Read Hrangkhol NAMBAR 5 Bible Online

NAMBAR 5 - Hrangkhol bible

NAMBAR 5

¹Khan RENGPA’N Mosia a chongpuia,

²“Israel irchihai kha riakbuk ata kha inphâr murdi, thilsual thohai le mithi sika porinchehai chu inhnotsuak ving hrangin thu pehai roh.

³Hianga porinchehai hi chu kêlsuapaihai ro, ki mihai laia ki omna riakbuk kha an porinchetir loina hrangin,” tiin.

⁴Israelhaiin khaang khan an thoa, riakbuk ata kha an kêlsuahaia.

⁵RENGPA’N Mosia a chongpuia,

⁶“Israel irchihai kuang hiang hin hril ro, pasalin mani, nupangin mani, RENGPA chunga iamomna nei loiin, mi chunga tho’nsualna a neiin chu, kha mi kha theiloi chang hrang a ni.

⁷A tho’nsualna sikin thupha chôi a ta, a tho’nsualna man chu irkip takin tuam a ti; hmun ringa senin hmun khat, a tho insualnapa kha pe sa a ti.

⁸Khannisian kha mi kha a lei thia, tho’nsualna man bêna hrangin sûngsuak irnaipui a nei noa ni’n chu, RENGPA kuang inhlan a ta, ochaihai dongtum ni a ti. Hi tho’nsualna man hi thâr irthiangtirna hrangin kêlbelrachal a la ichôi sa hrang a ni.

⁹Khanchu Israel irchihaiin thil irthiang RENGPA kuang an inhlan murdi chu ochai an ipêkpu takpa dongtum ni a ti.

¹⁰Mi tinin thilinhlan ochai kuanga an ipêkhai kai chu a dongtum ni a ti,” a tia.

¹¹RENGPA’N Mosia a chongpuia,

¹²“Israel irchihai kuang hrilin lân, an kuang, mi’n a dôngma kha an ika, mi dang leh siatin ama le ama a porinche angin bê ta sian, kha thil kha inhriatpuitu leh a tho lai taka chelin mani om loiin, a pasal kha ip ta ang sianlân; aninole, a pasalin hnarsana’n mani, irthiang chachaka om kha irthiang loi angin lei bê ta sianlân;

¹⁵A kho khom kha lei ni ta sian, pasal khan a dôngma chu ochai kuanga hruai a ta, khabana thilinhlan hrangin baidi Epha hmun sôma senin hmunkhat chôi sa a ta, sahriak a ibuak hrang ni maka, mirimhoi khom a chunga khan a isia sa hrang ni ma; thudik inlangna hrangin pasal inhnina neitu rengata thilinhlan a ni sikin.

¹⁶Ochai khan nupang kha maichâm makunga khan inngîrtir a ti.

¹⁷Ochaiin pil bêla tui irthiang luak a ta, Biakbuk hnuaia pildi la nôk a ta, tuia khan phul a ti.

¹⁸Ochai khan nupangnu kha RENGPA makunga inngîrtir a ta, a samtol insûttir a ta, baidi thilinhlan kha a kuta inchôitir a ti.

¹⁹Khanchu ochaiin nupang kha khomâkirsâmtir a ta, a kuang, “Ni uire noa ni’n chu kho sâl intungtirtu, hi tui khâ rengata hi zôk ni ti.

²⁰Khannisian ni uirea ni’n chu, zôk no chi ni,” a iti hrang a ni.

²¹Khanchu ochaiin nupang kha khomâkirsâmtir a ta, a kuang, “RENGPA’N ni malpui inchîntir a ta, ni phîng an vûngtira ni’n chu RENGPA’N nir chihai laia khomâk tongin nan omtir ri se.

²²Khomâksâm intungtirtu’n, hi tui hi ni rîla thun a ta, ni phîng invûngtir a ta, ni mal inchîntir a ti,” ti a ta. Khanchu nupang khan, “Amen, Amen,” a lei iti hrang a ni.

²³Khan ochai khan kha khomâkirsâmhai kha lekhabua irziak a ta, tui khâa khan inchie a ti.

²⁴Khanchu nupang kha khosâl intungtirtu tui khâ kha in intir a ti. Khanchu khosâlna intungtirtu tui kha a phîng sûnga lût a ta, a sân hong na pe ta a ti.

²⁵Khanchu ochai khan baidi thilinhlan kha nupang kut ata kha la a ta, RENGPA makunga baidi thilinhlan kha vôk a ta, maichâma khan chôi a ti.

²⁶Ochai khan baidi thilinhlan kha kut kângkhat la a ta, maichâma khan hâl a ta, kha zoiin chu nupang kha in intir a ti.

²⁷A lei uirea ni’n chu a sân a phîng hong na pe a ta, a phîng hon vûng pe a ta, a nâi vongna hong siat a ta, a mal khom hong chîn pe a ta, khanchu nupang kha a’rchihai laia khosâlin om a ti.

²⁸Khannisian a uire noa ni’n chu, ama chu insiattir no nia, nâi hong vong thei a ti.

²⁹Hi hi pasalin dôngma a hnarsâna le uirena thua a in-ikna chungchânga dân om chu a ni. Nupang kha maichâm kôla khan inngîrtir ni a ta, khanchu ochaiin hi dân ang hin a chunga tho a ti.

³¹Pasal kha chu theiloi changna ata zôk a ta, khannisian nupangin chu kha sualna mô chu pêl a ti.