Read Hrangkhol NAMBAR 19 Bible Online

NAMBAR 19 - Hrangkhol bible

NAMBAR 19

¹Khanchu RENGPA’N Mosia le Arona a chongpuihaia,

²Hi hi RENGPA thupêk dân chu a ni; Israel irchihai chu sehrât irla a sen, demnaboi ringkol la pêl ngai loi hong kai hrangin hrilhai roh.

³Ochai Eliazara pe ni ta, ama’n riakbuk pên tiang hruai suak a ta, a makunga that a ini hrang a ni.

⁴Ochai Eliazara’n a thisen kha a kutpâra luak a ta, irtongna Biakbuk tiang voisari inthek a ti.

⁵Sa kha a pumin, a vun, a hmê a thisen le a rîlhai kha ochai makunga hâlpai a ini hrang a ni.

⁶Khanchu ochaiin sidar thing le husop le patzâisen la a ta, sehrât irla an ihâlna khan pai a ti.

⁷Khanchu ochai kha a silkaihai sôp a ta, tui irsil a ta, khanchu riakbuka fe a ta, khohloi dênin ochai kha irthiang loi a ini hrang a ni.

⁸A hâltu khom khan a silkaihai sôp a ta, tui irsil a ta, khohloi dênin irthiang loi ni a ti.

⁹Khan Pathian dâna mi irthiang inkhat khôkin sehrât an ihâlna irvâm kha irkhôm a ta, riakbuk pên tiang, hmun irthianga khan sia a ta; kha kha Israel mipuihai dâna irthiang loihai thâr irthiangna hrang tui siana hrangin savingin hrê a ti. Hi dân hi sual sôpinfâina hrangin an tho ngai.

¹⁰Khan sehrât irvâm irkhômpu khan a silkaihai sôp a ta, khohloi dênin irthiang loi ni a ti. Hi dân hi Israel irchihai le nam dang an kuanga omhai ta hranga kumtuanga dân hrang chu ni a ti.

¹¹Mi tukhom ruak tôntu kai chu sûn sari sûng chu irthiang loi ni an ti.

¹²Ama chu a sûn thum ni le sûn sari nihaia khan tui kathâr leh irthâr irthiang a ta, khanchu irthiang hong ni a ti. Khannisian sûn thum ni le sûn sari ni a’rthâr irthiang noa ni’n chu, irthiang loi la ni a ti.

¹³Tukhom ruak tôna a’rthâr irthiang noa ni’n chu irthiang loiin om mai a ti, tui kathâr kha a chunga buakin a om no sikin. RENGPA Biakbuk porinchetirtu a nia, khasikin ama chu Israel irchihai lai ata sâtthâkin om a ti.

¹⁴Khan mi puan ina thi a ni’n chu, puan ina lûtpuhai le a sûnga omtuhai chu sûn sari sûng chu irthiang loi ni an ti.

¹⁵Khan bêl le bûr irhong a sîngna leh sîng loihai khom irthiang loi ni sa an ti.

¹⁶Khan mi tukhomin pên tianga irdoinaa thi mani, aninole thi balama thi, a ruak mani, a ru mani, aninole a thân mani khom a tôna ni’n chu, ama chu sûn sari sûng chu irthiang loiin om a ti.

¹⁷An irthiang loina irthiangna hrangin sehrât irla a sen, sual infâina hranga an ihâlna irvâm senkhat kha la a ta, bêl sûnga thun a ta, tuidunga tui irthiang kha sung a ti.

¹⁸Khanchu mi irthiangin husop kha la a ta, tuia khan inchie a ta, puan inhai, bêl le bûrhai, khataka mi a om murdihai ru mani, mithi ruak mani, thân mani a tônpuhai chu inthek a ta;

¹⁹khanchu mi irthiangin, a sûn thumna le sûn sarina khan tui kha mi irthiang loitu kha inthekkhum a ti, khan a sûn sari ni khan mi irthiang loitu kha thâr irthiang a ta, a silkaihai kha sôpin, tui irsil a ta, khanchu zîng tiang chu irthiang hong ni thei ta a ti.

²⁰Mi tukhom Pathian dâna irthiang loitu chu a’rthâr irthiang mâka chu ama chu irthiang loiin om mai a ti, tui kathâr kha a chunga inthek a la ni no sikin. RENGPA hmun irthiang a porinchetir sikin mipuihai lai ata sâtthâkin om a ti.

²¹Hi dân hi itiklai khomin nin ihmang hrang chu a ni. Tui kathâr inthekpu khom khan a silkaihai sôp a ta, mi tukhom tui tônpu kai chu khohloi dênin irthiang loiin om an ti.

²²Khanchu mi irthiang loitu khan a itôn kai chu irthiang loi chang an ta, ama tôn nôktu khom kha khohloi dênin irthiang loiin om a ti, a tia.