Read Hrangkhol NAMBAR 31 Bible Online

NAMBAR 31 - Hrangkhol bible

NAMBAR 31

²“Israel irchihai chunga an sin thônahai sikin Midian mihai chu hremhai ro, khanchu kha thil kha ni tho zoi tika nangma chu nir chihai kuang hruaiin om ta ni ti,” a ti pea.

³Khanchu Mosia’n mipuihai chu a hrilhaia, “RENGPA chunga an sinthohai sika khan Midian mihai doi hrangin, irsiam roi.

⁴Israel panam tin lai ata irdoi hrangin mi sângkhat chit nin itîrhai hrang a ni,” a tia.

⁵Khanchu panam tin ata kha mi sângkhat chit an inthang suakhai tâka, irdoi hrangin an rêngin mi sîngkhat sânghni an ni.

⁶Khan Mosia’n ochai Eleazara nâipa Finehasa thil irthianghai enkoltu hrangin le bekulhai tuma thupêktu ni hrangin irdoina khan a tîrhai tâka.

⁷RENGPA’N Mosia thu a ipêk lam ang takin Midian mihai chu an doihaia, pasal murdi chu an thathai tâka.

⁸Midian rêng ringa hai, Evia, Rekema, Zura, Hura le Reba hai khom an thathai sa tâka. Beora nâipa Balaama khom an that sa ta.

⁹Israel mihai khan, Midian nupanghai le nâipanghai chu chelhaiin sala an hruaihaia, khan an sâ murdihai an belra murdihai le an irchonhai chu an lâk pehai ving tâka.

¹⁰Khanchu an riakbukhai le an khopui lianhai kha an hâl pehai ving tâka.

¹¹Mihriam le sa le an râllâk murdi fepuihaiin.

¹²Mosia le Eleazara le Israel mi murdi Jeriko irdîna Jordan dung kôla Moab phâia an riakbuk tiang an hong chôihaia.

¹³Mosia, Eleazara le Israel nam hruaitu murdihai chu an riakbuk ata suakin sipaihai an lei doihaia.

¹⁴Khan, Mosia chu sipai hruaituhai irdoina ata honghai chunga khan a ning an mura.

¹⁵Khanchu Mosia’n an kuang, “Itho mo nupanghai hi a hringa nin la ihôihai hi?

¹⁶Irngai roi, Balaama thupêk zômtuhai kha nupanghai hi an nia, Peor hmuna khan mipuihai chu RENGPA chunga an inchâitirhaia, khasik taka khan RENGPA’N mipuihai chu hripuiin a insiathai a ni kha.

¹⁷Khasikin nâipang pasal murdi le nupang mi izâlpui tâk kai chu thathai ving roi.

¹⁸Khannisian nupang mi la izâlpui loihai kai chu nin ta hrangin hôihai roi.

¹⁹Khanchu khohnôma sûn sari riak unglân, tukhom mithi ruak tôntuhai kai chu sûn thum ni le sûn sari ni khan thâr irthiang nin ta, nangni le suaka nin ichelhai leh khan.

²⁰Khanchu silkai murdi le thil dang savun leh mani, kêl mul leh mani, thing leh mani, siama omhai chu nin irthâr irthiang sa hrang a ni,” a tia.

²¹Khan ochai Eleazara’n irdoina hmuna fe irdoi mihai kuang khan, “Hi hi RENGPA’N Mosia kuanga thu a ipêkhai chu a ni.

²²Rângachak mani, tangkarua mani, sumsen mani, thîr mani, meiin a ikâng insiat thei loihai kai chu mei leh thâr irthianghai nin ta, khan thil dang rêng rêng chu tui kathâr leh thâr irthianghai nin ti.

²³

²⁴Khan, a sûn sari nî khan nin puanhai sôp nin ta, khanchu Pathian dân angin irthiang hong ni ta nin ta, riakbuka lût thei ta nin ti,” a tia.

²⁵RENGPA’N Mosia a chongpuia,

²⁶“Nang le ochai Eleazara le panam hruaituhai le, mihriam le an sa râllâka an ilâkhai kha tep ving unglân,

²⁷râla thihai kha hmun hniin senhai unglân, sipai irdoina fehai leh mipuihai kuang sem roi.

²⁸Khan irdoina fe sipaihai dongtum ata kha RENGPA ta hrangin mihriam nâi, sa mani, sakuartung mani, kêl mani, aninole belra mani khom ni sian, irzaringa laia inkhat nin isia hrang a ni.

²⁹Khan ochai Eleazara kuang RENGPA ta hranga ngaihoi thilinhlan hrang pe roi.

³⁰Khan Israelhai dongtum ata kha sômringaa inkhat mihriam khom ni sian, sa khom ni sian, sakuartung khom ni sian, kêl khom ni sian, belra khom ni sian la nin ta, kha kha RENGPA Biakbuk enkoltu Levi irchihai kuang nin ipêk hrang a ni,” a ti pea.

³¹Khan Mosia le Eleazara’n RENGPA thupêk ang takin an tho tâka.

³²Hihai hi sipaihaiin irdoinaa râllâk thil an ta hrang chit an lâk hnunga a la omhai chu a ni. Kêlbelra le kêl nuairuk sîngsari le sângringa, sial sîngsari sânghni, sakuartung sîngruk sângkhat le pasal la izâlpui loi nupang sîngthum sânghni an ni.

³³

³⁴

³⁵

³⁶Khan a chimrip irdoina hmuna fe sipaihai dongtum kai chu nuaithum sîngthum sângsari le irzaringa, belra le kêl an nia, khatak ata kha RENGPA ta hranga ipêka om kai chu irzaruk sômsari ringa a ni. Khan sial chu sîngthum le sângruk a nia, sômsari inhni chu RENGPA ta hranga a ni. Khan sîngthum irzaringa sakuartung a nia, khatak ata kha sômruk inkhat chu RENGPA ta hrang a nia; khan dôngmate irthiang sîngkhat le sângruk an nia. khatak ata kha sômthum inhni chu RENGPA ta hrang an ni.

³⁷

³⁸

³⁹

⁴⁰

⁴¹Khanchu RENGPA’N thu a ipêk lam angin Mosia’n RENGPA ta hranga ngaihoi thilinhlanhai chu Eleazara kuang a pêk tâka.

⁴²Khan, mipuihai dongtum khom chu sipaihai dongtum leh khan a ir-ang maia. nuaithum sîngthum sângsari le irzaringa belra le kêl a nia, sîngthum sângruk sial a nia, sîngthum irzaringa sakuartung a nia, dôngmate irthiang mi sîngkhat sângruk an ni sa.

⁴³

⁴⁴

⁴⁵

⁴⁶

⁴⁷Khan Mosia’n hi thilhai rengata hi sômringa sûnga inkhat chu mihriam khom ni sian, sa khom ni sian RENGPA thupêk lam angin RENGPA Biakbuk enkoltu Levi mihai chu a pêka.

⁴⁸Khan sipai hruaituhai chu Mosia kuang an va fea.

⁴⁹Mosia kuang, “Ka pu kin kuta om sipaihai chu kin tephaia, tûte irhmang mahai.

⁵⁰Khasikin kin hringna ta hrangin RENGPA kuang thilinhlana inhlan hrangin râllâk thil kin ilâkhai, rângachaka siam bânhrial hai, kutsabi hai, kuarkâi hai, irthei hai, chu kin hong ichôi a ni hi,” an tia.

⁵¹Mosia le Eleazara’n rângachaka siam tukrivo neinunhai chu an lâka.

⁵²Sipai hruaituhai thilinhlan murdi chu her irzahni vêl a ni.

⁵³Khan sipai hruaitu ni loihai khan chu an râllâk thilhai kha an ta hrangin an sia chita.

⁵⁴Khanchu Mosia le Eleazara’n rângachakhai kha Israel irchihai inhriat maina hrangin irtongna Biakbuka RENGPA makunga an chôi tâka.