Read Hrangkhol NAMBAR 10 Bible Online

NAMBAR 10 - Hrangkhol bible

NAMBAR 10

¹Khan RENGPA’N Mosia a chongpuia,

²“Tangkarua bekul inhni siamin lân, isuka sukin siam ro; mipui bukkhômna hrangin le riakbuk mâksanna hrangin ni ihmang ngai hrang a ni.

³Bekul inhnihai kha zoro sôt an tum hnungin mipui murdi chu ni kuang irtongna Biakbuk kotbâia an irbuk zit hrang a ni.

⁴Khannisian inkhat vai kha tum a ni’n chu, panam tina pâfonghai vai ni kuang hong irbuk an ti.

⁵Bekul kha chomkhat vai an tumin chu, nisua tianga omhai chu suak an ti.

⁶Khan bekul kha voihnina an tum nôka nî’n chu sim tianga omhai suak an ti. Riakbuk suaksanna hrangin chu bekulhai kha chomkhat dok tum ni a ti.

⁷Khannisian mipui murdi irbukna hrangin chu bekul kha zoro sôttak tum ni a ti.

⁸Bekulhai kha Arona nâipasal ochaihaiin tum ngai an ti. Kha kha nin ta hranga kumtuanga dân chu ni a ti.

⁹Nin rama nin râlhai doi hrang tika khom, hi bekulhai hi tum unglân, khanchu kei RENGPA nin Pathian hin nangni san ki ta, nin râlhai rengata nangni inzôk ki ti.

¹⁰Nin khonhoi nihai, nin Ferkân Kût zoro hai, nin tha thar lôm nihai le nin pum hâlirvôm le irngeina thilinhlan nin inhlan zoro tikhaia khom bekul chu nin itum hrang a ni. Khanchu keima’n nangni san ki ti; kei hi RENGPA nin Pathian chu ki ni.

¹¹Khanchu kum hnina, a tha hnina, sûn sôm inhnina khan sûm chu inhriattirna Biakbuk chung ata kha a’rthona.

¹²Khanchu Israel irchihai kha Sinai ramchâr ata kha an inzin suaka, Paran ramchâra khan sûm kha a’rngam tâka.

¹³Mosia hmanga RENGPA thupêk angin an suak nôk tâka.

¹⁴Juda pâlhai an pâl tam dâna izirin an suaka; an hruaitu chu Aminadaba nâipa Nasona a ni.

¹⁵Isakara panamhai hruaitu chu Zuara nâipa Nethanela a ni.

¹⁶Zebulun panamhai hruaitu chu Helona nâipa Eliaba a ni.

¹⁷Khanchu Biakbuk kha an seta, Gersona le Meraria namhaiin an irzôn suaka.

¹⁸Kha hnungin, Reubena panamhai chu an pâl tam dân angin an suaka; an hruaitu chu Sedeura nâipa Elizura a ni.

¹⁹Simeona panamhai hruaitu chu Zurisadaia nâipa Selumiela a ni.

²⁰Gada panamhai hruaitu chu Deuela nâipa Eliasafa a ni.

²¹Khan, Levi panamhai laia Kohatha irchihaiin thil irthiang kha an irzôna, an suaka; riakbuk kha an va tung mân, Biakbuk kha inding zoi vingin a lei om tâka.

²²Efraima panamhai chu an pâl tam dân angin an suaka, an hruaitu chu Amihuda nâipa Elisama a ni.

²³Manasea panamhai hruaitu chu Pedazura nâipa Gamaliela a ni.

²⁴Benjamina panamhai hruaitu chu Gideona nâipa Abidana a ni.

²⁵Khan a hnungkhôn taka chu Dana panamhai chu an pâl tam dân izirin an suaka, an hruaitu chu Amisadaia nâipa Ahiezera a ni.

²⁶Asera hai hruaitu chu Okrana nâipa Pagiela a ni.

²⁷Naftalia hai hruaitu chu Enana nâipa Ahira a ni.

²⁸Khaang kha a ni, Israel irchihai an pâl tam dân anga izirin an fe dân chu; khaang khan an suak tâka.

²⁹Khanchu Mosia’n a kumeipa, Midian mi Jethroa nâipa Hobaba kuang, “RENGPA’N ram ni pe hrang a itihna tiang fe hrang kin nia, khataka khan Israelhai chu tuanintungtirhai hrangin chong an kunga; khasikin nangma khom kin kuang hong sa’nlân, ni chunga satakin om kin ti,” a tia.

³⁰Khan Hobaba’n a kuang, “Nin kuang hong sa thei no ning, kin rama ki’rchihai kuang fe hrang ki ni sikin,” a tia.

³¹Khanchu Mosia’n a kuang, “Irngaihoi takin ni masan no ro, ramchâra omhmun kin ikhuarna hranghai chu nangin nin hriat uala, khasikin kin mit ni hong chang pe roh.

³²Kin kuang ni honga niin chu, RENGPA satvurna kin idong murdi chu nang khomin dong sa ni ti,” a tia.

³³Khanchu RENGPA tâng irthiang Sinai ata sûn thum lama an fea; RENGPA Thuthung Bôm chu riakbuk an khuarna hrang hmun inchum zongin an matona a fe maia.

³⁴Khan riakbuk an suaksan rikipa, RENGPA sûm chu sûna an chunga a om mai ngaia.

³⁵Khan Thuthung Bôm kha a suak hrang rikipa, Mosia’n, “O RENGPA thoiin lân, ni râlhai chu inhnotin lân, nang a hmumâktuhai chu ni makung ata rot ri sehai,” a ti ngaia.

³⁶Khan a’rnghat rikipa, “O RENGPA Israel mipuihai laia hin zuang kîr nôk ta ro,” a ti ngai.