Read Hrangkhol NAMBAR 8 Bible Online

NAMBAR 8 - Hrangkhol bible

NAMBAR 8

¹RENGPA’N Mosia a chongpuia,

²“Arona inhrilin lân, a kuang, meiser sarihai kha a siana hmuna an sia tika, kha meiser khan a maton tiang a i-êl hrang a nih ti ro,” tiin.

³Arona’n khaang khan a thoa; RENGPA’N Mosia thu a ipêk ang khan, meiser siana maton tiang khan meiserhai kha a choka.

⁴Hi meiser siana hi RENGPA’N Mosia kuang a inentir lam taka siam a ni, a bul ata a rêl dênin rângachak kuta suk leh siam a ni.

⁵RENGPA’N Mosia a chongpuia,

⁶“Levi mihai kha Israel irchihai lai ata kha a bingin sehaiin lân, thâr irthianghai roh.

⁷Anni kha hiang hin thârhai ro; irthârna tui inthekkhumhaiin lân, an pumpuia irvo infâi hrangin le an puanhai sôp infâi hrangin hrilhai roh. Khanchu Pathian dân angin irthiang an ti.

⁸Khanchu sehrâtchal tuai inkhat le buhûm thilinhlan hriaka pol baidi indi tak leh inlatirhai ni ta; khabana sehrâtchal inkhat sual irbôlna hrangin ni ilâk sa hrang a ni.

⁹Khanchu Israel irchihai kha bukhai ni ta. Levi irchihai chu irtongna Biakbuk mân tiang khan hruaihai roh.

¹⁰Khanchu Israelhai khan Levi irchihai chunga an kut irnghat an ta,

¹¹khanchu Israelhai khan Levi mihai kha RENGPA sin an tho theina hrangin Israel irchihai irhmingin ngaihoi thilinhlana RENGPA kuang inhlan an ti.

¹²Khanchu Levi irchihaiin sehrâtchalhai lua khan an kut irnghat an ta; Levi irchihai ta hrangin chu irngeina an siam theina hrangin, inkhat chu sual irbôlna hrangin, inkhat dang chu pum hâlirvôm thilinhlanna hrangin RENGPA kuang inhlan ni a ti.

¹³“Levi irchihai kha Arona le a nâipasalhai makunga inomtirhai ni ta; RENGPA ta hranga ngaihoi thilinhlan kha inhlanhai roh.

¹⁴Khaang khan Israel irchihai lai ata kha Levi irchihai kha zêkhaiin lân, khanchu Levi irchihai kha keima ta ni an ti.

¹⁵Kha hnung chu Levi irchihai kha irtongna Biakbuka khan Pathian sintho hrangin lût an ta, nangin anni kha thâr irthianghai ni ta, ngaihoi thilinhlan angin ni inhlanhai hrang a ni.

¹⁶Israel irchi nâilutîrhai irthûla keima dongtum an ni sikin.

¹⁷Mihriam khom ni sian, sa khom ni sian, Israel irchihai laia nâilutîrhai chu ki ta an nia, Aigupta rama nâilutîr ki that lai khan anni hi chu keima dongtum hrang piala ki isiahai tâk kêng.

¹⁸Khasikin Israel irchia nâilutîr murdihai irthûlin Levi irchihai chu ki ilâk tâk a ni.

¹⁹Khasikin Israel irchihai irthûlin anni chu irtongna Biakbuka sintho hrang le Israel irchihaiin hmun irthianga an hong nâi khoma, anni laia hri a lêng loina hrangin hrungin Israel irchihai rengata Levi mihai hi Arona le a nâipasalhai ki ipêk a ni,” tiin.

²⁰Khanchu RENGPA’N Mosia thu a ipêk angin Mosia, Arona le Israel murdihai khan Levi mihai chu a inhlan irthiangtirhai a ni ta.

²¹Khanchu Levi irchihai chu an irthâr irthianga, an puanhai an sôpa; khan Arona’n RENGPA makunga ngaihoi thilinhlana khom an hlana, khabana a thâr irthianghai tâka.

²²Levi mihai chungchânga RENGPA’N Mosia thu a ipêkhai lam ang takin mipuihaiin an thoa, khanchu Arona le a nâipasalhai enkolna hnuaia Levi mihai chu irtongna Biakbuka sintho hrangin an om tâka.

²³RENGPA’N Mosia a chongpuia,

²⁴“Levi irchihai chu kum sômhni ringa mi an ni rengata irtongna Biakbuka sin tho an ta,

²⁵khannisian kum sômringa tena mihaiin chu an sin thôna rengata kha irngam an ti.

²⁶Khannisian irtongna Biakbuk sina khan an irchihai kha sanhai thiai an ta, khannisian an bingin chu irbôlna sin chu tho ta no nihai,” a tia.