Read Hrangkhol NAMBAR 4 Bible Online

NAMBAR 4 - Hrangkhol bible

NAMBAR 4

¹Khan, RENGPA’N Mosia le Arona kha a chongpuihaia,

²“Levi irchihai laia Kohatha mihai kha an panam le an insûngkuaa om dôr tephai unglân,

³irtongna Biakbuka sintho thei hrang pasal kum sômthum le sômringa kâra mi chu tephai ving roi.

⁴Irtongna Biakbuk hmun irthiang taka Kohatha mihai sintum chu hihai hi a ni.

⁵Riakbuk irthonna a om hrang tika chu, Arona le a nâipasalhaiin hmun irthianga Thuthung Bôm maton tianga puanzâr kha lapai an ta, Thuthung Bôm kha irkhû an ti.

⁶Kha kha savun leh inkhumtir an ta, kha zoia chu a chung taka khan puan dum leh inkhum sa an ta, a zônfung khom inkhop an ti.

⁷Khanchu inentirna bai dokâng chunga khan khêng hai, mirimhoi siana khuri hai, khilât ir-ûm le uain thilinhlanna khilât lianhai sia an ta; kha dokânga khan bai kha chu a iom mai hrang a ni.

⁸Kha kha puan a seninlâr leh irkhu an ta, savun leh tuam an ta, khanchu a zônfunghai kha inkhop an ti.

⁹Khanchu meiserhai leh a toina hranghai khom meichephai, a’rvut siana hai, le oliv hriak siana hai chu puan dum leh irkhu an ti.

¹⁰Khahai kha a neinun le savunin infûn an ta, a’rzônna khom sia an ti.

¹¹“Kha hnung chu rângachak maichâm kha puan dum leh irkhu an ta, savun leh irkhu an ta, a zônfung khom inkhop an ti.

¹²Hmun irthianga bêl le bûrhai kha puan dum leh infûn an ta, savun irkhu an ta, a zônfung khom inkhop an ti.

¹³Maichâma meirivâm kha luakpai an ta, a chunga puan senduk irkhu an ti.

¹⁴A chunga khan maichâma an sin thônahai kha meiri-al indomna hai, meichep hai, luakor leh tâbor hai kha sia an ti, savun leh irkhu an ta, a zônfung irbun an ti.

¹⁵Khanchu riakbuk irthon hrang tika chu, Arona le a nâipasalhai khan neinun irthiang murdi kha an inkhumhai zoi tena chu Kohatha mihai chu a’rzôn hrangin hong an ti. Kohatha mihai khan neinun irthiang kha an itôn hrang ni ma, an thi loina hrangin. Hihai hi irtongna Biakbuk Kohatha mihai mophurna chu a ni.

¹⁶Ochai Arona nâipa Eleazara sintum chu meiser inchokna hranga sahriak hai, mirimhoi hai, baidi thilinhlan hai, ir-al theina hriak hai le RENGPA kuanga thil tinrêng inhlanna hai tho hi a ni,” a tia.

¹⁷Khanchu RENGPA’N Mosia le Arona kha a chongpuihai nôka,

¹⁸“Kohatha irchihai panam chu Levi irchihai ata boi loiin,

¹⁹thil irthiang saihai kôla an honga, an ithi hrang hi phalhai no roi, kha thil khan a dêhai loina hrangin, Arona le a nâipasalhai kha a sûnga lût an ta, mi tinin an itho hrang le an ipêl hrang dân chu hrilhai an ti.

²⁰Khannisian Kohatha irchihai kha lûtin ochaihaiin thil irthiang an irkhu lai kha an va en hrang ni ma, an thi loina hrangin,” a tia.

²¹Khan, RENGPA’N Mosia a chongpuia,

²²Gersona irchihai khom panam le insûngkua om dôr tephai ving roh.

²³Irtongna Biakbuka sintho thei hrang pasal kum sômthum ata sômringa kâra mihai chu tephai ving roh.

²⁴Gersona irchihai sintum chu hihai hi ni a ti:

²⁵Biakbuk le irtongna ina puan zârhai chung irkhumna hai, savun a chung taka inkhumna hai, a kotbâia puanzâr hai,

²⁶Biakbuk kholâia puanzârhai le maichâm kôla puanzârhai a kholâi lûtna kotbâia puanzârhai le a neinun dang murdi chu irzôn an ta, kha thila la nang danghai chu tho ving an ti.

²⁷Mosia le Arona’n Gersona mihai khan an sintumhai thoin, Arona le a nâipasalhai chôi hrang an itihai kha an tho le tho loi en an ti.

²⁸Khahai kha irtongna Biakbuka Gersona mihai sintum chu a nia, an sintum tak chu ochai Arona nâipa Ithamara’n inkung pehai a ti.

²⁹RENGPA’N Mosia kuang, Levi mihai laia Meraria panamhai khom a in sûngkuaa om dôr tephai ving roh.

³⁰Irtongna Biakbuka sintho thei hrang mi pasal kum sômthum le sômringa kâra mi chu tephai ving roh.

³¹Irtongna Biakbuka sintum chu hihai hi a ni; Biakbuk thingphêk hai, tângkhang hai, chopui hai, a’rnghatna bul hai,

³²a mikot irkulna chopui hai, a’rnghatna bul hai, a hêmfung hai, a hrui hai le neinun dang murdi irzôn hrang nih a ta, an irhming indangin an sintum ni indang pehai hrang a ni.

³³Hihai hi Meraria namhaiin Biakbuka an sintum chu a ni: ochai Arona nâipa Ithamara enkolna hnuaia irzôn ngai an ti.

³⁴RENGPA thupêk angin Mosia, Arona le Israel hruaituhai khan Levi irchia panam inthumhai,

³⁵Kohatha, Gersona le Meraria hai chu an tephai tâka. A panam le a in sûngkuain puan ina sintho thei hrang pasal kum sômthum ata sômringa kâra mi kai chu an tephai vinga.

³⁶A panama tephai chu sânghni irzasari le sômringa an ni.

³⁷Khahai kha an ni, irtongna puan ina sintho ngai, Kohatha irchia an itep, Mosia hmanga RENGPA thupêk Mosia le Arona itephai chu.

³⁸Gersona nâipasalhai irtongna puan ina sintho hranga hmu zâthai chu.

³⁹A panam dungzui angin kum sômthum ata a chung tiang kum sômringa mi tena tep an ni.

⁴⁰An nam le insûngkuaa an itephai chu sânghni irzaruk le sômthum an ni.

⁴¹Annihai kha Gersona nâipasalhai irtongna puan ina sinthohai chu, RENGPA thupêk angin Mosia le Arona’n an itephai chu,

⁴²Meraria nâipasalhai irtongna puan ina sintho hranga hmu zâthai chu,

⁴³kum sômthum ata kum sômringa mi ten tep an ni.

⁴⁴A insûngkua puma an itephai chu sângthum irzahni an ni.

⁴⁵Annihai kha, anni Meraria nâipasalhai Mosia hmanga RENGPA thupêk anga Mosia le Arona’n an itephai chu,

⁴⁶Levi irchihai irtongna ina sintho hranga mi pêl thei hranghai chu.

⁴⁷A nam le insûngkua angin kum sômthum ata sômringa mi ten Mosia, Arona le Israel hruaituhai itep zât chu an ni.

⁴⁸An itephai chu sângriat irzaringa le sômriat an ni.

⁴⁹Mosia hmanga RENGPA thupêk angin mi tin an thotum le an sintum dungzuia tep an ni. RENGPA’N Mosia thu a ipêk ang taka a itephai chu an ni.