Read Hrangkhol NAMBAR 22 Bible Online

NAMBAR 22 - Hrangkhol bible

NAMBAR 22

¹Khanchu Israel irchihai kha an fe maia, Jeriko irdîn Jordan râl Moab phâizôla khan omhmun an khuara.

²Khanchu Moab rêng, Zipora nâipa Balaka’n Israel mihaiin Amor mihai itho dân kha an hriatin chu,

³ama le a mihai khan a sate’n an chi tâka.

⁴Khanchu Moab mihaiin Midian mi upahai kuang, “Hi mihai hin sehrâtin hloisûl a ifâk angin, ei vêla mihai hi an ifâk zoihai hrang kêng,” an tia.

⁵Khasikin Balaka rêngin Amaw rama Eufrates tuidung kôla Pethor-ah om Beora nâipa Balaama kuang mi a tîra, “Irngai ro, nam inkhat Aigupta rengata hong an oma, hmun tin an sip zoi tâka; ki ram kôla hin an oma.

⁶Keini nêkin an tama, khasikin irngaihoi takin hongin lân, hi mihai hi khua ni va sâl pehai ro; kin inhnêhaia, kin ram ata kin inhnothai theina hrangin a ni, mi sat ni ivurhai chu satvurin an om ngaia, khua ni isâlhai chu khosâlin an om ngai ti kin hriat,” tiin a van koitirhaia.

⁷Khanchu Moab upahai le Midian upahai chu khuasâlna hrang, a man chôiin Balaama kuang an fea, khan Balaka iti khom kha an insîr pea.

⁸Khanchu Balaama’n an kuang, “A vuan zân hi hin riak unglân, nangtûk RENGPA’N keima kuanga a ihrilhai chu, nangni insîr pe ki ti,” a tia. Khan Moab upahai chu Balaama kuang an riak tâka.

⁹Khanchu Balaama kuang Pathian a zuanga, a kuang, “Ni kuanga omhai hi tuhai mo an ini?” a tia.

¹⁰Balaama’n Pathian kuang, “Moab rêng Balaka’n a hong tîrhaia

¹¹irngai ro, Aigupta rengata mi honghai chu ram pumpui hi an sip zoi tâka, hongin lân, khua ni va sâl pehai ro, kin hnêhaia, ki ram ata kin hnotsuakhai theina hrangin,” a tia.

¹²Khanchu Pathianin Balaama kuang, “An kuang ni ife hrang ni maka, kha mihai kha khua khom ni isâlhai hrang ni ma; ki satvurna an chunga a iom kêng,” a tia.

¹³Khanchu Balaama kha zînga a thoia, Balaka upahai kuang a fea, an kuang, “Nin ram tiang kîr nôk ta roi, RENGPA’N nin kuanga fe hi ni phal ma,” a tia.

¹⁴Khanchu Balaka kuang an kîr nôka, Balaama’n a hong izui nuam loi thu an inhrila.

¹⁵Khanchu Balaka upa inlal ualhai matona nêka tam a tîrhai nôka.

¹⁶Khanchu Balaama kuang an fea, Balaka he bê kha an va hrila, a kuang, “Balaka’n hiang hin a ti, ‘Ki kuanga ni ihong hrang hi ite khâl no ri se,’

¹⁷mi roiinpui takin nang siam ki ta, ki kuanga ni iti kai chu tho ki ti. Khasikin hong suak hrâmin lân, hi mihai hi khua ni va sâl pehai ngêt ro,” an tia.

¹⁸Khannisian Balaama’n Balaka mihai chu a sâma, an kuang, “Balaka’n a in sûnga tangka le rângachakhai hi ni pe ving hrang ni khomsian, i ang khomin RENGPA ki Pathian thu chu zôm loiin om thei no ning.

¹⁹Khannisian a vuan zân, hi hin riak nôk phot unglân, RENGPA’N ki kuang imo a hril nôk ngân,” a tia.

²⁰Kha zâna khan Pathian chu Balaama kuang a zuanga, a kuang, “Hi mihai hi nang a koia zuang an ni’n chu, irsiamin lân, zuihai ro, khannisian ni kuanga tho roh nang ki iti vai hi tho ro,” a tia.

²¹Khanchu Balaama chu zîng nôka chu a sakuartung chu a’rsiam infela, Moab upahai chu a zuihai tâka.

²²Khanchu a fe sika khan, Pathian ning a zuan mur pea, RENGPA vântirtôn chu zuang khap hrangin lampuia a lei ngîra. A sakuartung chunga chuang a nia, a sinthotuhai inhni a kuang an om saa,

²³sakuartung khan RENGPA vântirtôn khandai chôia lampuia ngîr chu a hmua, lampui ata kha a pêta, ramkâr tiang a fe tâka; khan Balaama’n lampui tianga fe hrangin a sakuartung kha a vîka.

²⁴Khanchu vântirtôn kha grep irhuan inhni lai taka lampui irchêpna taka a ngîra.

²⁵Khan sakuartung khan RENGPA vântirtôn kha a hmua, bang kha a va hnenga, Balaama ke chu bang leh khan a epbea, khanchu Balaama’n a vîka.

²⁶Khan, RENGPA vântirtôn khan a khêl viata a fe nôka, lampui irchêpna taka, chang tiang le vei tiang, a lôina taka a ngîr pe nôka.

²⁷Khanchu sakuartung khan RENGPA vântirtôn chu a hmua, Balaama kha an bokpui raka, khan Balaama chu ningmurin khianghrol leh sakuartung kha a vîk nôka.

²⁸Khanchu RENGPA’N sakuartung kha an chongtira, Balaama kuang, “Imo nang ki itho pe, hianga voithum reng ni ni ivîk tâk hi?,” a tia.

²⁹Balaama’n sakuartung kuang khan, “Deng ni nin theitir sika a ni, khandai chôi sa len vâng inlân chu, nang that ta ki ti,” a tia.

³⁰Sakuartung khan Balaama kuang, “A vuan sûn tena ni ichuangna ngai sakuartung kha mo ni ma ung? Hiang hin mo nang ki lei lo ta ngaia?” a tia. Ama’n, “Ni la lo ngai mak che,” a tia.

³¹Khan RENGPA’N Balaama mit chu a hon vârtir pea, khanchu RENGPA vântirtôn khandai chôia lampuia ngîr chu a hmu tâka. A kûna, a lu irnêng sikin an bok rak tâka.

³²Khanchu RENGPA vântirtônin a kuang, “Itho mo hianga ni sakuartung voithum ni ivîk? Irngai ro, ni tho dân hi ki mithmua a dik no sikin nang lei khap hranga zuang ki ni.

³³Ni sakuartungin a ni hmua, ki makung ata voithum a ipêt a ni kha te; la pêt loi ni sianlân chu, nangma kêng nang ki ithat hrang,” a tia.

³⁴Balaama’n RENGPA vântirtôn kuang, “Ki lei itho’nsual a ni ta, ni khap hrangin ki lampuia ni ngîr ti lak inhre ma unga, khasikin ni nuam noa ni’n chu kîr nôk zel ta ki ti,” a tia.

³⁵Khanchu RENGPA vântirtônin Balaama kuang, “Hi mihai hi zuiin lân, khannisian hril hranga nang ki iti vai hi tho ro,” a tia. Khanchu Balaka upahai kha a zuihai tâka.

³⁶Khan, Balaka’n Balaama a hong ti an hriatin chu, Arnon tianga an ramri tena a lei va dona.

³⁷Balaka’n Balaama kuang, “Itho sika mo nang ki hong koi masa khan ni ihong loi? Mi roiinpui takin nang ki isiam thei mo ni ma?,” a tia.

³⁸Balaama’n Balaka kuang, “Irngai ro, ki ihong mo ni ta ma, khannisian i thuneina ual mo ki neia? Pathianin hril hrang a ni iti pe vai hi kêng ki ihril hrang,” a tia.

³⁹Khanchu Balaama kha Balaka kuang a fea, Kiriath-huzoth an va tunga.

⁴⁰Khanchu Balaka chu sehrât le kêlbelra leh a’rbôla, a hmê chu Balaama le a kuanga upa omhai kha a pêka.

⁴¹Khanchu zîng khovâr mâka chu Balaka’n Balaama chu a hruaia; Baal hmun irsâng tianghai a fepuia, khatak ata kha Israel mipui murdihai kha a va hmuhaia.