Read Hrangkhol HABAKUKA 1 Bible Online

HABAKUKA 1 - Hrangkhol bible

HABAKUKA 1

¹Deipu Habakuka’n puakrik a ihmu chu;

²O RENGPA, idôr ten mo nang insam ki ta, nir ngaitua loia ni iom hrang? Irmanêpna tiin nang ki koia, nangin saninzôk ual mak chea.

³Ithoa mo pualoinahai ni nin entira, thil dik loi takhai hi ni ien mai? irrokna le irmanêpna hai, ki makunga an om maia: Irkhalna le irngônahai a hong isuak a ni.

⁴Khasikin, dân thu khan ar fêna om thei maka, Roirêlna thu suak ual ngai ma: Mi felhai kha mi siahai khan an irhual vêla. Khasikin roirêlna kha dikloi takin a suak ngai a ni.

⁵Nin vêla namhai kha en unglân, thîr mai roi, a sate’n ar khêl ti roi; Nin dam sûngin thil lamkhat ki itho hi, Kha thiltho kha mi’n nangni hril khomhai sianlân, Taksôn viat no chin ni.

⁶Irngai roi, Kaldai mi, Nam pualoi tak le milung inrem tak, lêngna hmun, an ta ni loi khom nei tuma hmun tina irvâk vêl ngaihai kha! ki ikaithoihai an ni.

⁷Anni kha ichiom tak le pangzaom tak an ni, An roirêlna le an roiinpuina kha, anni ata suak sa a ni.

⁸An sakorhai khom kâmkeite nêkin an chaninrang uala, khohloi tianga inêhai nêk khomin ichi an om ual; An sakor chung chuanghai kha an hong chum thiar thiara: A ni, an sakor chung chuanghai kha hlatak ata hong an ni; Irmupui âr chel hrang angin an zuang hrâta.

⁹Mi va rûnhai tumin an honga, irzuk takin mân tiang an irhei ngit a ni; bâli ang dôra tam salhai an chelhai ngai,

¹⁰A ni, rênghai khom an innuisana, Mi lianhai kha an ta hrang khan hmusitom an nia, kul det tinrênghai kha an innuisana, irnêng an inpônga, an lâkpai ngaia.

¹¹Phâivua ang dênin an hong inmuaia, An fe theng zut zuta, Aniachu, an hrâtna kha pathianin an nei sikin, thiamno an ichang a ni.

¹²O RENGPA ki Pathian, ki mi Irthiang, kumtuang mi ni ini loi ma ni? Thi ngai mak che. O RENGPA, nangin anni kha roirêlna hrangin nin thang tâka, O Lungpui, nangin anni kha ni sep hrangin ni inkunghai an ni.

¹³Nang chu sualna hmûna ngai nêpa mit irthiang ual nei ni ni, irtheimâkna kha ni ien theiloi a ni, Khasikin, pualoi taka thotuhai kha hmu chianin, Mi siain ama nêka fel ual a inlem zoi lai khomin, itho sika ni idâisan hrek ngai mo?

¹⁴Mihriam hi tuikhangliana ngahai le thilhring boka irvâk, An chunga roirêltu nei ual loihai anga ni isiam a ini loi ma ni?

¹⁵Ama khan irkuai leh an kai suakhai zita, A lênin a chelhaia, A lênkhang leh khan an tomhaia, khasikin raifânin a ilôm a ni.

¹⁶Khasika khan lên kuanga khan irbôlna an hlana, A lênkhang kuang mirimhoi a hâla, Anni sika a dongtum a hong liana, Fâk hrang a nei intam tâk sikin.

¹⁷Khasikin a lên kha inrong nôkin, Namhai that mai hrang chu a imâk loi hrang ma ni?