Read Hrangkhol NAMBAR 30 Bible Online

NAMBAR 30 - Hrangkhol bible

NAMBAR 30

¹Mosia’n Israel irchihai laia hruaituhai a chongpuihaia, hi hi a ni, RENGPA thupêk chu,

²pasalin RENGPA kuang thilpêk hranga chonginkungna neiin mani, aninole thil senkhat irser hranga chonginkungna neiin mani a lei oma nî’n chu, a chonginkung kha inchâi loiin a inkung ngêt hrang a ni.

³Khan nupang khom a pa ina a la om laiin RENGPA kuang thilpêk hranga chonginkungna neiin mani, aninole thil senkhat irser hranga chonginkungna neiin a lei oma ni’n chu,

⁴a chonginkung kha inchâi loiin a inkung ngêt hrang a ni. a pa khan kha chonginkungna an hriatpuia a nuampui photin chu.

⁵Khannisian a pa khan, kha chonginkungnahai an hriata, a nuampui noa ni’n chu, chonginkung ual nang no ni: RENGPA’N ama chu ngaidam a ti, a pa khan a nuampui no sikin.

⁶Khan dôngmate’n inhre chachakin mani, aninole a hnung a mân ngaitua loiin mani, thil senkhat rengata irser hrangin thu a lei inkunga, khannisian pasal a lâka ni’n chu,

⁷a chonginkung kha a izoi ngêt hrang, a pasalin an hriata, a khap noa ni’n chu.

⁸Khannisian a pasalin an hriata a khapa ni’n chu, a chonginkunghai kha an kung ual nang no nia, ama chu RENGPA’N ngaidam a ti.

⁹Meithâiin mani, aninole pasal imâk hnung nupangin mani, thil senkhat irser hranga chong an kunga ni’n chu, a chonginkung kha a isua ngêt hrang a ni.

¹⁰Khan nupang pasal nei tâkin thil senkhat irser hranga chong an kunga ni’n chu,

¹¹a chonginkunghai chu a isua ving hrang a nia, a pasalin an hriata, a khap no phota ni’n chu.

¹²Khannisian a pasalin an hriata a khapa niin chu, a chonginkung kha sua ual nang no ni. Ama chu RENGPA’N ngaidam a ti. A pasalin a khap tâk sikin.

¹³A pasalin a chong len kungna kha inkungtirna le hnôl theina ircham a nei sikin.

¹⁴Khannisian a chonginkungna kha an hriatpuia, ite nuampuiloina a nei no’n chu, a chonginkunghai kha a isua ngêt hrang a ni. An hriatpuia a khap loina khan a chonginkung kha an detpui tihna a ni sikin.

¹⁵Khannisian an hriat zel noa, inhnunga a khap nôka ni’n chu, a pualoina mô chu a lu chunga irnghat a ti, tiin.

¹⁶Hihai hi pasal le nupang kâra le pa le nâi dôngmate, a pa ina a la om laia an kâra dân hranga RENGPA’N Mosia a ipêk chu a ni.