Read Hrangkhol NAMBAR 15 Bible Online

NAMBAR 15 - Hrangkhol bible

NAMBAR 15

¹RENGPA’N Mosia a chongpuia,

²Israel irchihai kha inhrilin lân, an kuang, nin omna hranga ram nangni ki ipêk kha nin tung tika,

³RENGPA kuang sehrâtchal mani, belrachal mani, kêl mani, pum hâlirvôm thilinhlana hrangin mani, mâni nuam thua thilinhlanna hrangin mani, chonginkung inkungna hranga irbôlna hrangin mani, nin Ferkân Kût zoro nia thilinhlanna hrangin mani, RENGPA kuang hong chôi a ta, kha kha RENGPA ta hranga mirimhoi chu ni a ti.

⁴RENGPA kuang belra mani, kêl mani, pum hâlirvôm thilinhlanna an hlan tika sa le baidi thilinhlanna hrangin ni hong ichôi sa hrang a ni.

⁶Khanchu kêlbelrachal inhlan a ni tika chu baidi her hni oliv hriak khilât sei inkhat le a chimrip irzêl le uain khilât sei khat le a chimrip chu baidi thilinhlanna hrangin inhlan a ini sa hrang a ni.

⁷Hi thilinhlanhai hi RENGPA ta hrangin mirimhoi chu a ni.

⁸Khan, sehrâtchal chu pum hâlirvôm thilinhlanna hrangin mani, chonginkung inkungna thilinhlanna hrangin mani, irngeina thilinhlanna hrangin mani, inhlan a ni tika,

⁹baidi thilinhlanna hrangin baidi her thum le oliv hriak khilât sei inhni irzêl sai,

¹⁰uain khilât sei inhni chu inhlan a ini sa hrang a ni. Hi thilinhlanhai hi RENGPA ta hranga mirimhoi chu a ni.

¹¹Anni kha sehrâtchal, kêlbelrachal le kêl inhlan a ni tika inhlan sa hrang chu a ni.

¹²Khanchu sa chu inkhat nêka tam inhlan a lei ni tâkin chu, thilinhlan dang a zuitu khom kha a tam dang ang dungzuiin inhlan sa thiai ni a ti.

¹³Kha rama suak murdihaiin chu, hiang tak hin RENGPA ta hranga mirimhoi meia thilinhlan an itho hrang chu a ni.

¹⁴Khanchu ram dang mi nin kuanga om ngaitu khan mani, chomkhat hrang vaia ompu khan mani khom RENGPA ta hrangin mirimhoi meia thilinhlan nuamtuhaiin chu nin itho lam angin an itho hrang a ni.

¹⁵Nin irchihai le mipuihai le nam dang nin kuanga omhai ta hrang khomin dân inkhat vai a om. RENGPA makunga nam danghai chu nangni ang dên ni an ti.

¹⁶Nangni ta hrangin nin kuanga nam dang omhai ta hrangin dân hmunkhat le tho dân hmunkhat vai om a ti.

¹⁷Khanchu RENGPA’N Mosia a chongpuia,

¹⁸“Israel irchihai inhrilin lân, an kuang, nangni ki hruaina hrang ram chu nin va tunga,

¹⁹kha rama bai nin fâk tena chu, RENGPA kuang ngaihoi thilinhlan nin inei hrang a ni.

²⁰Nin bai sin masa tak tiam khat chu ngaihoi thilinhlana nin inhlan hrang a ni, hruizôla ngaihoi thil inhlan nin inei angin nin itho hrang a ni.

²¹Nin irchihai dênin nin bai sin masa tak chu RENGPA kuang ngaihoi thilinhlanna hrangin nin inhlan mai hrang a ni.

²²“Khanchu hi thupêk murdi; RENGPA’N Mosia kuanga a ihril,

²³RENGPA’N thu a pêk masa tak rengata nin irchihai dêna hrangin Mosia hmanga thu nangni a ipêk murdi hi nin pom noa ni’n chu, hiang hin hong ni a ti.

²⁴Mipuihaiin kutkechâia an tho’nsual a lei ni’n chu, mipui murdihaiin pum hâlirvôm thilinhlan, RENGPA ta hranga mirimhoi hrangin sehrât tuai inkhat inhlan an ta, a dân pangai angin baidi thilinhlan leh khan sual irbôlna hrangin kêlchal inkhat an inhlan sa hrang a ni.

²⁵Khanchu ochaihaiin Israel mipuihai ta hrangin irngeina siam an ta, ngaidam ni an ti; kutkechâia a ni sikin le an thilinhlan kha RENGPA ta hranga meia thilinhlan le an sualna irthûla sual irbôlna an inhlan tâk sikin.

²⁶Israel mipuihai chu ngaidam ni an ta, an laia nam dang omhai khom, mipui murdi’n kutkechâia an itho a ni sikin.

²⁷Khan mimalin kutkechâia an itho’nsual a ni’n chu, sual irbôlna hrangin kêlte kum khat mi a inhlan hrang a ni.

²⁸Kutkechâia RENGPA makunga tho’nsualtu ta hrangin ochaiin irngeina a isiam hrang a ni. Khanchu ngaidam ni an ti.

²⁹Kutkechâia tho’nsualtu ta hrangin Israel irchi le nam dang mi anni laia omhai ta hrang khomin dân inkhat nin inei hrang a ni.

³⁰Khannisian mi tukhom inhre chachaka tho’nsual a lei ni’n chu, kha rama suak mi khom ni sian, nam dang mi khom ni sian, RENGPA a ihmusit a ni sikin, ama chu that ngêt ni a ti.

³¹RENGPA thu chu a hmusita, a thupêk a hnôl sikin, a thina mô chu a chunga om a ti, ti ro,” tiin.

³²Israel irchihai ramchâra an om lai khan mi inkhat hi Sabat nî sûna thing irkhôm hi an hmua.

³³A thing irkhôm hmutuhai khan Mosia le Arona le mipuihai kuang an hruaia.

³⁴Itina lo hrang mo a inih ti an la’npuang no sikin intângna ina an lei khuma.

³⁵Khanchu RENGPA’N Mosia kuang, “Ama chu that ngêt ni a ta, riakbuk pên tiang mipuihaiin lung leh an idêng hrang kêng,” a tia.

³⁶Khanchu RENGPA’N Mosia thu a ipêk lam ang takin mipuihaiin riakbuk pên tiang an hruaia, lung leh an dêng that tâka.

³⁷Khan, RENGPA’N Mosia a chongpuia,

³⁸“Israel irchihai kuang, an irchi suanpârhai tenin an sil le kai puan hmora a zia siam an ta, a hmor tina khan hrui dum sia hrangin inhrilhai roh. Hi hi kumtuangin nin itho mai hrang chu a ni.

³⁹Hi puan hmorhai hi nin en rikipa, ki thupêkhai nin inhriat suaka nin zômna hrangin le nin nuamlam anga thil tho ta loia, keima nin ni la iamzoina hrangin.

⁴⁰Ki thupêkhai chu nin inhriat maia, nin zôma, nin Pathian ta hranga nin irthiang theina hrangin a ni.

⁴¹Nin Pathian ni hranga Aigupta ram ata nangni hruai suaktu RENGPA nin Pathian chu ki ni, kei hi RENGPA nin Pathian chu ki ni.