Read Hrangkhol NAMBAR 16 Bible Online

NAMBAR 16 - Hrangkhol bible

NAMBAR 16

¹Levi nama Kohatha irchi, Izhara nâipa Kora chu Mosia chunga tehelna hrang a zonga, ama chu Reubena nama mi inthum Eliaba nâipasalhai Dathana le Abirama le Peleta nâipa Ona le Israel irchihai laia hruaitu inlâr mi irzahni sômringa’n an thophaia.

³Anni chu Mosia le Arona makunga an irbûma, an kuang, “A sate’n nin om a liana, mipuihai hi RENGPA ta kin nia, RENGPA khom kin kuang a oma. Khasikin, Mosia’n i sika RENGPA mipuihai chunga hin nin irsia irsâng bîk ma ni?,” an tia.

⁴Kha thil kha Mosia’n an hriatin chu, an bokkhupa,

⁵Kora le a pâlhai kuang khan, “Nangtûk zîng RENGPA’N ama tahai chu ni’rhmutir a ti; ama tahai le a inthanghai chu maichâm bula ama hong nâi hrangin koihai a ti.

⁶Nangtûk zîng nangma le ni pâla mihaiin mei indomna chôi unglân, meiri-al sia unglân, mirimhoi phul unglân, maichâma va se roi. Khanchu RENGPA’N a tu hi mo a inthang en ei ti, nangni Levi irchia mihai hi a sân tehelzong nin ni,” tia.

⁷

⁸Khanchu Mosia’n Kora kuang, “Nangni Levi irchia mihai irngai hi roi,

⁹Israelhai Pathianin ama nin nâia, RENGPA Biakbuka sintho, mipuihai makunga ngîra an sin nin tho pehai theina hrangin Israel mipuihai ata a binga nangni a lei isia hi a dik mo nin isôn?

¹⁰Nangni le Levi irchi dang murdihai hi chôiirsângna nangni a pêka, atûn chu ochai nina ten khom hi lapai kêng nin inuam tâk na?

¹¹Khasikin nangma le nang a zuituhai murdi hi RENGPA kha doiin nin irbukkhôm a ni. Arona khom hin imo a tho uala a chunga nin ichiar hi?” a tia.

¹²Khanchu Mosia’n Eliaba nâipa Dathana le Abirama kha an koitirhaia. Khanchu anni’n, “Hong no ni ung!

¹³Aigupta ram hoi tak ata ni hong hruai suakin hi ramchâra ni that hrang hi a ruk ni la iti loi mo? Kin chunga khom rêng ni la ichang sa hrang mo?

¹⁴Dûttui luangna rama ni hruai inlût mak chea, loi le grep irhuan khom irchon hrangin ni pe mak chea, atûn khom ni huang hranga ni ni ikoi a ni sikin hong no ni ung,” an tia.

¹⁵Khanchu Mosia chu a sân a ning an mur pe tâka. Khanchu, RENGPA kuang, “Hi mihriamhai hin thilinhlan an hong ichôihai kha lei pom pehai no ro, an chunga ite tho’nsual ma ung; an sakuartung khom inkhat lua la pehai ma ung,” a tia.

¹⁶Khanchu Mosia’n Kora kuang, “Nangtûk nangma le ni mi ir-ôihai irzahni sômringahai chu RENGPA makunga nin hong inlang ngêt hrang kêng; Arona khom om sa a ti.

¹⁷Nin rêngin mei indomna hong chôi chit unglân, mirimhoi phul nin ta, khanchu maichâm chunga sia nin ti,” a tia.

¹⁸Khanchu mi tinin an mei indomna chit chu chôi an ta, meiri-al sia nin ta, a chunga mirimhoi phul nin ta, irtongna Biakbuk kotbâia Mosia le Arona hai le an ngîr tâka.

¹⁹Khanchu Kora khan mipuihai kha bûmin irtongna Biakbuk kotbâia Mosia le Arona chu an sêltirhai tâka. Khanchu mipuihai chunga khan RENGPA roiinpuina chu a zuan lang tâka.

²⁰Khanchu RENGPA’N Mosia le Arona kuang,

²¹“Hi mipuihai lai ata hi a bingin om roi; inrang takin zuang thathai hrang ki ni,” a tia.

²²Khannisian Mosia le Arona chu an lu irnêng sikin an inboka, “O Pathian, nang chu hringna chi tinrênghai bul ni nia; mi inkhat sualna sikin mipui murdi chunga ni ning a inmur hrang ma ni?,” an tia.

²³RENGPA’N Mosia a chongpuia,

²⁴“Mipuihai kuang khan, Kora, Dathana le Abirama hai puan in ata hi a bingin om ta roi, tiin hrilhai ro,” a tia.

²⁵Khanchu Mosia kha a thoia, Dathana le Abirama kuang a va fea; Israel upahaiin an zuia.

²⁶Khanchu mipuihai kuang, “Hi mi sualhai puan in rengata hi suak unglân, a bingin om roi, an thil neihai khom hi tôn no roi, khano’nchu an sualnahai sikin nangni khom irhmang sa nin ti,” tiin a hrila.

²⁷Khanchu Kora, Dathana le Abirama hai puan in ata kha an suaka, khanchu Dathana le Abirama chu an puan in ata kha an hong suaka, an puan in kotbâia khan an dôngma hai, an nâipasal hai, an nâinupang hai leh an ngîra.

²⁸Khanchu Mosia’n, “Keima irchama tho ni maka, hi thil tho hrang hin RENGPA’N a ni itîr a nih ti hi, hi thila hin inhre suak nin ti.

²⁹Hi mihai thi dân hi mi danghai thi angin an thia, mi danghai anga hrem an nia ni’n chu Pathianin a ni itîr loi ni a ti.

³⁰RENGPA’N thil thar a siama, irnêngin a bâi a ânga, anni le an thil nei murdihai an volpaia; seol-ah an hringna a lûta ni’n chu hi mihai hin RENGPA an irngainêp a nih ti inhria nin ti,” a tia.

³¹Kha thilhai kha a hril zoiin chu Dathana le Abirama omna irnêng kha a kikchat phuta.

³²Khanchu anni le an in mihai, Kora hnungzuituhai le an neinun an inei murdi chu involpaiin an om tâka.

³³Khanchu anni le an thil neihai chu a hring pumin seol-ah an lût ving tâka, irnêngin a bâi a’rchîp delhaia; mipuihai lai ata kha an irhmang zoi tâka.

³⁴Khanchu an kôla Israelhai chu an khêk irhâi an inhriat sikin, an intân indarh zoi tâka, “Irnêngin nin volpaina a ti,” an tia.

³⁵Khanchu RENGPA kuang ata mei a zuang suaka, mirimhoi inhlantu irzahni sômringahai chu a kâng thathai tâka.

³⁶Khanchu RENGPA’N Mosia a chongpuia,

³⁷“Ochai Arona nâipa Eliazara kha mei ata mei indomna kha la suak hrangin hrilin lân, mei kha indartir chit ri se, mei indomnahai kha thil irthiang a ni sikin.

³⁸Mei indomnahai kha RENGPA maichâm inhlanin a om tâk sikin thil irthiang a ni tâka. Khasikin an sualna sika thata omhai mei indomna kha suk irphântirin maichâm tuamna hrangin sin roh. Kha kha Israelhai ta hranga irsinsiana ni a ti,” a tia.

³⁹Khanchu ochai Eliazara khan mei indomna kha suk irphânin maichâm tuamna’n a sin tâka.

⁴⁰Kha kha Israelhai ta hranga irsinsiana a nia, Arona irchihai ti bana chu mi danghaiin maichâma RENGPA ta hranga mirimhoi hâl hrangin an ihong hrang ni mah. khano’nchu Kora le a mihai ang khan inboipai ni an ti. RENGPA’N Mosia hmanga thu a ipêk lam ang takin Eliazara’n a tho tâka.

⁴¹Khannisian zîng nôka chu, “RENGPA mihai nin thathai,” tiin Israel mipuihaiin Mosia le Arona kha an chiarkhumhaia.

⁴²Khanchu Mosia le Arona chunga mipui an chiara an irbuk lai khan, irtongna Biakbuk tiang an irheia; irningloiin sûmin a zuang irkhûhaia, RENGPA roiinpuina chu an hmu tâka.

⁴³Mosia le Arona chu irtongna Biakbuk maton tiang an va ngîra,

⁴⁴khanchu RENGPA’N Mosia kuang,

⁴⁵“Hi mipuihai rengata hi a bingin om roi, an omna hmun ngêta khan inboipaihai hrang ki ni,” a tia. Khanchu an ruaiin an lu irnêng sikin an inboka.

⁴⁶Khanchu Mosia’n Arona kuang, “Ni mei indomna kha lan lân, maichâm ata kha meiri-al lâkin mirimhoihai phul ro, khanchu inrang takin mipuihai kuang fe’n lân, thâr irthianghai roh. Inrang ro, RENGPA ninginmurna chu an lang tâka, hripui an lêngtir zôi tâk a ni,” a tia.

⁴⁷Arona’n Mosia ihril ang lam takin mei indomna chu chôiin mipui irbûmhai laia an tâna a lûta, hripui kha a lêng tah ti a hmua meiri-al chunga khan mirimhoi kha a phula mipuihai a thâr irthianga.

⁴⁸Khanchu hri kha a hek zôi zela, ama chu mithi le mihringhai kâra a ngîr tâka.

⁴⁹Kora chungchânga thihai tep loiin, hria thi murdihai chu sîngkhat sângminli le irzasari an ni.

⁵⁰Khanchu hri kha a hek tena chu Arona kha irtongna Biakbuk kotbâia Mosia kuang a kîr nôk tâka.