Read Hrangkhol NAMBAR 7 Bible Online

NAMBAR 7 - Hrangkhol bible

NAMBAR 7

¹Khanchu Mosia khan Biakbuk kha an dingtir zoiin chu, Biakbuk le a neinunhai chu maichâm le neinun danghai kha hriak a nâla, a’rthiangtirhai ni khan.

²Israel panam laia hruaitu, irtepna sinthoa hruaituhai ngêt khan,

³RENGPA kuang an thilinhlanhai an hong chôia; tâli kiruk, hruaitu inhniin tâli, a chung om inkhat le sehrâtchal sômhleihni, hruaitu murdi’n inkha khat an inhlana, an inhlan zoiin chu,

⁴RENGPA’N Mosia a chongpuia,

⁵a kuang, “Hi thilpêkhai hi Biakbuk sinna hrangin lei pom pehai ro, Levi irchihai kuang, an sintum chit pehai ving ro,” a ti pea.

⁶Khanchu Mosia’n, tâli le sehrâtchalhai kha a lâka, Levi irchihai kuang a pêkhai tâka.

⁷Gersona irchihai kuang tâli inhni le sehrâtchal minli a pêkhaia.

⁸Meraria irchihai kuang tâli minli le sehrâtchal kiriat a pêkhaia, khanchu sin murdi kha Arona nâipa Ithamara enkolna hnuaia tho ni a ti.

⁹Khannisian Kohatha irchihai kha chu Mosia’n pehai ma, an sintum chu thil irthiang an dârsuama irzôn kha a ni sikin.

¹⁰Khan hruaituhai khom khan maichâm inhlan irthianga a om nî khan, thilinhlanhai an hong chôia; khanchu an thilpêkhai kha maichâma khan an siaa.

¹¹RENGPA’N Mosia kuang, “Sûn sôm hleihni sûng chu hruaituhai khan a nî tin an laia inkhatin thilpêkhai chu maichâm inhlanna hrangin an inhlan hrang a ni,” a tia.

¹²Sûn khat nia thilinhlan hrangtu chu Juda irchia mi Aminadaba nâipa Nasona a ni;

¹³a thilinhlan chu sumtak khêng khat, a rik lam chu sekel irzakhat sômthum, hmun irthianga sekel sômsari irangpui anga rik tâbor bôm khat fâk thei thilinhlan hranga hriak pol sai baidi sip khak khak;

¹⁴sekel sômkhat anga rik, mirimhoia sip rângachak khethûk inkhat;

¹⁵pum hâlirvôm thilinhlan hranga sehrâtchal tuai inkhat, belrachal inkhat, belrate a chal kum khat mi inkhat;

¹⁶sual irbôlna hranga kêlchal inkhat;

¹⁷khanchu irngeina irbôlna hranga thilinhlan sehrâtchal inhni, belrachal ringa, kêlchal ringa, belrate inhni, belrachal ringa, kêlchal ringa, belrate a chal kum khata mi ringa, hi hi Aminadaba nâipa Nasona thilinhlanhai chu a ni.

¹⁸A sûn inhni sûng chu Isakara hai hruaitu Zuara nâipa Nethanela’n an hlana;

¹⁹a thilinhlan hrang chu sumtak khêng khat, a rik lam chu sekel irzakhat sômthum, hmun irthianga sekel sômsari irangpuia rik sumtak tom khat, fâk thei thilinhlan hrang hriak pol sai baidi sip mat mat ni a ti.

²⁰Sekel sômkhat dôra rik mirimhoia sip rângachak khethûk khat,

²¹pum hâlirvôm thilinhlan hrangin sehrâtchal tuai inkhat, belrachal inkhat, belrate a chal kum khat mi inkhat;

²²sual irbôlna hrangin kêlchal inkhat;

²³irngeina irbôlna thilinhlan hrangin sehrâtchal inhni, belrachal ringa, kêlchal ringa, belrate a chal kum khata mi ringa an hlana. Hihai hi Zuara nâipa Nethanela thilinhlanhai chu a ni.

²⁴Khan sûn thum ni chu Zebulun irchia hruaitu Helona nâipa Eliaba’n an hlana;

²⁵a thil inhlan chu sumtak khêng khat, a rik lam chu sekel irzakhat sômthum, hmun irthianga sekel sômsari irangpui dôra rik sumtak tom khat, fâk thei thilinhlan hriak pol sai baidi sip mamat ni sa a ti.

²⁶Sekel sômkhat dôra rik mirimhoia sip rângachak khethûk khat;

²⁷pum hâlirvôm thilinhlan hrangin sehrâtchal tuai inkhat, belrachal inkhat, bêlrate a chal kum khata mi inkhat;

²⁸sual irbôlna hrang kêlchal inkhat;

²⁹irngeina irbôlna hranga thilinhlan, sehrâtchal inhni, belrachal ringa, belrate a chal kum khata mi ringa a ni. Hi hi Helona nâipa Eliaba thilinhlanhai chu an ni.

³⁰Sûn minli ni chu Reubena irchia hruaitu Sedeura nâipa Elizura’n an hlana.

³¹A thil inhlan chu sumtak khêng khat, a rik lam chu sekel irzakhat sômthum, hmun irthianga sekel sômsari irangpui tâbor inkhat, fâk thei thilinhlan hranga hriak pol sai baidi sip mamat ni a ti.

³²Sekel sôm irangpuia rik mirimhoia sip rângachak khethûk khat;

³³pum hâlirvôm thil inhlan hrangin sehrâtchal tuai inkhat, belrachal inkhat, belrate a chal kum khata mi inkhat.

³⁴Sual irbôlna hrangin kêlchal inkhat, irngeina irbôlna hrangin sehrâtchal inhni;

³⁵belrachal ringa, kêlchal ringa, belrate a chal kum khat mi ringa a ni. Hi hi Sedeura nâipa Elizura thilinhlanhai chu a ni.

³⁶Sûn ringa nî chu Simeona irchi Zurisadaia nâipa Selumiela’n an hlana;

³⁷a thil inhlanhai chu tangkarua khêng khat, hmun irthianga sekel sômsari irangpuia rik, tâbor inkhat hriak pol sai baidi sip ni a ti.

³⁸Sekel sômkhata rik mirimhoia sip rângachak khethûk khat;

³⁹pum hâlirvôm thil inhlanna hrangin sehrâtchal tuai inkhat, belrachal inkhat, belrate kum khata mi inkhat;

⁴⁰sual irbôlna hranga kêlchal inkhat;

⁴¹irngeina irbôlna hranga thilinhlan sehrâtchal inhni, belrachal ringa, belrate a chal kum khata mi ringa a ni. Hi hi Zurisadaia nâipa Selumiela thilinhlanhai chu an ni.

⁴²Sûn ruk nia chu Gada irchia an hruaitu Deuela nâipa Eliasafa’n an hlana.

⁴³A thil inhlan chu tangkarua tâbor inkhat, a rik lam chu sekel irzakhat sômthum, hmun irthianga sekel sômsari irangpui sumtak tom khat, fâk thei thilinhlan hranga hriak pol sai baidi sip ni a ti.

⁴⁴Sekel sôm irangpuia rik mirimhoia sip rângachak khethûk khat;

⁴⁵pum hâlirvôm thilinhlan hrangin sehrâtchal tuai inkhat, belrachal inkhat, belrate a chal kum khat mi inkhat;

⁴⁶sual irbôlna inhlan hrangin kêlchal inkhat,

⁴⁷irngeina irbôlna hrangin sehrâtchal tuai inhni belrachal ringa, kêlchal ringa, belrate a chal kum khata mi ringa an ni. Hi hi Deuela nâipa Eliasafa thilinhlan chu a ni.

⁴⁸Sûn sari nî chu Efraima irchihai hruaitu Amihuda nâipa Eliasama’n an hlana;

⁴⁹a thil inhlan chu tangkarua tâbor inkhat, a rik lam chu sekel irzakhat sômthum, hmun irthiang sekel sômsari dôra rik tangkarua tâbor khat, fâk thei thilinhlan hranga hriak pol sai baidi sip ving ni a ti.

⁵⁰Sekel sôm irangpuia rik mirimhoia sip rângachak khethûk khat;

⁵¹pum hâlirvôm thilinhlan hrangin sehrâtchal tuai inkhat, belrachal inkhat, belrate kum khat mi inkhat

⁵²sual irbôlna hrangin kêlchal inkhat;

⁵³irngeina irbôlna hrangin sehrâtchal inhni, belrachal ringa, kêlchal ringa, belrate a chal kum khat mi ringa a ni.

⁵⁴Sûn riat nî chu Manasea irchia an hruaitu Pedazura nâipa Gamaliela kha an inthanga;

⁵⁵a thilinhlanhai chu sumtak khêng khat, a rik lam chu sekel irzakhat sômthum, hmun irthianga sekel sômsari irangpuia rik sumtak tom khat, fâk thei thilinhlan hranga hriak pol sai baidia sip ni a ti.

⁵⁶Sekel sôm irangpuia rik mirimhoia sip rângachak khethûk khat;

⁵⁷pum hâlirvôm thilinhlan sehrâtchal tuai inkhat belrachal inkhat, belrate a chal kum khat mi inkhat;

⁵⁸sual irbôlna hranga kêlchal inkhat;

⁵⁹irngeina irbôlna hranga thilinhlan sehrâtchal inhni, belrachal ringa, kêlchal ringa, belrate a chal ringa a ni. Hi hi Pedazura nâipa Gamaliela thilinhlan chu a ni.

⁶⁰Sûn kuak ni chu Benjamina irchia Gideona nâipa Abidana’n a inhlan a ni.

⁶¹A thil inhlanhai chu sumtak khêng khat, a rik lam chu sekel irzakhat sômthum, sumtak sekel sômsari irangpui tom khat, fâk thei thilinhlan hriak pol sai baidia sip ni a ti.

⁶²Sekel sôm irangpuia rik mirimhoia sip rângachak khethûk khat;

⁶³pum hâlirvôm thilinhlan hrangin sehrâtchal tuai inkhat, belrachal inkhat, belrate a chal kum khata mi inkhat.

⁶⁴Sual irbôlna hrangin kêlchal inkhat;

⁶⁵irngeina sual irbôlna hrangin sehrâtchal inhni, belrachal ringa, kêlchal ringa, belrate a chal kum khat mi ringa a ni. Hi hi Gideona nâipa Abidana thilinhlan chu a ni.

⁶⁶Sûn sôm nî chu Dan irchia mi Amisadaia nâipa Ahiezera’n an hlana;

⁶⁷a thil inhlan chu tangkarua khêng khat, a rik lam chu sekel irzakhat sômthum, hmun irthiang sekel sômsari irangpuia rik tangkarua tâbor khat, fâk thei thilinhlan hriak pol sai baidia sip ni a ti.

⁶⁸Sekel sôm irangpuia rik mirimhoia sip rângachak khethûk khat,

⁶⁹pum hâlirvôm thilinhlan hrang sehrâtchal tuai inkhat, belrachal inkhat, belrate kum khat mi inkhat,

⁷⁰sual irbôlna hrangin kêlchal inkhat.

⁷¹Irngeina irbôlna hrangin sehrâtchal inhni, belrachal ringa, kêlchal ringa, belrate a chal ringa a ni. Hihai hi Amisadaia nâipa Ahiezera thilinhlan chu a ni.

⁷²Sûn sômhleikhat nia chu Asera irchia hruaitu Okrana nâipa Pagiela’n an hlana,

⁷³a thil inhlan chu tangkarua khêng khat, a rik lam chu sekel irzakhat sômthum, hmun irthianga sekel sômsari irangpui tangkarua tâbor khat, fâk thei thilinhlan hriak pol sai baidia sip a ni.

⁷⁴Sekel sôm irangpuia rik rângachaka khethûk khat;

⁷⁵pum hâlirvôm thilinhlanna sehrâtchal tuai inkhat, belrachal inkhat, belrate a chal kum khat mi inkhat;

⁷⁶sual irbôlna hrangin kêlchal inkhat;

⁷⁷irngeina thil irbôlna hranga inhlan chu sehrâtchal inhni, belrachal ringa, belrate ringa kêlchal ringa a ni. Hi hi Okrana nâipa Pagiela thilinhlan chu a ni.

⁷⁸Sûn sômhleihni nia chu Naftalia irchia hruaitu Enana nâipa Ahira’n an hlana.

⁷⁹A thil inhlanhai chu tangkarua khêng khat, a rik lam chu sekel irzakhat sômthum, hmun irthianga sekel sômsari irangpuia rik tangkarua tâbor khat, fâk thei thilinhlana hriak pol sai baidia sip ni a ti.

⁸⁰Sekel sôm irangpuia rik mirimhoia sip rângachak khethûk khat;

⁸¹pum hâlirvôm thilinhlan hrangin sehrâtchal tuai inkhat, belrachal inkhat, belrate kum khat mi a chal inkhat;

⁸²sual irbôlna hrangin kêlchal inkhat;

⁸³irngeina irbôlna hrangin sehrâtchal inhni, belrachal ringa, kêlchal ringa, belrate a chal ringa a ni. Hi hi Enana nâipa Ahira thilinhlanhai chu a ni.

⁸⁴Khanchu maichâm sahriak nâl nia Israel hruaitu thilinhlanhai chu tangkarua khêng sômhleihni, tangkarua leh irpol tom sômhleihni, rângachak khethûk sômhleihni;

⁸⁵tangkarua khênghai chu sekel irzakhat le sômthum irangpuia rik inzen a ni; tangkarua bêlbûrhai chu hmun irthianga sekel sânghni le irzaminli irangpuia rik a ni.

⁸⁶Mirimhoia sip rângachak khethûk sômhleihni chu hmun irthianga sekel sôm irangpuia rik inzen an ni; rângachak khethûk murdi chu sekel irzakhat le sômhni irangpuia rik a ni.

⁸⁷Pum hâlirvôm thilinhlan hrang sehrâtchal murdi chu sômhleihni an ni; belrachal sômhleihni, belrate a chal sômhleihni, fâk thei thil inhlan le; khan sual irbôlna hrangin kêlchal sômhleihni.

⁸⁸Irngeina irbôlna hrangin sehrâtchal sômhni minli, belrachal sômruk, kêlchal sômruk le belrate a chal kum khat mi sômruk an ni. Hi hi hriak nâl hnunga maichâma inhlan zoia thilinhlanhai chu a ni.

⁸⁹Khanchu irtongna puan ina, ama biak hrangin Mosia kha a lûtin chu, Thuthung Bôm chunga za’rngaina toihmun chung tiang cherub inhnihai kâr taka irthokin ama hong chongpuiin irhâi hi an hriata, irhâi khan a chongpui tâka.