Read Hrangkhol ZAKARIA 1 Bible Online

ZAKARIA 1 - Hrangkhol bible

ZAKARIA 1

¹Daria inlal kum hnina, tha riatnaa deipu Zakaria kuanga khan RENGPA thu a zuang tunga:

²RENGPA kha nin pahai chunga khan a sân a milunghoi maka.

³Khasikin hiang hin an kuang van sîr ro: Sipaihai RENGPA khan hiang hin a ti, keima tiang hong irhei unglân, kei khom nangni tiang zuang irhei ki ti, ti hi sipaihai RENGPA thu suak a ni.

⁴Deipu masahaiin, sipaihai RENGPA khan, nin om hrang dân suala atûn hong irhei unglân, nin thilsual kha chu hong irheisan roi, a ti e, tia nin pahai an hril khoma irngaitua loia, mikuar sung loi ang khan om no roi, ti hi RENGPA thu suak a ni.

⁵Nin pahai kha khôn mo an om? Deipuhai khom kha an hring kumkhua tâk ma ni?

⁶Ki thu le ki thu’nkunghai, ki siahlo deipuhai kuang, ki pêkhaia khan, nin pahai kha a innang tak khom a ini mo ni ma? khanchu, an hong irheia, sipaihai RENGPA khan kin chungchânga ti a tum ngai angin kin om dân ang zêl le kin thiltho ang zêlin keinia a ti tâk a ni, an ti kha, tiin.

⁷Daria kum hnina, tha sôm le tha khatna, kha kha Sebat tha a nia, sûn sômhni minlinaa khan Idoa nâi Barakia nâipa, deipu Zakaria kuanga khan RENGPA thu a zuang tunga;

⁸zâna khan sakor sen chunga mi inkhat chuang ki hmua, irhôr irhmûithing kôla hin a ngîra; khan, a hnunga khan sakor, a senhai, a pôlhai a ngoihai an oma.

⁹Kha khan keiin, “O ki RENGPA, hihai hi i ma ni?” ki tia. Vântirtôn ni chongpuitu khan ki kuang, “Hihai hi imo an ini keima’n nang inentir ki ti,” a tia.

¹⁰Khan, mi irhmûithing laia ngîr khan a sâma, “Hihai hi RENGPA’N irnêng murdi irfang suak hranga a itîrhai kha an ni hi,” a tia.

¹¹Khan, anni khan, RENGPA vântirtôn irhmûithing laia ngîr kha a sâma, irnêng murdi kha ei irfang suak tâka, irngai ro, irnêng kha a om chian chiana, a om mai mai a ni, an tia.

¹²Khataka RENGPA vântîrtôn khan a sâma, “O sipaihai RENGPA, Jerusalem le Juda khopui chunga, hi kum sômsari ni ninginmurnahai hi i dôr ten mo lung ni inkham loi hrang?” a tia.

¹³Khan, RENGPA khan, vântirtôn, thu satak thu irtharngam om taka ni chongpuitu kha a sâm tâka.

¹⁴Khanchu vântîrtôn ni chongpuitu khan, ki kuang, “Hiang hin va insam ro,” a tia: sipaihai RENGPA khan hiang hin a iti a ni: Jerusalem le Zion hi irvei ta takin ki’rveia,

¹⁵khan, nam chai nuam mai maihai ata khan a sân ki milunghoi tak tak maka; ki milung hoi loi vai a ni nâkin, anni hranga thil saloi kha an tho’nsual tâk a ni.

¹⁶Khasikin RENGPA khan hiang hin a iti a ni: za’rngaina le Jerusalem tiang ki’rhei lai a nia, kha khan ki in kha sin a nia, ti hi Sipaihai RENGPA thu suak a ni: khan, Jerusalem chunga khan irkhîna khianghrol kaiinding ni a ti.

¹⁷Hiang hin sipaihai RENGPA khan a ti e, ki khopuihai kha irhniangna sikin chuai nôk an ta, RENGPA khan Zion kha irtharngam nôk a ta, Jerusalem kha inthang nôk a ta, tiin van sam nôk ro, a tia.

¹⁸Khan, ki mit ki hong inlêngtira, ki hong ena, irki minli ki hmua.

¹⁹Vântirtôn ni biaktu kuanga khan, “Hihai hi imo a ini?” ki tia. Khan, ama khan, “Hihai hi Judahai, Israelhai, Jerusalem-hai indartirtu hi an ni hi,” tiin a ni sâma.

²⁰Khan, RENGPA khan thîrsu minli a nin entira.

²¹Khanchu keiin, “Hihai hi imo hong tho hrang an ini?” ki tia. Ama khan, “Sohai so tûte hong tang suak ngam rêng om ta loi dôra, Judahai indartirtu kha an nia; khannisian hihai hi, anni indôptir hrang le Juda ram indarh hranga an nia an irki hong hmangtu namhai irki kha paithâk hranga hong an ni hi,” tiin an sîra.