Read Hrangkhol ZEFANIA 3 Bible Online

ZEFANIA 3 - Hrangkhol bible

ZEFANIA 3

¹Tehelzong ngai le porinche, opbe hmang khopui chung kha a rik e!

²Hnukirhâi kha zôm maka; halirchûna pom maka; RENGPA kha iam maka; a Pathian tiang nâi nuam ma.

³A sûnga a hruaituhai kha kâmkeibaknei inrûm lai an nia; a roirêltuhai kha khohloi tianga ine an nia; a tûk dêna insoi hrang ite hôi mahai.

⁴A deipuhai khom kha mi huang hmang le mi hmangnaboi an nia, a ochaihai rêk khan hmun irthiang kha an porinchetir tâka, Pathian dân kha an nuam lam lamin an inkôktir ngai.

⁵A sûnga khan RENGPA kha mi dik a nia; siatna tho no ni; zîng tinin a roirêlna kha an langtira, lôipai ngai maka; aniachu mi felloi khan inzakna lam reng inhre mah.

⁶Namhai kha kin boipaia, an kulhai ten khom kha a ram chit tâka; an kholai dunghai kha kin siatpai zita, tukhomin hro ta mahai; an khopuihai kha insiatin a oma, khanchu mi om ta mahaia, a luatu khom om ta mahai.

⁷Nangin ni chi photin lân, halirchûna hi lei pomin lân; khanchu ama chungchânga ki inkung murdihai ang khan a omna kha inboipai pat ni no nia, ki tia. Khannisian zînga an thoia, an thiltho murdi an tho’nchâi zit tâka.

⁸Khasikin râllâk la hranga ki thoi ni dênin ni nghâk roi, ti hi RENGPA thu suak a ni. Ki thil tum kha an chunga ki ninginmurna ichiom tak kha insum hranga inlalna ramhai irbuktira namhai koi buk hi a nia; irnêng murdi hi ki khôkmâkna meia a la ikâng fâi zit hrang a ni.

⁹Kha tika chu mipuihai kha hmûr irthiang irputtir nôk ki ta, RENGPA irhming kha an inzaa anni tiang inthuruala a sin an tho suam theina hrangin,

¹⁰Ethiopia dung pên tiang ata ki kuanga ngêntuhai, ki mi indarhai nâinu khan ki thilinhlan hong la an ti.

¹¹Kha nikhuaa khan ki chunga ni tho’nchâina thiltho sikhaia khan inzak ta no chi ni, kha tika chu ni sûng ata ni mi, lârirpâkna raiinfânpuituhai kha la pai ki ta, ki tâng irthianga hin lârirpâk hrangin om ta no chi ni.

¹²Ni sûng ata mi inrianghai le denginthei tuanghai kha hôi ki ta, RENGPA irhming kha iam an ti.

¹³Israel mi la omsunhai khan pualoina tho no nihaia, milak tho sa no nihaia, An bâia khom huangna chong om ual hliak no nia: an fâkin zâl an ta, tûte’n inchitir ta no nihai.

¹⁴O Zion nâinu, zâi ro; O Israel, khêk rak rak ro; O Jerusalem nâinu, ni milung murdi’n lômin lân, raiinfân roh.

¹⁵RENGPA’N ni chungchâng rêlnahai kha a lâkpai tâka, Ni râl a pai suak ta: Israel inlaltak, RENGPA khom kha ni chunga a om e: Thil saloi chi ngai ta no chi ni.

¹⁶Kha nikhua khan Jerusalem kuang, chi no roh, O Zion, Ni kut khom irzal no ri se, ti an ti.

¹⁷RENGPA ni Pathian kha ni chunga a om e, Saninhringtu hrang mi hrât tak kha: Lômin ni chunga raiinfân a ta, a lungthungna inthartir a ta, hla sakin ni chunga lôm a ti.

¹⁸Nangmaa mi, inkhômpuia kop phâk loia beiindonghai kha, hruai khôm ki ti, nangma sika hrilinsiatna puakrik pêltuhai kha.

¹⁹Irngai ro, kha tika chu nang ngaisaktu murdi kha ngaitua ki ti. Khan, ke’nbâi kha saninhring ki ta, Inhnotpaia om kha hruai khôm ki ti, Khan, irnêng chung murdia lei mualinphoina kha, Inpâkna le irhming inthangnaa inchangtir ki ti.

²⁰Kha tika chu nangni hruai lût ki ta, kha tika nangni hruai khôm nôk ki ta: Nin ihmu ngeia nin sal intângnaa ki’rheikîr tika chu, Irnêng chung murdihai laia Irhming inthangna le inpâkna nangni siam pe ki ti, RENGPA’N a ti.