Read Hrangkhol MIKA 6 Bible Online

MIKA 6 - Hrangkhol bible

MIKA 6

¹RENGPA thu’nsîr kha atûn hin irngai roi: thoiin lân, tâng lian makunghaia khan irsêlpuiin lân, tâng tehai khan nir hâi irngai ri sehai.

²O tâng lianhaio, RENGPA sêlna kha irngai unglân, nangni irnêng irnghatsan dethaio, irngaitua roi. RENGPA kha a mihai leh an irsêla, Israelhai kha dem a ti.

³Ki mihaio, nin chunga imo ki ti tak? I ang lamin mo nangni ki insôltir? Ni hong sêl u ta.

⁴Aigupta ram ata kha nangni ki hruai suaka, suak ata nangni ki’rtansuaka; nin mân tiang Mosia, Arona-hai le Miriami hai ki zuang itîr kha.

⁵O ki mihaio, RENGPA thil tho fel kha nin inhriat theina hrangin, Moab rêng Balaka thu’nkung le Beora nâipa Balaama’n a sâm dân, Sitim ata Gilgal dêna thil omziahai kha, atûn hin inhre mai roi.

⁶I leh mo RENGPA makunga khan zuang ki ta, Pathian inchungtak makunga ki ikûn hrang? Hâlirvôm thilinhlanhai, sehrâtte kum khat mihai le a makunga khan ki ihong hrang ma ni?

⁷RENGPA kha ki belra chal sâng tamtak mani, sahriak dung sîngkhathai manin milung a inchuk hrang ma ni? ki tho’nchâina sikin ki nâilutîr kha ki pêkin, ki’rtha sualna sikin ki taksa ra kha ki ipêk hrang ma ni?

⁸O mihriam, satna kha a inentir tâk a ni; RENGPA’N nangni a inphût kha i ma ni? Dik taka tho le lungkhamna irngaiinna le ni Pathian leh thuhnuairôl taka lêngsuam a ini loi ma ni?

⁹RENGPA khan khopui kha a insam a ni, vârna nei mi khan nir hming kha chi a ti: hêmvuak leh a sinsiamtu kha inhre mai roi.

¹⁰Mi sia ina khan sualna irchon kokhai kha a la omin, irkhîna dikloi intirom tak kha a iom ma ni?

¹¹Irtêna dikloihai le hmarsa rik dân dôhai leh khan irthiang ki ini hrang ma ni?

¹²khataka mi irchonghai kha manêpnain an sipa, khataka omhai khan milak an thoa, an bâi sûnga an milei kha huangna’n an ihmang a ni.

¹³Khasikin kei khomin nataka popin nangni ki izêm tâk a ni; ni sualnahai sikin nangni ki insiat chit tâk a ni.

¹⁴Fâk kha fa ni ta, khannisian khop no chi ni, ni phîng hong châm mai a ti, thilsia insa ni ta, inzôk ual thei no chi ni, ni inzôk sun khom irdoinaa siat a ti.

¹⁵Song ni ta, khannisian ât no chi ni: oliv rahai kha sir inzôi ni ta, khannisian a hriak kha irthu no chi ni; grep sôminzung khomin lân, a uain kha in no chi ni.

¹⁶Omria thu’nkunghai kha vong mai a nia, Ahaba sûngkua thiltho murdihai leh an inkungnahai khan nin ife a ni: khanchu hmun irama nangni ki isiam hrang a ni, a sûnga omhai hi nuiza siamna’n om an ta, khan, ki mihai irhming siatna kha pêl ni ti.