Read Hrangkhol NAMBAR 2 Bible Online

NAMBAR 2 - Hrangkhol bible

NAMBAR 2

¹RENGPA’N Mosia le Arona a chongpuihaia,

²“Israel mihaiin riakbuk an siam tika chu, mi tinin mâni pâl irsinsiana le mâni panam puanzâr târ an ti.

³Nisua tianga Juda panam irsinsiana hnuaia a pâl pâla puanzâr hranga an hruaituhai chu hihai hi an ni. Aminadaba nâipa Nasona ni a ti.

⁴A pâlhai tam lam chu sîngsari le sângminli irzaruk an ni.

⁵Khan ama zoia puan in zârtu hrang chu Isakara irchia mi ni a ti.

⁶Isakara irchihai hruaitu chu Zuara nâipa Nethanela ni a ti, an tam lam chu sîngringa sângminli le irzaminli an ni.

⁷Zebulun irchihai hruaitu hrang chu Helona nâipa Eliaba mi chu

⁸an tam lam chu sîngringa sângsari le irzaminli an ni.

⁹An pâl tam dân angin Juda mi an itephai chu nuaikhat sîngriat sângruk le irzaminli an ni. Annihai hin an ihruaihai mai hrang a ni.

¹⁰An pâl tam dân izir angin sim tiang panga khan Reubena hai leh om an ta; Reubena irchihai hruaitu hrang chu Sedeura nâipa Elisura ni a ti.

¹¹An tam dân chu sîngminli sângruk le irzaringa an ni.

¹²Khan anni zoia zâr hranghai chu Simeona irchihai ni an ta, Simeona irchihai hruaitu hrang chu Zurisadaia nâipa Selumiela ni a ti.

¹³An tam lam dân chu sîngringa sângkuak le irzathum an ni.

¹⁴Khan, Gada irchihai chu an hruaitu hrangin Reuela nâipa Eliasapha ni a ta;

¹⁵an tam lam chu sîngminli sângringa irzaruk le sômringa an ni.

¹⁶Reubena mihai tam dân chu nuaikhat sîngringa sângkhat irzaminli le sômringa an ni. Annihai hi a dôntea suak hrang chu an ni.

¹⁷Khanchu irtongna puan in kha suaksan an ta, Levi irchihai chu a laia om an ta; an omhmun izir angin a pa pâlin fe an ti.

¹⁸An tam dân izir angin nitâk tiang panga khan Efraimahai om an ta, an hruaitu chu Amihuda nâipa Elisama ni a ti.

¹⁹An tam lam chu sîngminli irzaringa an ni.

²⁰Anni zoia chu Manasea hai ni an ti,

²¹Manasea hai hruaitu hrang chu Pedazura nâipa Gamaliela ni a ti; an tam lam chu sîngthum sânghni le irzahni an ni.

²²Anni zoia chu Benjamina irchihai, an hruaitu hrang chu Gideonia nâipa Abidana ni a ti.

²³An tam dân chu sîngthum sângringa le irzaminli an ni.

²⁴Efraima mi tam lam chu nuaikhat sângriat irzakhat an ni. Anni hi a dônte’n an isuak hrang a ni.

²⁵“An pâl tam dân angin Dan mihai chu hmâr tiang khan om an ta, Dan irchihai hruaitu hrang chu Amisadaia nâipa Ahiezera ni a ti.

²⁶An tam lam chu sîngruk sânghni le irzasari an ni.

²⁷Anni zoia puan in zâr hranghai chu Asera irchihai ni an ti. Asera irchihai hruaitu chu Okrana nâipa Pagiela ni a ti.

²⁸An pâl tam lam chu sîngminli sângkhat le irzaringa an ni.

²⁹Anni zoia hrang chu Naftalia irchi hai; an hruaitu hrang chu Enana nâipa Ahira ni a ti.

³⁰An tam lam chu sîngringa sângthum le irzaminli an ni.

³¹Dan mihai tam lam chu nuaikhat sîngringa sângsari le irzaruk an ni. Khan annihai hin a pa pâla suakin an ife irzôt chit hrang a ni,” tiin.

³²Hihai hi Israel irchihai insûngkua tina mi, an itephai chu an ni, an rêngin nuairuk sângthum irzaringa le sômringa an ni.

³³Khannisian, Levi irchihai kha chu RENGPA’N Mosia thu a ipêk angin, Israel irchihai laia khan tep sa ni mahai.

³⁴RENGPA’N Mosia thu a ipêk ang khan Israel irchihaiin a pa pâla puanzâra, a panam ang dungzuiin a pa pâlin an suak ngai a ni.