Read Hrangkhol MIKA 4 Bible Online

MIKA 4 - Hrangkhol bible

MIKA 4

¹Khannisianlân, nikhua hnungkhônhaia chu hiang hin ni a ta, RENGPA nin omna tâng kha tâng lian chunghaia khan indetin om a ta, tâng tehai chunga khan chôiirsângin om sa ti; kha khan chi tinrênghai kha fe mur mur an ti.

²Khan, nam tamtakhai kha fe an ta, zuang kîr unglân, RENGPA tânga, Jakoba Pathian ina khin hong fe ei ti; khanchu ama’n a lampui thurchihai kha nir chûtir a ta, a fena lampuihaia khan fe kin tih ti an ta: Zion ata kha dân thu a zuang isuak hrang a nia, RENGPA thu kha Jerusalem ata a zuang isuak hrang a ni.

³Khan, ama khan chi tamtak kâra roirêl a ta, hlataka nam hrât tak khom halirchu a ti; khan, an khandaihai kha âlkaina hmor irzumhai incher an ta, an ufeihai kha thei kunga tanna chem kolhaia incher an ti: nam dangin nam dang chunga khandai irlek ta no nihai, irdoi dân khom irchu ual ta no nihai.

⁴Mi tinhai kha an grep kung hnuaia le an theipui kung hnuaia toi ual an ta; tukhomin chi no nihai: Sipaihai RENGPA bâia khan an sîr tâka.

⁵Nam tinin mâni pathian seng biak an ta, eini khom RENGPA ei Pathian kha kumkhua’n biak ei ti.

⁶RENGPA’N hiang hin a ti, “Kha nikhuaa khan ke’nbâi bukkhôm ki ta, irzûlpaia om le ki intaktira om kha buk ki ta;

⁷Ke’nbâi chu a thi ban siam ki ta, hlataka inhnotpai kha nam hrât taka siam ki ti: atûn ata chu Zion tânga kumkhua’n RENGPA khan an chunga roirêl a ti.

⁸O nang, sa rual kul, Zion nâinu omna tâng ni kuanga zuang tung a ta; a ni, inlalna masa kha zuang tung a ta, Jerusalem nâinu inlalna kha.

⁹Itho sika mo ni ichap rak rak? Ni sûnga inlaltak a iom loi ma ni, nang an kung petu a ithi mani ta, nupang nâiha anga natna’n nang a ikop tâk ma ni?

¹⁰O Zion nâinu nupang nâiha ise nâi nei hrang angin a na tuangin lân, irvei ro atûn khopui ata fe suak ni ta, rama om ni ta, Babulon ten khomin a ife hrang a nia; kha khan sansuakin om ni ta, kha khan ni râlhai kut ata RENGPA khan nang sansuak a ti.

¹¹Atûn nam tamtak nangma doiin an irbuka, porinchetirin om sianlân, ei mit hin Zion chunga a irzuk lam kha hmu ri se, an tia.

¹²Khannisian RENGPA ngaituanahai kha inhre mahaia, ar fûktir kha inhre thiam mahai: hruizôla bumût siakhôm angin anni kha a bukkhôma.

¹³O Zion nâinu, thoiin lân chîl roh: ni ke kha thîr angin siam ki ta, ni ke zapha hmorhai kha dâr angin ki isiam hrang a ni: khan, chi tamtakhai kha zêm phiar ni ti; an thil hlep RENGPA ta hrangin ser indang bîk ni ta, an sum kha irnêng pumpuia RENGPA ta hrangin ser indang ni ti.