Read Hrangkhol MIKA 2 Bible Online

MIKA 2 - Hrangkhol bible

MIKA 2

¹An zâlhmuna pualoina ngaituatuhai le thil saloi ngaitua suaktuhai kha an chung a rik e! Zînga khua a hong vârin an itum ang ngei khan an tho tâka.

²Mi dang loihai an irzuka, an lâkpai pehaia; inhai an irzuka an lâk tâka; mi le an in sûng mihai, mi le an irchonhai dênin an ihnuaisia a ni.

³Khasikin RENGPA’N hiang hin a ti: irngai ta hi in sûngkua chunga hin thil saloi ki ingaitua a ni, khatak ata khan nin ring la sonpai mak chêia, lârirpâk takin fe ta no chin ni: zoro saloi a ini hrang a ni.

⁴Kha nikhuaa khan nangni demin chongirkhekna thu siam an ta, chap hla beidong om insamin, ilong zitin kin iom tâk a ni hi te: ki mihai dongtum an danglamtira: ki kuang ata a isonpai tâk a ni hi! Tehel hmanghai kuang kin lei sem indarh tâk a nih ti an ti.

⁵Khasikin RENGPA mihai inkhômhai laia khan, tasânna hruia irkhit petu tûte nei no chi ni.

⁶Thu hril no ro, tiin an insîr ngai. Hi mihai kuanga hin thu hril no nihai: hrilinsiatna kha irkiang no ni.

⁷O Jakoba in sûng mihaio, RENGPA irtha kha tuangdiarna a irsam ma ni? Hi hi a sintho mani ti hrang ma ni? Dik taka om ngai chunga khan ki thuhai hin thil sa a itho loi ma ni?

⁸Khannisianlân, ki mihai kha atûn laia, râl angin an hong inding suak a ni: irdoi nuam loia lungthi taka chai irvâkhai ata an silkai songkol irfualhai an hlîk pea.

⁹Ki mi nupanghai kha an in hoitak ata nin inhnot suaka; an nâipangtehai ata ki roiinpuina kha nin lâkpai ving tâk a ni.

¹⁰Thoi unglân, fe irhmang roi; hi hin zôkna om ma; nin pualoina sikin insiat zit ni a ti.

¹¹“Uain le zu luang a ti,” tia milak hril deipu irvâk vêlhai kha, hi mihai deipu ni le irhoi an ni.

¹²O Jakoba-hai, nin rêngin nangni koi buk ngêt ki ta; Israel mi la omsunhai kha hruai khôm ngêt ki ta; Bozra khuaa belra angin siakhôm ki ta: sa pâl an hloisûl hmuna om ang maiin, mipui an ni sikin irse mur mur an ti.

¹³Suk thengtu kha an matona hong a fea; an suk thenga, mikot dênin an fe thiaia, khataka khan an ife suak a ni; khan, an rêng kha an maton tiang a fea, RENGPA khan an maton a hruaia.