Read Hrangkhol NAMBAR 11 Bible Online

NAMBAR 11 - Hrangkhol bible

NAMBAR 11

¹Khanchu an dengtheinahai sikin mipuihaiin RENGPA inhriat hrangin an chiara, RENGPA’N an hriathai tena chu a ning an mura, mipuihai chunga mei a zuang tîra; an laia meichokin, an riakbuk hmor tiang chu a kâng tâka.

²Khanchu mipuihai khan Mosia an koia, Mosia kha RENGPA kuang a chongchaia, mei kha a thi nôk tâka.

³RENGPA mei kha an laia a chok sikin, kha hmun irhminga khan Tabera an ti tâka.

⁴Khan, nam dang senkhat an laia omhai khan a sân hmê irzukna an hong nei tâka, khan Israel irchihai khom kha an chiar sa tâka. “Hmê fâk hrang hi nei inlân chu o!

⁵Aigupta rama khan a man boiin ei nuam dôr nga ei fâka, khabana fanghma hai, vâifanghma hai, purûn sel hai, purûn til hai le purûnngoi hai ei la’nhriat maia;

⁶khannisian atûn hin chu ei bu nêk ei anh fâk zar khom suak ta maka, fâk hrang dang lak ite om ta maka, a nî tina ei ifâk mana ti bana chu,” an tia.

⁷(Mana chu chîmu ru angin an lang dân chu lunghlu ang a nia,

⁸Zâna riakbuk kôlhaia irdo leh an tâk suama, zîng khovâra chu mipuihaiin an hrûta bu nôina khan an nôi india, suma khom an suk ngaia, khanchu bêla an era, bai khomin an sin ngai, oliv hriak leh bai sin ang hin a om ngai.

¹⁰Khan mipuihai kha a in sûngkua kua’n, an puan in kotbâia an chap ti kha Mosia’n an hriata, khan RENGPA chu a sân a ning an mur pe tâka.

¹¹Khan, Mosia khom kha a milunghoi pe ta maka, khanchu RENGPA kuang, “Itho sika mo ni sinthotu hi deng ni ni intheitir? Imo ni milunghoi loina ki chunga ni inei? Hi mipuihai mophurna hi keima chunga ni ibâng?

¹²Hi mipuihai hi ki nâihai mo an nia? An pi le puhai kuanga chonginkunga pêk ni inkungna rama hruai inlûthai hrangin, nâi neitu’n irhnu nêk lai a ipom angin ni ni inpomtir?

¹³Hi mipuihai ruk hrang dôr hi kho rengata mo hmê ki ihmu zoi hrang? ‘Kin fâk hrangin hmê ni pe ro,’ tiin an ni ichapkhum hi.

¹⁴Hihai hi ki bingin chu hruaihai thei no ning, keima ta hrangin an tak hrai tâk sikin.

¹⁵Hianga ni lo hrang a ni’n chu, nin renin lân, atûn atûn ni thatpai zel ro, deng nin theitir ta no ro,” a tia.

¹⁶RENGPA’N Mosia kuang, “Israelhai upa mipuihai upa le an hruaitu nia ni inhriat mi sômsari keima kuang hong hruaihaiin lân, irtongna Biakbuka nangma leh ngîrsuam hrangin hong hruaihai roh.

¹⁷Khanchu zuang chum ki ta, khataka khan nang zuang chongpui ki ti; khan nangma kuanga irtha kha an chunga sia ki ta, ni bingin pêl loiin mipuihai puakrik kha nang pêlpui an ti.

¹⁸Khanchu nangin mipuihai kuang, ‘Nangtûka hrang hin irthâr irthiang unglân, khanchu hmê fâk hrang chu man ngêt nin ti. Kin hmê fâk hrang tu’n mo a ni ipêk hrang? Aigupta rama khan a ihoi tie le te, tiin RENGPA inhriatin nin chapa, khasikin RENGPA’N hmê nangni pe a ta, fa ngêt nin ti.

¹⁹Sûn khat mani, sûn hni mani, sûn ringa mani, sûn sôm mani, sûn sôminhni mani vai ual khom ni no nia.

²⁰Tha khat sûng chu, hnông raka inluak rakin fa nin ti, nin kuanga om RENGPA hnôla, itho hranga Aigupta rengata suak mo ei ini o, tia nin chap sikin,’ ti ro,” a tia.

²¹Khan, Mosia khan RENGPA kuang, “Hitaka hin mi nuairuk kir ôihaia, tha khat sûnga an hmê fâk hrang nangni pe ki ti, ni iti hi?

²²Kêlbelra le sa danghai hi that pehai ngânin lân, an ikhop thei hrang ma ni? Tuipuia nga murdi chel pehaiin lân an iruk hrang ma ni?” a tia.

²³Khanchu RENGPA’N Mosia kuang, “Ki’rchamneina hi a ihek thei hrang ma ni? ki iti hi a tung le tung loi inhre lat ta ni ti?,” a tia.

²⁴Khanchu Mosia kha a suaka RENGPA thu chu mipuihai kha a hrilhaia; khanchu hruaitu sômsarihai a koibûmhaia; Biakbuk kôla khan an ngîrtirhaia.

²⁵Khanchu RENGPA kha sûm laia a zuanga, a chongpuia, Mosia kuang irtha a lei ipêk senkhathai kha lâkin hruaitu sômsarihai kha a pêkhaia. Khanchu irtha kha an chunga a chum le zel khan, deipuhai angin thu an hrila, khannisian kha kha chu tho thei mai ta mahaia.

²⁶Khanchu hruaitu sômsarihai laia mi inhni, Eldada le Medada chu Biakbuk sûnga khan an la oma, puan in tiang la fe mahai, kha khan irtha kha an chunga a zuang chum pehai nôka, anni khom deipuhai angin thu an hril tâka.

²⁷Khan ruatharte inkhat hi intânin Eldada le Medada sintho kha Mosia an va hrila.

²⁸Khanchu Nuna nâipa Josua, ruatharte a ni lai ata Mosia changpui ngaitu khan, Mosia kuang “Ka pu Mosia khaphai ta ro,” a tia.

²⁹Khan Mosia’n a kuang, “Keima sika hin ni ihnarsâhai mo? RENGPA mi murdihai hi deipu ni vinghai sian, RENGPA’N an chunga irtha sem pehai ving sian ei ti lai hin,” a tia.

³⁰Khanchu Mosia le Israel hruaitu sômsarihai kha riakbuka an kîr nôk tâka.

³¹Khanchu RENGPA’N phâivua an thotira, tuipui ata mamîm a hong sêm suakhaia, hnuai ata mûk hni irsângin an hong vuanga. Riakbuk le a kôlvêla khan hmun lian tak an dâp zuak tâka.

³²Mipuihai khan sûn nitungin le zân khovârin sûn dang nôka sûn nitungin mamîm kha an irfuanghaia, a’rkhôm intômtak khomin Homer sôm chu an irkhôma; an riakbuk kôla khan an inchârhaia.

³³Khanchu kha hmê kha an fâka, an fâk zoi mânin; mipuihai chunga RENGPA ning kha a zuan mur pea, mipuihai kha hripuiin a hremhai tâka.

³⁴Kha hmun irhminga khan Kibroth Hattaavah an tia; kha hmuna khan hmê irzuka rôlsiahai kha an phûmhai sikin.

³⁵Khanchu mipuihai chu, kha hmun ata kha Hazerot-a an fea, khataka khan omhmun an khuar tâka.