Read Hrangkhol NAMBAR 34 Bible Online

NAMBAR 34 - Hrangkhol bible

NAMBAR 34

¹Khan RENGPA’N Mosia kuang,

²Israel mipuihai ta hrangin hi thu hi a pêkhaia: “Ram nangni ki ipêk, Kanaan ram chu nin tung tena, nin ramri hrang chu hiang hi ni a ti.

³Sim tiang ramri chu Tuipui thi hekna rengata sak tiang pang ni a ta.

⁴Khan nin ramri chu Akrabim hai fena sim tiang khan kôi a ta, Zin fe pat a ta, kha a hong suakna chu Kades-barnea sim tiang ni a ti.

⁵Khan Hazaradhara fe pat a ta, Azmon-a dên thaiin; khan ramri chu Azmon ata kha Aigupta tuidung dênin kôi a ta, a suakna chu Tuikhangliana ni a ti.

⁶Khan nitâk tianga ramri hrangin Mediteranean tuipui ata thengthai a ta, Hor tâng huam sa a ti.

⁷Khan hmâr tianga ramri chu Mediteranean Tuipui ata thengthaiin Hor tâng huam sa a ta,

⁸Hor tâng ata kha Hamath lûtna dênin siam ni ta, khan ramri suakna chu Zedad ni a ti.

⁹A ramri chu Zedad ata kha Zefron fe thengin Hazar Enana sun a ti, kha kha hmâr tianga ramri kha ni a ti.

¹⁰“Khan, nisua tianga ramri chu Hazar Enana ata kha fe nôk a ta, Sefam dênin.

¹¹Kha rengata kha Harbel sak tiang, Ain nisua tiang fe a ta, Galili tuipui nisua tâng dung hro a ti.

¹²Kha rengata kha Jordan tuidung sim tiang hroin Tuipui thi dênin ni a ti. Hi irki minli hi nin ramri ni a ti, ti ro,” tiin.

¹³Khan Mosia’n Israel irchihai chu thu a pêka, “Hi hi RENGPA’N panam kuak le a chimriphai pe hranga a inkung, tasâna nin irsem hrang chu a ni.

¹⁴Reubena le Gada le Manasea panam chimriphai khomin.

¹⁵Khan Jeriko irdîn Jordan nisua tiang pang an lei dong tâk sikin,” a tia.

¹⁶Khanchu RENGPA’N Mosia kuang,

¹⁷“Ochai Eleazara le Nuna nâipa Josua’n ram chu mipuihai lei sem an ta,

¹⁸khanchu nam tin ata hruaitu inkhat chit an ni san hrangin lahai sa ro,” a tia.

¹⁹Juda panama hruaitu Jefunea nâipa Kaleba,

²⁰Simeona panama irchi Amihuda nâipa Semuela,

²¹Benjamina panam hruaitu Kislona nâipa Elidada,

²²Dana panama hruaitu Joglia nâipa Bukkia,

²³Manasea panama hruaitu Efoda nâipa Haniela,

²⁴Efraima panama hruaitu Siftana nâipa Kemuela,

²⁵Zebulun panama hruaitu Parnaka nâipa Elizafana.

²⁶Isakara panama hruaitu Azana nâipa Paltiela

²⁷Asera panama hruaitu Selomia nâipa Ahihuda,

²⁸Naftalia panam ata hruaitu Amihuda nâipa Pedahela.

²⁹Hihai hi RENGPA’N Kanaan rama Israel irchihaiin ram an ilua hranga semtu hranga inthanghai chu an ni.