Tarsis tiang ki intânpat a ni kha te: nang chu lungkhamna sip, thil saloi tiang ata irheikîr ngai ni nih ti kin hriat.

³Khasika khan, O RENGPA, atûn ki hringna hi ni lapai pe hrangin nang ki ingên a ni; keima hranga hin dam nêkin thi a isa ual a ni,” a tia.

⁴Khan, RENGPA khan, “Ni ninginmurna hi ni itho indik ma ni?” a tia.

⁵Khanchu, Jona kha khopui ata kha a fe suaka, khopui sak tiang khan a toia, khataka khan omhmun a khuara, khopuia thil hong tung hrang kha hmu tumin a hnuai irhlîma khan a toi chian tâka.

⁶Khan, RENGPA Pathian khan ûm a lei inkunga, kha kha Jona chunga a’rzâmtira, an takna ata sansuak hranga a lu zâr irhlîtu hrangin. Khanchu, Jona kha ûm sika khan a sân a lôm tak tak ta.

⁷Aniachu Pathianin, zîng nôk kôl a hong irsalin, irnge’n ûm râng kha a fâka, an thêmtira.

⁸Khan, hi hi a nia, misa a hong suakin chu Pathianin nisua tianga phâivua lum a lei inkunga; khan, misa khan Jona lu kha a ema, a chinginrîla, a ta hrang khan thi a ngên tâka, “Keima hrang hin hring nêkin thi a sa ual,” a tia.

⁹Khan, Pathian khan Jona kuang, “Ûm chungchâng thua ni ninginmur hi ni tho indik ma ni?” a tia. Ama khan, “Thipui hrang dôra ki ninginmur hi, ki iti indik a ni,” a tia.

¹⁰Khan, RENGPA khan, “Ni isôlpui loi, ni irsôntir khom ni ual loi, zân khat thila a hong oma, zân khat thila irhmang le ûm hi nin rena:

¹¹Ninevi khua, khopui roiinpui tak, a sûnga mi nuai khat le sînghni nêka tam, an chang tiang le vei tiang khom sen thei loihai le sa pâl tamtak omna hi, ki ilunginkham loi hrang ma ni?” a tia.