Read Hrangkhol NAMBAR 29 Bible Online

NAMBAR 29 - Hrangkhol bible

NAMBAR 29

¹Khanchu tha sarina sûn masa tak nia Pathian biak hrangin irbûm nin ta, sin rêng rêng nin izong hrang ni mah. Kha nî khan bekul chu tum ni a ti.

²RENGPA ta hranga mirimhoi pum hâlirvôm thilinhlan chu hiang hin inhlan roi. Sehrâtchal tuai inkhat, belrachal inkhat, belrate a chal kum khat mi sari inhlan nin ti.

³Baidi thilinhlan oliv hriak leh irzêl, hiang hin inhlan roi; sehrâtchalhai kha baidi her thum leh inhlan nin ta, belrachalhai kha baidi her hni leh inhlan nin ti.

⁴Belratehai chu baidi her khat le inhlan nin ti.

⁵Khabana, sual irbôlna hrangin kêlchal inkhat inhlan nin ta, khaang khan mipuihai thâr irthiangna chu tho nin ti.

⁶Hihai hi tha khatna sûn maton taka pum hâlirvôm thilinhlan le baidi thilinhlan le a nitina pum hâlirvôm thilinhlan le baidi thilinhlan le uain thilinhlan ti bana chu nin inhlan hrang chu a ni. Hi fâk chi thilinhlanhai hi RENGPA ta hranga mirimhoi chu a ni.

⁷Khan, tha sarina sûn sômna nia khan chu, ite fa no unglân, i sin khom nin izong sa hrang ni mah.

⁸RENGPA kuang mirimhoi pum hâlirvôm thilinhlan, hiang hin inhlan roi. Sehrâtchal tuai inkhat, belrachal inkhat le belratechal kum khata sari inhlan nin ta, an rêngin demnaboi an ini hrang a ni.

⁹Baidi thilinhlan hriak leh irzêl, hiang hin inhlan nin ti. Sehrâtchal leh khan baidi her thum inhlan nin ta, belrachal leh khan her hni inhlan nin ta,

¹⁰belrate leh khan her khat seng inhlan nin ti.

¹¹Khanchu mipuihai thâr irthiangna hranga kêl inhlana om le a nitina pum hâlirvôm thilinhlan le baidi thilinhlan le uain thilinhlan ti bana sual irbôlna hrangin kêl inkhat inhlan sa nin ti.

¹²Tha sarina sûn sômhleiringa nîin inkhômpui irthiang nei nin ta; sin rêng rêng nin izong hrang ni mah. RENGPA ta hrangin sûn sari kût nin inei hrang a ni.

¹³Khanchu RENGPA ta hranga mirimhoi meia thilinhlan pum hâlirvôm thil nin inhlan hrang a ni. Sehrâtchal tuai sômhleithum, belrachal inhni, belrachal kum khata sômhleiminli; demnaboi an ini ngêt hrang a ni.

¹⁴An baidi thilinhlan hriak leh irzêl, sehrâtchal sômhleithum, sehrâtchal inkhata epha hmun sôma sena hmun thum, belrachal inhni, belrachal inkhat hmun sôma sena hmun hni;

¹⁵belrate sômhleiminli, belrate inkhata hmun sôma sena hmun khat;

¹⁶sual irbôlna hrangin kêlchal inkhat le, pum hâlirvôm thilinhlan, khataka baidi thilinhlan uain thil inhlan bana khan.

¹⁷Sûn hni tena chu sehrâtchal tuai sômhleihni, belrachal inhni, belrate a chal kum khata demnaboi sômhleiminli an inhlan hrang a ni.

¹⁸An baidi thilinhlan le uain thilinhlan a dân ang takin an tam lam izirin sehrâtchal ta hrangin, belrachal ta hrangin, belrate ta hrangin;

¹⁹sual irbôlna hrangin kêlchal inkhat le pum hâlirvôm thilinhlan le khataka baidi thilinhlan, uain thilinhlan tep sa loiin.

²⁰Sûn thum ni chu sehrâtchal sômhleikhat, belrachal inhni, belratechal kum khat mi demnaboi sômhleiminli;

²¹an baidi le uain thilinhlan a dân ang taka an tam lam ang izirin sehrâtchal ta hrangin;

²²sual irbôlna hrangin kêlchal inkhat le pum hâlirvôm thilinhlan, khataka baidi thilinhlan le khataka uain thilinhlana tep sa loiin.

²³Sûn minli nî chu sehrâtchal sômkhat, belrachal inhni, belrate a chal kum khat mi demnaboi sômhleiminli,

²⁴baidi le uain thil inhlan a dân ang takin an tam lam angin sehrâtchal ta hrangin le belrate ta hrangin;

²⁵sual irbôlna hrangin kêlchal inkhat le pum hâlirvôm thilinhlan le baidi thilinhlan le uain thilinhlan tep loiin.

²⁶Sûn ringa ni chu sehrâtchal kuak, belrachal inhni, belrate a chal kum khat mi demnaboi sômhleiminli;

²⁷an baidi thilinhlan le uain thilinhlan dân ang takin an tam lam izirin sehrâtchal ta hrangin, belrachal ta hrangin belrate ta hrangin.

²⁸Sual irbôlna hrang kêlchal inkhat le pum hâlirvôm thilinhlan le khataka baidi thilinhlan le uain thilinhlan tep loiin.

²⁹Sûn ruk nî chu sehrâtchal kiriat belrachal inhni, belrate kum khat mi demnaboi sômhleiminli,

³⁰an baidi thilinhlan le uain thilinhlan, dân angin an tam lam izirin sehrâtchal ta hrangin, belrachal ta hrangin, belrate ta hrangin.

³¹Sual irbôlna hrangin kêlchal inkhat le, pum hâlirvôm thilinhlan, baidi thilinhlan le uain thilinhlan tep loiin.

³²Sûn sari nî khan sehrâtchal sari, belrachal inhni, belrate a chal kum khat mi demnaboi sômhleiminli,

³³an baidi le uain thilinhlan, a dân ang takin an tam lama izirin sehrâtchal ta hrangin, belrachal ta hrangin, belrate ta hrangin.

³⁴Sual irbôlna hrangin kêlchal inkhat le, pum hâlirvôm thil inhlan, baidi le uain thilinhlan tep sa loiin.

³⁵Sûn riat nî khan chu, inkhômpui roiinpui tak nei nin ta, sin nin izong hrang ni mah.

³⁶RENGPA ta hranga mirimhoi meia thilinhlan pum hâlirvôm thilinhlan chu nin inhlan hrang a ni. Sehrâtchal inkhat, belrachal inkhat, belrate a chal kum khat mi demnaboi sari;

³⁷an baidi le uain thilinhlan, sehrâtchal ta hrangin, belrachal ta hrangin, belrate ta hrangin a dân ang takin a tam lama izirin;

³⁸sual irbôlna hrangin kêlchal inkhat le pum hâlirvôm thilinhlan, baidi thilinhlan le uain thilinhlan tep loiin.

³⁹Nin chonginkunghai, nuam thua thilinhlan hai, nin pum hâlirvôm thilinhlan, nin baidi thilinhlanhai, nin uain thilinhlanhai, nin baidi thilinhlanhai, nin uain thilinhlanhai, nin irngeina thilinhlanhai bâka khan hihai hi nin zoro inkung kût, nin nei nia RENGPA kuanga nin inhlan hrang a ni, tiin.

⁴⁰RENGPA’N Mosia thu a ipêk murdihai kha Israel irchihai kha an hrilhai tâka.