Read Hrangkhol NAMBAR 21 Bible Online

NAMBAR 21 - Hrangkhol bible

NAMBAR 21

¹Khanchu Kanaan Arad rêng sim tianga om khan Israel mihai Atharim kho lampui tiang an hong ti a len hriata, khanchu Israel mihai kha a lei doia, senkhathai chu suak hrangin a hruaihaia.

²Khan Israel mihaiin RENGPA kuang chong an inkunga, “Hi mihai hi kin kuta ni ni pêka ni’n chu, an khuahai hi irhmangtir chit kin ti,” an tia.

³Khanchu RENGPA’N Israel mihai thu kha a poma, Kanaan mihai kha a pêkhaia, anni le an khuahai chu a’rhmangtir zoia. A hmun irhming hrang khan Horma an iti a ni ta.

⁴Khanchu Hor tâng ata kha tuipuisen tiang Edom ram lôiin an fea, a lampui sika khan an milung a’rzal pehaia.

⁵Mipuihaiin Pathian le Mosia sêlin, “Ramchâra thi hrang pialin Aigupta rengata ni ni ihruai suak? Fâk hrang le tui in hrang lak om loi, hi bai intirom fâk hi chu a sân kin hnông ta,” an tia.

⁶Khanchu RENGPA’N mipuihai laia khan mirûl tûr neihai a tîra, an inchukhaia, Israel mi tamtak chu an thia.

⁷Khanchu mipuihai kha Mosia kuang an fea, “RENGPA le nangma doia kin lei iom hi kin lei itho’nsual a ni ta, kin laia mirûlhai hi nin boi pe hrangin RENGPA kuang chongchai ro,” an tia. Khanchu mipuihai hrangin Mosia’n a chongchai pehaia.

⁸Khanchu RENGPA’N Mosia kuang, “Mirûl tûr nei kha a’rlim siamin lân, chopuia inkhâi ro, mirûl inchukhaiin chu kha kha en an ta, khanchu hong dam an ti,” a tia.

⁹Khanchu Mosia’n sumsen mirûl irlim a siama, chopuia an khâia, mirûl inchukhai khan an ena damna an changa.

¹⁰Khan, Israel irchihai chu an fe maia, Oboth-ah khan omhmun an khuar tâka.

¹¹Oboth ata kha an fe nôka; nisua tiang Moab ramchâr kôla Ijeabarim-a omhmun an khuar ta.

¹²Khatak ata kha an fe nôka, Zered ivapanga omhmun an khuar nôk tâka.

¹³Khatak ata an fe nôkin chu, Arnon tuidung râl tiang Amor mihai ram tung thaia hla ramchâra khan omhmun an khuar nôka. (Arnon chu Moabhai le Amor-hai ramria om a ni).

¹⁴Khasikin RENGPA irdoina lekhabua, “Sufa irhôr Vahep khuaa Arnon irhôrhai,

¹⁵Ar khua omna tianga tâng insuk, Moab rama irnghat, ivadung panghai chu,” tia hril a ni.

¹⁶Khatak ata kha Beer-ah rungtui omna tiang an fe nôka, kha khan RENGPA’N Mosia kuang, “Mipuihai koibukhaiin lân, keiin tui pehai ki ti,” a tia.

¹⁷Kha zoro khan Israel mihaiin hi hla hi an saka: “O rungtui, ni tui kha hon suak ro, zâiin in-ôi kin ti.

¹⁸An rênghai le mipui hruaituhaiin, an ichoi rungtui chu an rêng khianghrol leh hêmvuaka an ichoi chu,” an tia. Khanchu ramchâr ata kha Matan-ah khan an fea,

¹⁹Matan ata kha Nahaliel-ah an fea,

²⁰Nahaliel ata kha Bamotha-a an fea, Bamotha ata kha Moab ivapanga, Pisga tâng hnuai ramchâr Jeshimon irlangna hmuna.

²¹Khanchu Israel mihaiin Amor mihai rêng Sihona kuang mi an tîra,

²²“Ni ram hi nin hrotir ro, keini le kin sahai hin lamlian hi hro loiin loia mani, grep irhuan khom fe no ni ung, ni rungtuia tui khom in no ni ung, ni ram kin khêl mâka chu lamlian hi ma viat no ni ung,” tiin.

²³Khannisian Sihona khan Israel mihai kha a ram hro hrang kha phal pehai maka, a sipaihai bukkhômin Israel mihai doi hrangin a suaka. Jahaz an va tunga; khanchu Israelhai kha an doihai tâka.

²⁴Khan Israel mihaiin khandai leh an lei doihaia, a ram chu Arnon rengata Jabok dênin, khan Amona irchihai ramri Jazer dênin an lâk pea.

²⁵Israel mihaiin kha khuahai kha an lâka, khanchu Israel mihai kha Amor mihai khuaa khan an om tâka. Hesbon le a kôla khotehai khom khan.

²⁶Hesbon chu Amor mihai rêng Sihona khua a nia, ama chu rêng masa Moab rêng doiin, Arnon tuidung dên raka la petu kha a ni.

²⁷Khasikin hla phuatuhaiin, “Hesbon-a hong unglân, Sihona khopui chu inding indet ni sian,

²⁸Khan voikhat chu Hesbon khopui ata Sihona sipaihai chu mei angin an suaka, Moab rama Ar khopui kha an insiata, Arnon sak tianga tâng chu an lâkpaia.

²⁹Moab mipuihai, nin chung a sân a rik, nangni Kemos chubai mûktuhai siat zoi hrang nin ni ta, nin pathianin pasalhai chu laizâm tho hrangin le nupanghai chu Amor rêng suaka om hrangin a pêka.

³⁰Khannisian atûn chu an irchi suanpârhai chu Hesbon ata Debon Nashim ata Medeba kôl Nofa dên rakin inboipaiin om an ti,” an tia.

³¹Khasikin Israel mihai chu Amor mihai rama an om tâka.

³²Khan Mosia chu Jazer va enirchik hrangin mi a tîra. Khanchu kha hmuna khuahai kha rûnin an lâk tâka. Amor mi omhai kha an irzûlpaihai ta.

³³Khanchu an kîr nôka, Basan lampui tiang an fea, khanchu Basan rêng Oga chu sipai hruaiin Edrei-a doi hrangin a suaka.

³⁴Khan RENGPA’N Mosia kuang, “Ama chu chi no ro, a mihai khom a ram khom ni kuta nang ki ipêk tâk a ni hi, Hesbon-a om Amor mihai rêng Sihona chunga ni itho angin ama chunga khom hin tho hrang ni ni,” a tia.

³⁵Khanchu ama khom a nâipasalhai khom, inzôk viathai loiin an thathaia, a ram khom an luapai pe ta.