Read Hrangkhol ZEFANIA 1 Bible Online

ZEFANIA 1 - Hrangkhol bible

ZEFANIA 1

¹Judahai rêng Amon nâipa Josia inlal laia, RENGPA thu Zefania, Kusa nâipa, Gedalia nâipa, Amaria nâipa, Hezekia nâipa kuanga zuang tung kha.

²Irnêng chung ata thil murdi inboipai zit ki ti, ti hi RENGPA thu suak a ni.

³Mihriam le sahai inboipai ki ta; chunglêng vahai le tuipuia ngahai inboipai ki ta; Mi sualhai kha intûktir ki ta; Irnêng chung ata mihriam inboipai zit ki ti, ti hi RENGPA thu suak a ni.

⁴Judahai le Jerusalem luatuhai murdi chunga ki kut irlek ki ta; hi hmun ata hi Baal la omsunhai, Kemarim irhming kha ochaihai le ileh,

⁵In chung sîpa irvân tiang thilhai kuanga kûn ngaihai, RENGPA kuang khomâksâma Malkama sâla insam saa kûn ngaihai,

⁶RENGPA irheisantuhai leh RENGPA zong loia ama irdon loituhai kha inboipaihai pat ki ti.

⁷RENGPA PATHIAN makunga khan dâihrek roh: RENGPA nikhua kha anai tâk sikin: RENGPA khan irbôlna a sinsiam tâka, A mi fialhai khom a’rthiangtirhai tâk a ni.

⁸Khan RENGPA irbôlna zoro sûng chu, mi lianhai le rêng nâipasalhai le ram dang irvônahaia irvôtuhai murdi chu hrem ki ti.

⁹Khan kha nikhuaa khan chu pathian dikloi chubai mûktuhai murdi le an hruaituhai, irhnuaisia irhlômtuhai le huangnaa siptuhai kha hrem ki ti.

¹⁰Khan kha nikhua khan Jerusalem nga mikot bâia irthok khan khêk irhâi irkhêl tak om a ta, Misne ata khêk rak rakhai, tâng ata irse mur murhai, om an ta, ti hi RENGPA thu suak a ni.

¹¹Maktes mihaio, Kanaan mi chu an irhmang sikin khêk rak rak roi! Tangkarua pêl murdihai an thi zoi zit tâk a ni.

¹²Khan, kha tika chu hiang hin ni a ta, meiser belin Jerusalem zong suak ki ti; uain zôl irnok anga om ma maia, an lungrîla, RENGPA khan a sia a sah ti a nei ngai mo, tituhai chu hrem ki ti.

¹³Khan, an sumhai kha râllâk hong chang zoi a ta, An inhai kha ram a ta; a ni, inhai sin an ta, Khannisian lua no nihai; Grep irhuanhai siam an ta, khannisian a uain kha in no nihai.

¹⁴RENGPA nikhua roiinpui tak kha anai tâk e, a nâiin a itheng lat hrang a ni, RENGPA nikho irhâi kha irkhêl tak a ni; kha khan mi hrât kha khêk rak rak a ti.

¹⁵Kha nikhua kha ningmurna nikhua a nia, chardong le intakna nikhua, siatna le ramna nikhua, Inthimna le khor-ui nikhua, sûm le izîng irsa khak nikhua a nia,

¹⁶Kulpuia irkul khopuihai chunga le khua kul irsânghai chunga khan bekul le râl doi irhâi inringna nikhua a nia.

¹⁷Khan, mihriamhai chunga intakna zuang intung ki ta, Mitcho ang dênin fe an ta, RENGPA chunga an sual sikin; an thisen kha vâiphin angin bunpai ki ta, An taksahai khom êkvûng ang dênin.

¹⁸RENGPA ninginmurna nia chu an rângachak mani, An tangkarua’n mani khomin anni kha sansuak thei no ni; Ram pumpui hi a khôkmâkna meia khan kâng irhmang zit a ti. Rama omhai murdi inboi a ta, A ni, inboina irkhêl tak a siam hrang sikin.